ފްރާންސްގައި މާދަމާ ބާއްވާ އެ ގައުމުގެ ރިޔާސީ އިންތިހާބުގެ ދެވަނަ ބުރު ކާމިޔާބު ކުރައްވާނެ ކަމަށް އެންމެ ބޮޑަށް ބެލެވޭ ކެންޑިޑޭޓް އިމެނުއަލް މެކްރޯންގެ ކެމްޕޭން އީމެއިލްތައް ހެކްކޮށް އިންޓަނެޓްގައި ލީކްކޮށްލައިފި އެވެ.
ރޮއިޓާސް ބުނީ މެކްރޯންގެ ކެމްޕޭންއާ ގުޅޭ މައުލޫމާތުތައް ހިމެނޭ ނުވަ ގިގަބައިޓްގެ ޑޭޓާ ކާކުކަން ނޭނގޭ ގޮތަށް ލިޔެކިއުން ހިއްސާ ކުރެވޭ ވެބްސައިޓެއް ކަމަށްވާ ޕެސްޓަބިންއަށް އަޅާފައިވާ ކަމަށެވެ. އަދި ބުނީ އެ ލިއުންތައް އަޅާފައި ވަނީ "އެމްލީކްސް" ގެ ނަމުގައި ހިންގާ އެކައުންޓަކުން ކަމަށެވެ.
މެކްރޯންގެ އަން މާޝް ޕާޓީން ވަނީ އެ ޕާޓީގެ އެކައުންޓްތައް ހެކްކޮށްފައިވާކަން ރޮއިޓާސްއަށް ކަށަވަރުކޮށްދީފަ އެވެ. އެޕާޓީން ބުނެފައި ވަނީ އެޕާޓީގެ އެތެރޭގެ މައުލޫމާތުތަކެއް ބަޔަކު ހެކްކޮށް އާއްމުކޮށްފައިވާ ކަމަށެވެ.
ފްރާންސްގެ އިންތިހާބުގައި ކެމްޕޭންކުރުން މަނާ ވަގުތު ޖެހިފައި ވާތީ އެކަމާ ބެހޭ ގޮތުން ބަހެއް ބުނަން އެގައުމުގެ އިންޓީރިއާ މިނިސްޓްރީން ވަނީ ދެކޮޅުހަދާ ފައެވެ. ފްރާންސްގެ އިންތިހާބުގައި ކެމްޕޭން ކުރުން މަނާ ވަގުތު ޖެހިފައި ވަނީ ހުކުރު ދުވަހުގެ ރޭ ޖީއެމްޓީ ގަޑިން 8.00 ގައެވެ.
ފްރާންސްގެ އިލެކްޝަން ކޮމިޝަނުން ބުނެފައި ވަނީ ހެކްކުރިކަމުގެ މައުލޫމާތު މެކްރޯންގެ ކެމްޕޭންޓީމުން ދީފައި ވާތީ އެކަމާ ބެހޭ ބައްދަލުވުމެއް ފަހުން ބާއްވާނެ ކަމަށެވެ. ލީކްކޮށްލާފައިވާ އީމެއިލްތަކާ ބެހޭ މައުލޫމާތު އާއްމު ނުކުރުމަށް ފަރުވާތެރިވުމަށް އެކޮމިޝަނުން ވަނީ ގޮވާލާފައެވެ. ކެމްޕޭން ކުރުމުގެ މުއްދަތު ހަމަވެފައި ވާތީ އެ އީމެއިލްތަކާ ބެހޭ މައުލޫމާތު އާއްމުކުރުން ވާނީ ގާނޫނާ ހިލާފު ކަމަކަށެވެ.
ލީކްކޮށްލާފައިވާ އީމެއިލްތަކާ ބެހޭ މައުލޫމާތުތައް އާއްމުވާން ފެށީ ހުކުރު ދުވަހު، ކެމްޕޭން ކުރުމުގެ މުއްދަތު ހަމަވުމުގެ ގަޑިއިރުތަކެއް ކުރިންނެވެ.
ފްރާންސްގައި ނެގި ހިޔާލުހޯދުމުގެ ޕޯލްތަކުގެ ނަތީޖާ ދައްކާ ގޮތުން ފްރާންސްގެ ރިޔާސީ އިންތިހާބު ކާމިޔާބުކުރައްވާނެ ކަމަށް ބެލެވިފައި ވަނީ މެކްރޯންއެވެ. އޭނާ އެ އިންތިހާބު ކާމިޔާބުކުރައްވާނެ ކަމަށް ބެލެވިފައި ވަނީ 64 ޕަސެންޓް ވޯޓުންނެވެ. އިންތިހާބުގައި އޭނާ ވާދަކުރައްވަން ޖެހިވަޑައިގެންފައި ވަނީ ކަނާތު ފިޔައިގެ ހަރުކަށި ކެންޑިޑޭޓް މެރިން އެ ލިޕެންއާއެވެ.
ފްރާންސްގެ ރިޔާސީ ކެންޑިޑޭޓް އިމެނުއަލް މެކްރޯން. އޭނާގެ ކެމްޕޭނުގެ އީމެއިލްތައް ވަނީ ހެކްކޮށްފައި. ފޮޓޯ: ރޮއިޓާސް