ކުރިން އޮތް އެކުވެރިކަން އެ ގޮތުގައި ދަމަހައްޓައިދޭތޯ އާދޭސް ނުކުރާނެ ކަމަށް ބުނެ، އުތުރު ކޮރެއާއިން ޗައިނާއަށް ފާޑުކިޔައިފި އެވެ.
އުތުރު ކޮރެއާގެ ރަސްމީ މީޑިއާ ކޭސީއެންއޭ އިން އިއްޔެގައި ޝާއިއު ކުރި ލިއުމެއްގައި ބުނެފައި ވަނީ އުތުރު ކޮރެއާގެ ނިއުކްލިއަ މަޝްރޫއާ ގުޅިގެން އެ ގައުމަށް ދަތި ކުރުމަށް މިހާރަށް ވުރެ ހަށުކަށި ފިޔަވަޅުތައް އަޅަން ޗައިނާގެ ރަސްމީ މީޑިއާއިން ގޮވައިލުމަކީ ދެ ގައުމުގެ ގުޅުމަށް ބުރޫ އަރާނެ ކަމެއް ކަމަށެވެ. އަދި ބުނެފައި ވަނީ އުތުރު ކޮރެއާގެ ނިއުކްލިއަ މަޝްރޫއަކީ އެ ގައުމުގެ ދެމި އޮތުމާއި ތަރައްގީއާ ގުޅިފައިވާ ކަމެއް ކަމަށެވެ. އެހެންވީމާ އެ މަޝްރޫއަށް ލޮޅުމެއް އަރުވައި ނުލެވޭނެ ކަމަށް ވެސް އުތުރުކޮރެއާގެ ލިއުމުގައި ބުނެފައި ވެއެވެ. އަދި ބުނެފައި ވަނީ އެމެރިކާއިން ކޮރެއާ ސަރަހައްދަށް އަސްކަރީ އާލާތްތައް ޖަމާކުރާތީ އުފެދިފައިވާ ނުތަނަވަސް ކަމަކީ އުތުރު ކޮރެެއާގެ ސަބަބުންވާ ކަމެެއް ކަމަށް ހަދަން ޗައިނާއިން މަސައްކަތްކުރާ ކަމަށެވެ.
"ޗައިނާއާ އެކު ރަހުމަތްތެރިކަން ދަމަހައްޓަން ޑީޕީއާރްކޭ އިން އާދޭހެއް ނުކުރާނެ،" އުތުރު ކޮރެއާގެ ދައުލަތުގެ މީޑިއާގެ ލިއުމުގައި ބުނެފައި ވެއެވެ.
އުތުރު ކޮރެއާއިން އިންޒާރުކޮށްފައި ވަނީ ދަތި ކުރުމުގެ ފިޔަވަޅުތައް އެޅުމަށް ކޮންމެ ދުހަކު ގޮވާލައި، އެ ގައުމަށް ފިއްތުންތައް އިތުރު ކުރަން މަސައްކަތް ކުރުމުން މަޝްރަހު ވާނީ އިތުރަށް ގޯސް ކަަމަށެވެ.
ބައިނަލް އަގުވާމީ ގޮތުން ވަރަށް ބޮޑަށް އެކަހެރިވެފައި އޮތް އުތުރު ކޮރެއާއާ ގުޅުން ބާއްވަމުން އައި ހަމަ އެކަނި ބޮޑު ބާރަކީ ކުރިން ޗައިނާ އެވެ. ނަމަވެސް މިފަހަރު އެމެރިކާއާ އުތުރު ކޮރެއާއާ ދެމެދު އުފެދުނު ޒުވާބުގައި ޗައިނާއިން ވަނީ ބޮޑަށް އެމެރިކާ ފަޅިއަށް ޖެހިފަ އެވެ. ނަމަވެސް އުތުރު ކޮރެއާ ދެކޮޅަށް އަސްކަރީ ފިޔަވަޅެއް އަޅަން ޗައިނާއިން އަދިވެސް އަންނަނީ ދެކޮޅު ހަދަމުންނެވެ.
އުތުރު ކޮރެއާއާ އެމެރިކާއާ ދެމެދު ހިނގާ ޒުވާބު ހޫނުވީ އުތުރު ކޮރެއާއިން ބެލިސްޓިކް މިސައިލްތައް ޓެސްޓް ކުރުން ފަހަކަށް އައިސް އިތުރު ކުރުމުންނެވެ. ކޮރެއާ މައްސަލައިގައި އެމެރިކާއަށް ތާއީދު ކުރަނީ ޖަޕާނާއި ދެކުނު ކޮރެއާއިންނެވެ. އެކަމުގައި މިފަހަރު އެމެރިކާއާ ގުޅިގެން މަސައްކަތް ކުރާނެ ކަމަށް ޗައިނާއިން ވެސް ވަނީ ބުނެފަ އެވެ. ނަމަވެސް އެ ގައުމުން އެންމެ ފަހުން ކުރި ގިނަ ޓެސްޓްތައް ވަނީ ނާކިޔާބު ވެފައެވެ. އުތުރު ކޮރެއާއިން މިދިޔަ އަހަރު ނިއުކްލިއަ ޓެސްޓްތަކެއް ވެސް ކުރިއެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ އުތުރު ކޮރެއާއިން އެމެރިކާއަށް ނިއުކްލިއަ ހަމަލާއެއް ދިނުމުގެ ފުރުސަތު ނުދެއްވާނެ ކަމަށެވެ. ކޮރެއާ ހުއްޓުވަން ކޮންމެ ފިޔަވަޅެއް ވެސް އަޅަން އެމެރިކާ ތައްޔާރަށް އޮތް ކަމަށާއި އޭގެ ތެރޭގައި އަސްކަރީ ފިޔަވަޅު ވެސް ހިމެނޭ ކަަމަށެވެ. .- ރޮއިޓާސް
އުތުރުކޮރެއާގެ ދިދަތަކުން ޒީނަތްތެރިކޮށްފައިވާ މަގެއް. ފޮޓޯ: ރޮއިޓާސް