މާލޭ ސިޓީ ކައުންސިލްގެ ވާހަކައެއް އެއްވެސް އެ ކައުންސިލްގެ ދައުރުގެ ވާހަކައެއް މިހާރު އަޑެއް ނީވެ އެވެ. ރަށްރަށުގެ ކައުންސިލުން މަސައްކަތް ކުރާ މިންވަރާ ގާތަށް ވެސް މާލޭ ސިޓީ ކައުންސިލުން މަސައްކަތް ކުރާ ތަނެއް ނުފެނެ އެވެ. އެ ކައުންސިލުން އެއްވެސް މަސްއޫލިއްޔަތެއް އަދާ ކުރާ ތަނެއް މިހާރަކު ނުފެނެ އެވެ. މިއީ ކޮން ބޭނުމެއް އޮތް ކައުންސިލްތަކެއްތޯ މިހާރު ސުވާލު އުފެދެނީ އެހެންވެ އެވެ.
ވިލިމާލެ ދާއިރާގެ މެންބަރު އަހުމަދު ނިހާން ހުސެއިން މަނިކު ވިދާޅުވީ، ކައުންސިލްތައް އުފެއްދީ، ސަރުކާރުން ހިންގާ މަޝްރޫއުތައް ކުރިއަށް ދަނީ ރަނގަޅަށްތޯ ބަލައި އެކަން ރައްޔިތުންނާ ހިއްސާކުރުމަށް ކަމަށެވެ. އަދި، އެ ކަންކަމަށް މަގު ފަހިކޮށްދީ އެއްބާރުލުން ދިނުމަށް ކަމަށެވެ. ރައްޔިތުންނަށް ދިމާވެފައިވާ ދަތިތައް ހައްލުކުރުމަކީ ވެސް ކައުންސިލަށް އޮތް ޒިންމާއެއް ކަމަށެވެ. ނިހާން ވިދާޅުވީ، މި ހުރިހާ ކަމެއްގައި ވެސް މާލޭ ސިޓީ ކައުންސިލް ފެއިލްވެފައިވާ ކަމަށެވެ.
ކުރިން ވަރަށް ގިނަ މަސްއޫލިއްޔަތުތަކެއް މާލޭ ސިޓީ ކައުންސިލަށް މަތި ކޮށްފައިވީ ނަމަވެސް އެ މަސްއޫލިއްޔަތުތައް ސަރުކާރުން ވަނީ އެ ކައުންސިލުން އަތުން ނަގާފަ އެވެ. އެކަމާ ގުޅިގެން އެ ކައުންސިލްގެ ބައެއް މެންބަރުން ދިޔައީ ކައުންސިލްގެ ބާރުތައް ސަރުކާރުން "ފޭރިގަނެ" ބާރު ކަނޑުވާލީ ކަމަށް ވިދާޅުވަމުންނެވެ. އެކަމަކު ސަރުކާރުން ބުނަނީ ކައުންސިލް އަތުން ޒިންމާތައް ނެގީ ޒިންމާ އަދާނުކުރެވޭތީ ކަމަށެވެ.
"17 ވަނަ މަޖިލީހުގައި އޭރު އެމްޑީޕީގެ ސަރުކާރުގައި އޮތްއިރު ސިޓީ ކައުންސިލަށް އަޅުގަނޑު ތަކުރާރުކޮށް ދިޔައީ އަޅުގަނޑުގެ ސަރަހައްދުގައި ބާއްވާފައި އޮތް ކުނި ބާޖެއްގެ މައްސަލައިގެ ހައްލު ހޯދުމަށް މަސައްކަތް ކުރަމުން، މިއީ އެންމެންގެ ކުރިމަތީގައި ރޯމާ ދުވާލު ހިނގި ކަމެއް، އެކަމެއް ހައްލެއް ނުލިބުނު،" ނިހާން ވިދާޅުވި އެވެ.
ނިހާން ވިދާޅުވީ، މާލެއަށް ދިމާވެފައިވާ ކުނީގެ މައްސަލައާއި މަގުގައި ފެން ހެދޭ މައްސަލަ އާއި މަގުތައް ތޮއްޖެހުމުގެ މައްސަލަތައް ފަދަ މައްސަލަތަކީ ރައީސް ހައްލު ހޯދައިދެއްވަން ޖެހޭ ކަންކަމަށް ވާނަމަ ކައުންސިލަރުންގެ ބޭނުމެއް ނެތް ކަމަށެވެ. ކައުންސިލްގެ ގާނޫނު ހެދުމުގެ މަގުސަދު ގެއްލިގެންދާ ކަމަށެވެ.
މާލޭއަށް ދިމާވެފައިވާ ދަތިތައް އިތުރަށް ބޮޑުވެ، އެކަންކަން ހައްލު ނުވާ ކަމުގެ ޝަކުވާ ފުލުފުލުގައި ސަރުކާރާ ހަމައަށް ދިޔުމުން މަޖުބޫރުވީ އެ މަސްއޫލިއްޔަތުގެ ޒިންމާ ސަރުކާރަށް ނެގުމަށެވެ. ކައުންސިލް އަތުން ބާރުތައް ނަގައިގެން ނަމަވެސް މައްސަލަތަކަށް ހައްލު ހޯދައިދިނުމަކީ މުހިންމު ކަމެއް ކަމަށްވާތީ އެވެ.
"މާލޭގެ ކުނީގެ ނިޒާމާ ވެސް މާލޭގެ ފެން ހިންދުމުގެ ނިޒާމާ ވެސް ސަރުކާރުން ހަވާލުވީ ކައުންސިލުން އެކަމަށް އިޖާބަ ނުދެއްވީމަ، އެހެންވީމަ ކިހިނެއްތޯ މިވަނީ، ލާމަރުކަޒީ ނިޒާމުން ކަންކަން ކުރުމަށް އަޅުގަނޑުމެން ފެން ބޮވައިގެންފައި ތިބި ނަމަވެސް އެކަންކަން ނުވުމުން ސަރުކާރުން ހުރިހާ ކަމެއް ކުރަންޖެހޭ ހިސާބަށް މި ދަނީ، މުސާރަ ބަރާބަރަށް ލިބޭ، އެކަމަކު ކަންކަން ނުކުރެވޭ ކަމުގެ ޒިންމާ އެހެން މީހުންނަށް ދިއްކުރާއިރު ހަވާލުކުރެވިފައި ހުރި ޒިންމާ އުފުލުނީ ކިހާ ވަރަކަށްތޯ ހިތާ ހިތާ އަމިއްލަ ނަފްސާ ސުވާލުކޮށްލިތޯ؟ ނުކުރޭ،" ރައީސް އަބްދުﷲ ޔާމީން ވިދާޅުވި އެވެ.
ކުނީގެ މައްސަލަ ބޮޑުވެގެން ސިޓީ ކައުންސިލްގެ "ބޯމަތިން" އެ މައްސަލަ ދިޔުމުން އެކަމާ ވަނީ ހައުސިން މިނިސްޓްރީން ހަވާލުވެފަ އެވެ. އަދި ވިލިމާލެ ޓާމިނަލް ސަރަހައްދުގައި އޮތް ކުނި ބާޖް ވެސް ވަނީ އެހެން ސަރަހައްދަކަށް ގެންގޮސްފަ އެވެ. އަދި ސަރުކާރުގެ ކުންފުންޏެއް ކަމަށް ވެމްކޯއާ ވަނީ މާލޭގެ ކުނި މެނޭޖްކުރުމުގެ މަސައްކަތް ހަވާލުކޮށްފަ އެވެ. އެ ކުންފުނިން ދަނީ އެކަން ވަރަށް ރަނގަޅަށް ކުރަމުންނެވެ. ދެން ވެސް މާލޭގައި ހުރި މިފަދަ އެހެން މައްސަލަތަކުގެ މަސްއޫލިއްޔަތު މިހާރު ނަގަމުން އަންނަނީ ހައުސިން މިނިސްޓްރީންނެވެ. އެހެން ކަމުން ސިޓީ ކައުންސިލްގެ ބޭނުމެއް ނެތެއް ނޫން ހެއްޔެވެ؟ ނޫނީ ސިޓީ ކައުންސިލަށް ބޮޑު ބަދަލެއް ބޭނުން ނުވޭ ހެއްޔެވެ؟ ކައުންސިލަށް ބޭނުން ވަނީ ކޮން ކަހަލަ ކައުންސިލަރުންނެއް ހެއްޔެވެ؟
"ރައީސްގެ ހިޔާލާއި ފިކުރާ ތަފާތުކޮށް ކައުންސިލަރުން ހޮވީމަ ދިމާވާ ކަންތައްތަކުގެ ވާހަކަ އަހާ ކޮޅުން ނުލާނެ، އެހެން ހުރި ތަންތަން، އެ ތަންތަނަށް އަންނަންޖެހޭ ތަރައްގީ އައުމުގައި ލަސްތަކެއް އެ ހުރީވެފަ، އަދިވެސް އެ ހުރީ އެއަށް ކުދިކުދި ރަށްރަށުގަ ބަށި ކޯޓާއި ފުޓްސަލް ދަނޑާ އަޅާ ފުރިހަމަވެފަހުރި އިރު ވެސް އަދިވެސް އެ ހުރީ ބިން ކަޑައިނުދީ ހުރި ތަންތާ އެ ހުރީ ފުޓްސަލް ދަނޑުތައް ނޭޅި،" ރައީސް ވިދާޅުވި އެވެ. "ކައުންސިލަރުންނަކީ އެއްގޮތަކަށް ވެސް ގައުމުގެ ތަރައްގީއަށް ހުރަސް އަޅަން ތިބި ބައެއް ނޫން، މި ގައުމަށް ލިބޭ ނަފައަކީ އެންމެން ހިއްސާވާ އެއްޗެއް، އެހެންވީމަ ރަށަކަށް އަންނަ ތަރައްގީއަށް ރައްޔިތުން އިތުބާރު ކޮށްފަ ހޮވާފަ ހުންނަ ކައުންސިލަރަކު ކީއްވެތޯ ދެކޮޅު ހަދަންވީ؟، އެއީ އެއް ނޫން ލާމަރުކަޒީ ނިޒާމުން ހިންގުމަކީ،"