"އަޅުގަނޑަކަށް ނުބުނެވޭނެ، ގްރީން ސްޓްރިޓުން މިވެނި މުބާރާތެއް ކާމިޔާބު ކުރާނަމެކޭ، އަޅުގަނޑަށް އޮންނާނީ މަސައްކަތް ކުރުން، އެންމެ ފުރަތަމަ މިނެޓުން އެންމެ ފަހު މިނެޓަށް ވެސް މަސައްކަތް ކުރާނަން،" މިއީ މާލޭ ލީގްގެ ނިމިދިޔަ ފުރަތަމަ ބުރުގައި، މެޗުގެ ކުރިން އަދި މެޗު ފަހުން އޮންނަ ކޮންމެ ޕްރެސްއެއްގައިހެން ގްރީން ސްޓްރިޓްގެ ކޯޗް ސޮބާހް މުހައްމަދު މިޑިއާ ކުރިމަތީގައި ބުނާ ވާަހަކަ އެވެ.
ތެދެކެވެ. ސޮބާ މަސައްކަތް ކޮށްފި އެވެ. މުބާރާތުގައި، އެހެން ޓީމުތަކަށް ކުރިމަތި ލާން ޖެހުނު އެންމެ އުނދަގޫ ޓީމަކަށްވީ ގްރީން އެވެ. ވަރުގަދަ ނިއުރޭޑިއަންޓްގެ ކޯޗް ބެނާޑޯ ޓެވަރޭސްގެ ބަހަކީ ވެސް މިއެވެ.
"އެ ޓީމަކީ ބޯޅަ ނެތަސް ބުރަކޮށް މަސައްކަތް ކުރާ ޓީމެއް، އެހެންވެ ނިއު އިންވެސް އެކަމަށް ސަމާލުކަން ދޭނެ." ގްރީން ސްޓްރިޓާ ދެކޮޅަށް ނިއު ކުޅުނު މެޗުގެ ކުރިން މިޑިއާގައި ޓެވަރޭސް ބުނެފައި ވެއެވެ.
"އަޅުގަނޑުމެންގެ މާބޮޑު ސީކްރެޓެއް ނެތް، އަޅުގަނޑުމެންނަށް އޮންނާނީ މަސައްކަތް ކުރުން، ކުޅުންތެރިންނާއި އަޅުގަނޑާއެކު މަސައްކަތް ކުރާ ކޯޗިން ޓީމާއި މެނޭޖްމެންޓްގެ މަސައްކަތުން، އަޅުގަނޑުމެން މޮޅުވަނީ، އެއީ އަޅުގަނޑުމެންގެ ސީކްރެޓަކީ،" ސޮބާ ބުންޏެވެ.
ސޮބާއަށް އޮތް އެންމެ ބޮޑު އުފަލަކީ، އޭނާގެ ޓީމުގައި ތިބި ކުޅުންތެރިންނަކީ ބުރަކޮށް މަސައްކަތް ކުރާ ކުޅުންތެރިންނަށް ވާކަމެވެ. "ވަރަށް ބޮޑަށް ހިތްހަމަ ޖެހޭ މިކުޅުންތެރިންގެ މަސައްކަތާ މެދު އަޅުގަނޑަށް ލިބިފައި މިއޮތީވެސް ތަޖުރިބާ ކާރު ކުޅުންތެރިން ކޮޅަކާއި ޒުވާން ކުޅުންތެރިންތަކެއް އަދި އޭގެ ތެރެއަށް މަސައްކަތުގެ ރޭޓް ރަނގަޅު ބިދޭސީ ކުޅުންތެރިންތަކެއް، މި ހުރިހާ ކުޅުންތެރިންގެ މަސައްކަތާ މެދު އަޅުގަނޑު ސުވާލެއްވެސް އުފައްދާނެ ޖާގައެއް އެކުޅުންތެރިން ނުދޭ." ހިތްހަމަ ޖެހިފައި ހުރެ ސޮބާ ބުންޏެވެ.
ފުރަތަމަ ޑިވިޝަނަށް އަލަށް އައިސް، ވަރުގަދަ ޓީމުތަކާ ދެކޮޅަށް ރަނގަޅު ފައިޓެއްދީ ތާވަލުގެ ރަނގަޅު ހިސާބެއްގައި އޮތުމުގައި މެނޭޖްމެންޓުގެ މުހިންމު ދައުރެއް އެބައޮތެވެ. އެ ކުލަބުގެ ރައީސް ޝަޒީން ވިދާޅުވީ، ގްރީންގެ މެނޭޖެމްނެޓްގައި މަތީ މަގާމެއްގައި ހުރުމަކުން، ކުޅުންތެރިންނާ އޮންނަ ގުޅުން ލިމިޓް ކުރާނެ މީހަކު ނުހުންނާނެ ކަމަށެވެ.
"ތިބޭފުޅުންނަށް ފެންނާނެ އަޅުގަނޑު ކުލަބުގެ ރައީސްއޭ ކިޔާފައި ކުޅުންތެރިންނާ އޮންނަ ބޮންޑް ހަނި ނުވާނެ، ކުޅުންތެރިޔަކު ކަމެއް ބޭނުންވިޔަސް އެކުޅުންތެރިންނަށް ކެރޭނެ އަޅުގަނޑު ގާތުގައިވެސް ބުނަން، އަދި ޕްރެކްޓިސް ކުރާ ވަގުތު އަޅުގަނޑު ހުންނާނެ ކުޅުންތެރިންނަށް ހިތްވަރު ދޭން، މާ ބޮސް ވެފަ ހުންނަ މީހަކު މި ކުލަބުގައި މަސައްކަތެއް ނުކުރާނެ." ޝަޒީން ވިދާޅުވި އެވެ.
ކުރިއަށް އޮތީ ދެ ވަނަ ބުރެވެ. ފުރަތަމަ ބުރުގެ ނަތީޖާއިން އެއްވެސް ޓީމެއް ގްރީންއާ މެދު ފަސޭހަ ވިސްނުމަކުން ނުވިސްނާނެކަން ސޮބާ ބުންޏެވެ.