ބްލޮގަރު އަދި ސޯޝަލް މީޑިއާ އެކްޓިވިސްޓް ޔާމީން ރަޝީދަށް ބަޔަކު ހަމަލާދީ ރަހުމް ކުޑަކޮށް މަރާލި މައްސަލާގެ ތަހުގީގު އަވަސްކޮށް ދިނުމަށް އެދި އާއިލާއިން ފުލުހަށް 800 ސިޓީ ހުށަހަޅައިފި އެވެ.
ޔާމީނަށް އިންސާފު ހޯދަ ދިނުމަށް އެދި އާއިލާގެ ފަރާތުން ފުލުހަށް މިއަދުސިޓީތައް ހުށަހެޅީ އޭނާގެ ބައްޕަ ހުސެން ރަޝީދެވެ. އެ ސަރަހައްދުގައި ހުރެ ނޫސްވެރިންނާ ވާހަކަދައްކަމުން ހުސެން ބުނީ އެފަދަ މަރުގެ މައްސަލަތަކުގެ ތަހުގީގު މީގެ ކުރިން ހިނގާފައި ހުރި ގޮތްތަކާ މެދު ކަނބޮޑުވާ ކަމަށާއި އެހެންކަމުން ޔާމީން މަރުގެ މައްސަލާގައި ބޭރުގެ އިންވެސްޓިގޭޓަރުން ހިމަނައިގެން ތަހުގީގުކޮށްދިނުމަށް އެދިފައިވާ ކަމަށެވެ.
"އަޅުގަނޑުމެން ބޭނުން ވަނީ ޔާމީންގެ މައްސަލާގެ ތަހުގީގު ވީހާވެސް އަވަހަށް ނިމުމަށް. ނަމަވެސް މިހާތަނަށް އެއްވެސް ކުރިއެރުމެއްގެ ވާހަކަ ފުލުހުން ހިއްސާކޮށްފައެއް ނުވޭ. އެ ފަރާތްތަކުން ވިދާޅުވަނީ ހުއްޓުމެއް ނެތި ޔާމީން މަރާލި މީހުން ހޯދަމުން އަންނަ ކަމަށް،" ހުސެން ބުންޏެވެ.
އެކި ފަހަރުގެ މަތިން މަރުގެ އިންޒާރު ދިނުމަށް ފަހު ހަށިގަނޑުގެ އެކި ތަންތަނަށް ހަމަލާ ދީ މަރާލާފައި އޮއްވާ ފެނުނީ މިދިޔަ މަހުގެ 22 ވަނަ ދުވަހުގަ އެވެ. އެ މައްސަލާގައި ފުލުހުން ވަނީ ޔާމީން މަރާލި ކަމަށް ބެލެވޭ ބައެއް ހަރަކާތްތެރިވާ ފޮޓޮއެއް އާންމުކޮށްފަ އެވެ. ނަމަވެސް އިތުރު ތަފްސީލެއް ފުލުހުން ނުދެއްވަ އެވެ. ޔާމީން މަރުގެ މައްސަލާގައި އިއްޔެގެ ވަގުތެއްގައި ފުލުހުން ވަނީ މީހަކު ހައްޔަރުކޮށްފަ އެވެ. ނަމަވެސް އެއީ ސީދާ ޔާމީން މަރާލި މީހާ ކަމެއް ފުލުހުން ސާފެއް ނުކޮށްދެ އެވެ.