އިންޑިއާގެ ފުޓްބޯޅަ ލީގުގެ އޮނިގަނޑަށް ގެންނަން ހުށަހަޅާފައިވާ ބަދަލާއެކު، އަންނަ ސީޒަންގައި ފުރަތަމަ ޑިވިޝަންގައި ވާދަ ކުރުމުގެ ފުރުސަތު ނުލިބިއްޖެ ނަމަ، ހައިހޫނުކަމުގެ ހަޅުތާޅެއް ފަށާނެ ކަމުގެ އިންޒާރު އިންޑިއާ ލީގުގެ އެންމެ ފަހުގެ ޗެމްޕިއަން އައިޒަވާލް އެފްސީން ދީފި އެވެ.
މިދިޔަ ސީޒަންގައި ރެލިގޭޓްވި ނަމަވެސް، ފުރަތަމަ ޑިވިޝަންގައި ވާދަކުރާ ޓީމުތައް ހަމަނުވުމުން އަލުން ފުރަތަމަ ޑިިވިޝަނުން ޖާގަ ލިބުނު އައިޒަވާލް، މި އަހަރު އިންޑިއާ ލީގުގެ ޗެމްޕިއަންކަން ހޯދީ އިންޑިއާގެ ފުޓްބޯޅައިގެ އާއިލާ ސިއްސުވާލުމަށް ފަހު އެވެ. އެ ކްލަބުން ލީގު ޗެމްޕިއަންކަން ހޯދީ އިންޑިއާ ފުޓްބޯޅަައިގެ ގަދަ ބާރުތައް ކަމަށްވާ މޯހަން ބަގާން އާއި ބެންގަލޫރު އަދި އީސްޓް ބެންގާލް ފަހަތަށް ޖައްސާލުމަށް ފަހު އެވެ.
މިދިޔަ އޯލް އިންޑިއާ ފުޓްބޯޅަ ފެޑެރޭޝަން (އޭއައިއެފްއެފް) އިން ވަނީ އިންޑިއާގެ ފުޓްބޯޅަ ލީގުގެ އޮނިގަނޑަށް 2017 / 2018 ވަނަ އަހަރުގެ ފުޓްބޯޅަ ސީޒަނަށް ބަދަލު ގެންނަން ހުށަހަޅައިފި އެވެ. ހުށަހަޅާފައިވާ ބަދަލު ފާސްވެއްޖެ ނަަމަ، މިހާރު އިންޑިއާ ފުޓްބޯޅައިގެ ފުރަތަމަ ޑިވިޝަން ކަމަށްވާ އައި ލީގާއި 2014 ވަނަ އަހަރުން ފެށިގެން ކުރިއަށް ގެންދާ އިންޑިއަން ސުޕަ ލީގު އެއްކޮށްލާނެ އެވެ.
އޭރުން އިންޑިއާގެ ފުރަތަމަ ޑިވިޝަނަށް ވާނީ އިންޑިއަން ސުޕަ ލީގެވެ. އިންޑިއާގެ ފުޓްބޯޅައިގެ ފޯރި ގަދަ ކުރުމަށް 2014 ވަނަ އަހަރު ފެށި ސުޕަ ލީގަކީ މިހާތަނަށް އޭއެފްސީން ރަސްމީކޮށް ބަލައިގަތް މުބާރާތެއް ނޫނެވެ.
ދެ ލީގު އެއްކޮށްލައިފި ނަމަ އަންނަ ސީޒަންގައި އައިޒަވާލް އަށް ފުރަތަމަ ޑިވިޝަނުން ޖާގަ ނުލިބުމުގެ ފުރުސަތު ބޮޑެވެ. އިންޑިއާ ސުޕަ ލީގުގައި މިހާރު ވާދަކުރާ އަށް ޓީމާއެކު، އޭއައިއެފްއެފް އިން ހުށަހަޅާފައިވަނީ މި ވަގުތު އައި ލީގުގައި ވަރުގަދަ ޓީމުތަކަށް އަލަށް ތައާރަފްކުރާ ފުރަތަމަ ޑިވިޝަނުން ޖާގަ ދިނުމަށެވެ. ރިޕޯޓްތައް ބުނާ ގޮތުގައި އިންޑިއާގެ ވަރުގަދަ ކްލަބުތައް ކަމަށްވާ މޯހަން ބަގާން އާއި ބެންގަލޫރު އަދި އީސްޓް ބެންގާލްއާއެކު އޭއައިއެފްއެފް އިން ވަނީ އާ ލީގާ ގުޅުމާ ބެހޭގޮތުން މަޝްވަރާ ކޮށްފަ އެވެ. އެންމެ ފަހުގެ ލީގު ޗެމްޕިއަން އައިޒަވާލްއާ އެކަމާ ގުޅޭގޮތުން މަޝްވަރާއެއް ނުކުރެ އެވެ.
މިކަމާ ހިތްހަމަނުޖެހިގެން އައިޒަވާލް އިން ނެރުނު ބަޔާނެއްގައި ބުނެފައިވަނީ އަންނަ ސީޒަންގައި ފުރަތަމަ ޑިވިޝަންގެ ތަށި ދިފާއު ކުރުމުގެ ފުރުސަތު ޔަގީން ކުރުމަށް ރަސްމީކޮށް ކުރަންޖެހޭ ހުރިހާ މަސައްކަތެއް ކުރާނެ ކަމަށެވެ. އަދި އެ މަސައްކަތްތައް ކާމިޔާބުނުވެއްޖެ ނަމަ، ހައިހޫނުކަމުގެ ހަޅުތާޅަކަށް ނުކުންނަން ފަސްނުޖެހޭނެ ކަމަށެވެ.
"އޭއައިއެފްއެފް އިން އަހަރަމެންނަށް އެދެވޭ ޖަވާބެއް ނުލިބިއްޖެ ނަމަ، މި ކްލަބުން ސްޕޯޓްސް މިނިސްޓަރާއި ޕްރައިމް މިނިސްޓަރު އަދި އޭއެފްސީގެ ރައީސަށް ވެސް މި މައްސަލަ ހުށަހަޅާނަން،" އައިޒަވާލް އިން ނެރުނު ބަޔާނެއްގައި ބުނެފައިވެ އެވެ. "ރަސްމީ ސިފައެއްގައި މި ކްލަބުން ހުށަހަޅާފައިވާ މައްސަލަ އަށް ހައްލެއް ނުލިބިއްޖެ ނަމަ، ދުނިޔޭގެ އެކި ކަންކޮޅުތަކުގައި، އޭއެފްސީ އާއި ފީފާގެ އޮފީސްތައް ދޮށުގައި މުޒާހަރާއަށް ނިކުންނާނަން. އަދި މި ކްލަބުން ހައިހޫނުކަމުގެ ހަޅުތާޅަކަށް ވެސް ނުކުތުމަށް ފަސް ނުޖެހޭނެ."
އާދައިގެ ޓީމެއްގެ ގޮތުގައި 2016 / 2017 ވަނަ އަހަރުގެ ސީޒަނަށް ނިކުތް އަައިޒަވާލް އިން ލީގު ޗެމްޕިއަންކަން ހޯދިއިރު، އެ ޓީމުގައި އިންޑިއާގެ ނަން މަޝްހޫރު ކުޅުންތެރިންތަކެއް ނެތެވެ. އަދި އިންޑިއާގެ ބޮޑެތި ކްލަބުތަކާ އަޅާބަލާއިރު، އައިޒަވާލް އިން ސްކޮޑް އެކުލަވާލައިފައިވަނީ ނިސްބަތުން ވަރަށް ކުޑަ ބަޖެޓެއްގަ އެވެ.
އައިޒަވާލްގެ ކުޅުންތެރިން އައި ލީގުގެ ތައްޓާއެކު އުފާފާޅުކުރަނީ. -- ފޮޓޯ: ހިންދުސްތާާން ޓައިމްސް