މާދަމާ ބާއްވާ ލޯކަލް ކައުންސިލް އިންތިހާބަށް ތައްޔާރުވުމަށްޓަކައި ކުރަންޖެހޭ ހުރިހާ މަސައްކަތެއް ނިމިފައިވާ ކަމަށާއި އިންތިހާބު ފެށިގެން އޮމާން ކަމާއެކު ނިންމާލެވޭނެ ކަމަށް އިލެކްޝަން ކޮމިޝަންގެ މެންބަރު އަހުމަދު އަކްރަމް ވިދާޅުވެއްޖެ އެވެ.
އަކްރަމް ވިދާޅުވީ ކައުންސިލް އިންތިހާބަށް ހުރިހާ އަތޮޅުތަކަށާއި ރަށްތަކަށް ފޮނުވަން ޖެހޭ ވޯޓު ފޮށިތަކާއި ވޯޓު ކަރުދާސްތައް ފޮނުވުމާއި އެއާ ގުޅިގެން ކުރަން ޖެހޭ އެހެން މަސައްކަތްތައް ވެސް ނިންމާލާފައިވާ ކަމަށެވެ. އަދި މިހާތަނަށް އައިއިރު ހަތަރު މައްސަލައެއް ހުށަހެޅިފައިވާ ކަމަށާއި ނަމަވެސް އެކަންތައް ވެސް ހައްލުކޮށްފައިވާ ކަމަށް އަކްރަމް ވިދާޅުވި އެވެ.
"އަދި މިހާތަނަށް ނެތް އެއްވެސް މައްސަލައެއް ނެތް. ހުރިހާ ކަމެއް ދަނީ ރަނގަޅަށް އިރާދުކުރެއްވީޔާ އިންތިހާބު ކަންތައް މާދަމާ ފަށައިގަނެ ވަރަށް އޮމާންކަމާއެކު ކުރިޔަށް ގެންދެވޭނެ،" އަކްރަމް ވިދާޅުވި އެވެ.
މާދަމާ ބާއްވާ އިންތިހާބުގައި ކައުންސިލްތަކުގެ 664 ގޮނޑިއަށް 1496 ކެނޑިޑޭޓުން ވާދަކުރާނެ އެވެ. އެގޮތުން ޕީޕީއެމްއިން 521 ކެނޑިޑޭޓުންނާއި، އެމްޑީޕީއިން 469 ކެނޑިޑޭޓުންނާއި، ޖުމްހޫރީ ޕާޓީން 93 ކެނޑިޑޭޓުން އަދި އެމްޑީއޭއިން 49 ކެނޑިޑޭޓުންނާއި ޑީއާރްޕީއިން އެއް ކެނޑިޑޭޓަކު ވާދަ ކުރާ އިރު އަމިއްލަ ގޮތުން ވާދަ ކުރައްވަނީ 363 ކެނޑިޑޭޓުނެވެ. އަދި ވޯޓު ލުމުގެ ހައްގު ލިބިފައި ވަނީ 255،987 މީހުންނަށެވެ.
ކައުންސިލް އިންތިހާބަށް ކެމްޕެއިން ކުރުމުގެ ވަގުތު މިރޭ 6:00 އިރު ވަނީ ހަމަވެފަ އެވެ. އަދި ވޯޓުލުން ކުރިޔަށް ދާ ހުރިހާ ރަށްރަށެއްގެ ސަލާމަތީ ކަންކަން ބަލަހައްޓުމަށް ފުލުހުން އަންނަނީ "ދިހި" ގެ ނަމުގައި އޮޕަރޭޝަނެއް ފަށާފަ އެވެ.