ސްކޫލްތަކުގެ ފާހާނާތަކާއި ދޮރުތަކާއި ފާރުތަކުގައި ހުތުރު ބަސްތައް ލިޔެފައިހުރެ އެވެ. ދަރިން ކިޔަވަންދާ ސްކޫލްގެ ފާރުތަކާއި ފާހާނާތަކުން އެފަދަ ހުތުރު ބަސްތައް ފެނި ދަސްވުމަކީ އެކަކު ވެސް ބޭނުންވާނެ ކަމެއް ނޫނެވެ. އެހެން ނަމަވެސް އެއީ މިހާތަނަށް ވެސް ހައްލެއް ނުހޯދި އޮތް ކަމެކެވެ. އެކަން އެހެން އޮއްވާ އާ ކަމެއް ތައާރަފުވެއްޖެ އެވެ. މިސްކިތްތަކުގެ ފާރުތަކާ ހަމައަށް އެކަން ދަތުރުކޮށްފި އެވެ.
މިސްކިތްތަކަކީ ނަމާދަށް އަރާ ތަންތަނެވެ. މާތް ﷲ ގެ ގެކޮޅުތަކެވެ. ހުރުމަތްތެރި ވެގެންވާ މިސްކިތްތަކުގެ ހުރުމަތް ކެނޑޭފަދަ އަމަލުތައް ރާއްޖެ ފަދަ ސައްތައިން ސައްތަ މުސްލިމް ގައުމަކުން ފެންނަން ފެށުމަކީ ބަލައި ގަނެވޭނެ އަދި އެކަމަށް ފިޔަވަޅު އަޅައި ހައްލުން ހޯދަން ޖެހޭ ކަމެކެވެ.
ރާއްޖޭގެ އެންމެ ބޮޑު މިސްކިތް، އިސްލާމީ މަރުކަޒުގެ ފާރުގައި ބަޔަކު ހަޑި ހުތުރު ބަސްތައް ލިޔުނީ މީގެ ދެތިން ހަފުތާއެއް ކުރިންނެވެ. މިއީ އަބަދުވެސް މިސްތަކަށް އިހުތިރާމާއި ލޯބި އޮންނަ ރާއްޖެއިން އަލަށް ފެނުނު ކަމެވެ. މިސްކިތުގެ ހުރުމަތް ކެނޑުމަކީ ނުބައިކަން ބޮޑުވެގެން ފާފައެކެވެ. މިއީ އެކަން ސަމާލު ކަމަށް ނުގެނެސް ދޫކޮށްލައިގެން ތިބެވޭވަރުގެ ކަމެއް ނޫނެވެ.
"މިސްކިތްތަކަކީ ދުނިޔެމަތީގައި ﷲ ސުބްހާނަހޫ ވަތައާލާގެ ގެކޮޅު. އެފަދަ މާތްވެގެންވާ ތަނެއްގެ ހުރުމަތް ގެއްލޭ ފަދަ ކަންކަން އަޅުގަނޑުމެން މުސްލިމުން ކުރުމަކީ ހަގީގަތުގައި ވަރަށް ދަށު ދަރަޖައިގެ ކަމެއް. އެފަދަ އަމަލުތައް ކުރާ މީހުންގެ ހިތުގައިވާ އީމާންތެރިކަމާމެދު ވެސް ސުވާލު އުފެދޭ ފަދަ ކަންކަން މިއީ. އެއްވެސް މުސްލިމެއްގެ މައްޗަށް އޮތް ކަމެއް ނޫން، އަދި ހައުގު ވެގެންވާ ވެސް ކަމެއް ނޫން ﷲގެ ގެކޮޅުގެ ހުރުމަތް ކެނޑުމަކީ. އެފަދަ އަމަލުތައް ހިންގާ ފަރާތްތަކާމެދު ހަރުކަށި ފިޔަވަޅުވެސް އަޅަން ޖެހޭނެ އެ އިރަކު ތިއްބަވާ އިސްވެރިން." އިސްލާމީ ޔުނިވާސިޓީގެ ލެކްޗަރާއެއް ކަމަށްވާ އާދަމް ނަސީރު އިބްރާހިމް ވިދާޅުވި އެވެ.
މީގެ ތިރީހަކަށް އަހަރު ކުރިޔަށްދާއިރު މިސްކިތްތަކަށް ވަރަށް ހާއްސަ ސަމާލު ކަމެއްދީ މިސްކިތްތައް ބަލަހައްޓަ އެވެ. އަބަދުވެސް ރާއްޖޭގައި މިސްކިތްތަކުގެ ސާފުތާހިރުކަން ބަލަހައްޓަމުން އައިސްފައިވަނީ ފުރިހަމައަށެވެ. އެހެން ނަމަވެސް މިހާރު މިސްކިތްތައް ބެލެހެއްޓެނީ ކިހާ މިންވަރަކަށްތޯ ސުވާލު ކުރެވިދާނެ އެވެ.
ވެރިރަށް މާލޭގެ ބޮޑެތި މިސްކިތްތަކުގައި ކިޔެވުމަށައި ފިލާވަޅު ދަސްކުރުމުގެ ނަމުގައި މީހުން ތިބެ އެވެ. ބައެއް މީހުން މިސްތަކިތްކުގައި ނިދައި ވެސް ހަދައެވެ. އެފަދަ ބައެއް މީހުން މިސްކިތްތަކުގެ ހަރިއްމައިގެ ކައި ބޮއި ވެސް ހަދަ އެވެ.
ކަމަކާ ހިތްހަމަ ނުޖެހި ހިޔާލު ތަފާތުވި ނަމަވެސް ދީނަށާއި ދީނުގައި ހުރުމަތްތެރި ތަންތަނުގެ ހުރުމަތް ހިފަހައްޓަން ޖެހެ އެވެ.
"މިސްކިތްތަކަކީ އިސްލާމް ދީނުގައި ހުރުމަތްތެރިކުރައްވާފައިވާ ތަންތަން. އެތަންތަނުގެ ހުރުމަތް ކަނޑައިގެން ނުވާނެ،" އިސްލާމިކް މިނިސްޓްރީގެ ކޯޑިނޭޓާ މުހައްމަދު އަހުސަން ވިދާޅުވި އެވެ.
މިސްކިތަކުގެ ފާރުގައި ހަޑިހުތުރު ބަސްތައް ލިޔެފައި ދިޔުން އެއީ ގަބޫލު ކުރެވޭ އަދި ބަލައިގަނެވޭނެ ކަމަކަށް ނުވާއިރު އެފަދަ ކަންކަމުން އެއްފަރާތްވުމަށް ވެސް މަސައްކަތްތަކެއް ކުރަންޖެހެ އެވެ.