މެއި 27، 2015، އެއީ އިނގިރޭސި ފުޓްބޯޅައިގެ މިހާރުގެ ގަދަ ބާރެއް ކަމަށްވާ ޓޮޓެންހަމް އާ ދެކޮޅަށް، މެލޭޝިއާގައި، ރާއްޖޭގެ ގައުމީ ކެޕްޓަން އަލީ އަޝްފާގް ކުޅުނު ދުވަހެވެ. މުޅި ގައުމުގައި އެ ދުވަހު ބާރަށް ދެކެވެމުން ދިޔައީ ދަގަނޑޭގެ ވާހަކަ އެވެ. އެއީ ދުނިޔޭގެ އެއް ވަނަ ލީގްގެ ޓޮޕް ޓީމަކާ ދެކޮޅަށް ކުޅުނު ފުރަތަމަ ދިވެހި ކުޅުންތެރިޔާ ކަމަށް ވުމުން ނެވެ.
އެ ދުވަހު ޓޮޓެންހަމްއާ ދެކޮޅަށް ތަމްސީލު ކުރީ، މެލޭޝިއާގެ ޓީމެވެ. ނަަމަވެސް، މެލޭޝިއާގެ އެފްއޭގެ ހުއްދަ ލިބިގެން، މެލޭޝިއާގެ ގައުމީ ކޯޗް ސޮލާހް ދޮލާހް ދަގަނޑޭ އަށް އެމެޗުން ފުރުސަތު ދިނެވެ. މެލޭޝިއާގެ ޓީމުގައި ހިމެނިގެން ދަގަނޑޭ ތަމްސީލު ކުރީ ދިވެހި ގައުމެވެ. ސޯޝަލް މީޑިއާ އާއި ވައިބާ ގޫރޫޕްތަކުގައި އެދުވަހު މައުލޫއަކަށް އޮތީ ދަގަނޑޭގެ ވާހަކަ އެވެ. ދިވެހި ކުޅުންތެރިޔަކަށްޓަކައި، ރާއްޖޭގެ ބައެއް ޓީވީ ޗެނަލްތަކުން އެ މެޗު ވަގުތުން ދެއްކި އެވެ.
މިއީ އޭގެ ދެ އަހަރު ފަހެވެ. ހެދުނުގެ ކުރީ ކޮޅު، މަރުކަޒީ ބޭންކު (އެމްއެމްއޭ) އިން އާންމުކޮށް ދައްކާލ، ދިވެހި ފަސް ރުފިޔާގެ އާ ނޫޓް ލޯންޗު ކުރުމާއެކު، ދަގަނޑޭގެ ވާހަކަ ދެކެވެންފެށި އެވެ. ފަސް ރުފިޔާގެ އާ ނުޓްގައި އެވާ ކުޅުންތެރިޔާގެ މޫނު ނެތް ކަމަށްވިޔަސް، އަދި އެމްއެމްއޭއިން ރަސްމީކޮށް ނުބުނި މަމަވެސް އެ ފަރުމާއިން ރަމްޒުކޮށް ދެނީ، ދަގަނޑޭކަން ސާފު ވެއެވެ.
ދިވެހި އާންމު މީހާ އަތުގައި އެންމެ ގިނައިން ދައުރުވާނެ ދިވެހި ރުފިޔާގެ ޑިނޯމިނޭޝަންގައި، ރާއްޖޭގައި މިހާތަނަށް އުފެދުނު އެންމެ ކާމިޔާބު އެތުލީޓް ދަގަނޑޭ ރަމްޒު ކުރުމާއެކު، ހާއްސަ ޝަރަފެއް ލިބުނު ފުޓްބޯޅަ ތަރިއަކަށް ދަގަނޑޭ ވީއެވެ.
ދުނިޔޭގެ އުފެދުނު އެންމެ މޮޅު ކުޅުންތެރިޔާ ބްރެޒިލްގެ ޕެލޭ އަށް ވެސް މިފަދަ ޝަރަފެއް އެގައުމުން ލިބިފަ އެއް ނެތެވެ. ބްރެޒިލްގައި ޕެލޭއަށް ނިސްބަތްކޮށް، ބިނާތަކާއި އިމާރާތައް އެބަހުއްޓެވެ. އާޖެންޓީނާގައި ވެސް ޑިއޭގޯ މެރަޑޯނާގެ ނަމުން ނަންދީ އޭނާގެ ނަމަށް ނިސްބަތް ކުރާ އިމާރާތްތައް އެބަހުއްޓެވެ. ނަމަވެސް، އެގައުމުތަކުގެ ގާނޫނުން ހުއްދަދޭ، ލީގަލް ޓެންޑާއެއްގައި މިއިން ކުޅުންތެރިޔެއްގެ ރަމްޒެއް ނެތެވެ.
މީގެ އިތުރުން ކިރިގިސްތާނުން 2014 ވަނަ އަހަރު ނެރުނު ސްޓޭމްޕެއްގައި، ދަގަނޑޭގެ ފޮޓޯ ހިމނައިގެން، އެގައުމު އެ ސްޓެމްޕެއް ދައުރު ކޮށްފައި ވެއެވެ.
ފިޖީގެ ރަގްބީ ކުޅުންތެރިޔެއް ކަމަށްވާ ބެން ރަޔަން ފިޖީގެ ހަތް ޑޮލަރުގެ ނޫޓްގަޔާއި 50 ސެންޓްގައި، ހިމެނި އެވެ. މިދިޔަ އަހަރު، ބްރެޒިލްގައި ބޭއްވި ރިއޯ އޮލިމްޕިކްސްގައި ގްރޭޓް ބްރިޓަން ބަލިކޮށް، ފިޖީގެ ޓީމުން ހޯދި ކާމިޔާބާއެކު، ފިޖީގެ މަރުކަޒީ ބޭންކުން، މިއަހަރު ނެރުނު ނޫޓްގެ ހަތް ޑޮލަރާއި 50 ސެންޓްގައި ރަޔަންއާ އެކު، ޓީމުގައި ހިމެނުނު ކުޅުންތެރިންގެ ފޮޓޯ އެ ނުޓްތަކުގައިގައި ހިމަނާފައި ވެއެވެ.