ވެލެންސިއާގެ މައްޗަށް 3-1 ނަތީޖާ އަކުން ކާމިޔާބު ހޯދައި، ވިކްޓަރީން ސީޒަންގެ ފުރަތަމަ މޮޅު ހޯދައިފި އެވެ.
ސީޒަން ފަށައިގަތް އިރު، އުނދަގޫ ހާލަތެއްގައި އޮތް، ވިކްޓަރީން މެޗުން މޮޅުވުމުން ލިބުނު ތިން ޕޮއިންޓާއެކު، އެޓީމު ވަނީ ފަސް ޕޮއިންޓްފަ އެވެ. ފުރަތަމަ ބުރު ނިމޭއިރު، އެޓީމަށް އަށް ޕޮއިންޓް ހަމަ ކުރެވޭނެ ކަމަށް ކޯޗް އަލީ ސުޒޭން ގަބޫލު ކުރެ އެވެ.
"އެތަށް ދުވަހެއް މިދިޔައީ މޮޅެއް ނުވެގެން އުޅޭތާ، ގާތްގަނޑަކަށް ތިން މަހެއްހާ ދުވަސް މިވީ، މިއީ ފެށުމެއް ކަމަށް ބަލައިގެން ކުރިއަށް ދިޔައީމާ ރަނގަޅު ވާނެ،" މެޗަށް ފަހު ވާހަކަ ދައްކަމުން ސުޒޭން ބުންޏެވެ.
އޭނާ ބުނީ މެޗުގައި ވިކްޓަރީން ގިނަ އެޓޭކް ތަކެއް ކޮށް، މެޗުގައި ޖުމުލަކޮށް ޓީމުގެ ކުޅުމާ މެދު ހިތްހަމަ ޖެހޭ ކަމަށެވެ.
ސުޒޭން ބުނީ ކޮންމެވެސް ވަރެއްގެ އަނިޔާއެއްގެ ސަބަބުން، ބަކާ ކުޅުނީ، އެންމެ ފަހުން ކުރި ޕްރެކްޓިހުގައިވެސް ބައިވެރި ނުވެ ކަމަށާއި މެޗަށް ނެރުނީ އެނޫން އެހެން ގޮތެއް ނެތުމުން ކަމަށެވެ. އެއީ މެޗު ގެއްލިޖެނަމަ ވިކްޓަރީ އަށް ކުރިއަށްދާން އުނދަގޫވިސް ކަމަށެވެ.
މެޗުގެ 30 ވަނަ މިނެޓްގައި ވިކްޓަރީން ވަނީ ލީޑް ނަގާފަ އެވެ. އެ ލަނޑު އެޓީމަށް ކާމިޔާބު ކޮށްދިނީ ބިދޭސީ ފޯވަޑް ކެރިކް އެންޑްރިޖް އެވެ.
ފުރަތަމަ ހާފަު، ވިކްޓަރީން ލީޑްގައި އެވެ ނިންމާލި ނަމަވެސް، ދެ ވަނަ ހާފު ފެށުނު ތަނުން، އޮމަޑޫ ގޮޑްފްރޭ ވެސްޓް ވަނީ ވެލެންސިއާ އަށް ނަތީޖާ ހަމަހަމަ ކޮށްދީފަ އެވެ.
މެޗުގެ 59 ވަނަ މިނެޓްގައި، އަލުން ވިކްޓަރީއަށް ލީޑް ނަގައިދިނީ ކެޕްޓަން އިސްމާއީލް އީސާ (މެސީ) އެވެ. ވިކްޓާރީގެ ތިން ވަނަ ލަނޑަކީ އެޓީމުން އުފެއްދި ހަމަލާއެއްގައި، ވެލެންސިއާގެ ޑިފެންޑަރު ޝާފިއު އަހްމަދު އަތުން ބައިކޮޅަށް ވަން ލަނޑެކެވެ.