ބުރަ އަދި އުނދަގޫ ޝެޑިއުލެއްގައި ވެސް، މާލޭ ލީގް ފުރަތަމަ ބުރުގެ ހުރިހާ މެޗަކުން މޮޅުވެ، ތާވަލުގެ ކުރީގައި ހަ ޕޮއިންޓްގެ ލީޑެއް ލިބުމަކީ ވަރަށް ބޮޑު ހިތްހަމަ ޖެހުމެއްކަމަށް މާޒިޔާގެ ކޯޗް މަރުޔަން ސެކްލޮސްކީ ބުނެފި އެވެ.
ފުރަތަމަ ބުރުގެ 14 މެޗުން 21 ޕޮއިންޓް މާޒިޔާއިން ހަމަ ކުރިއިރު، ދެ ވަނައިގައި ނިއުރޭޑިއަންޓަށް ލިބިފައި ވަނީ 15 ޕޮއިންޓެވެ. މާޒިޔާއިން ވަނީ ފުރަތަމަ ބުރުގައި 14 ލަނޑު ޖަހާފަ އެވެ. އެ ޓީމު ކޮޅަށް ވަދެފައި ވަނީ އެންމެ ލަނޑެކެވެ.
މާޒިޔާގެ ކޯޗް ބުނީ، މިދިޔަ އޭއެފްސީ ކަޕްގެ ގުރޫޕް ސްޓޭޖް މެޗުތަކާއެކު ވޭތުވެދިޔަ 45 ދުވަސް ބަހާލުމުން ކޮންމެ ހަތަރު ދުވަހަކަށް މެޗެއް މާޒިޔާއިން ކުޅެފައި ވާނެ ކަމަށެވެ.
އޭނާ އަދި ބުނީ، މާލޭ ލީގްގައި މާޒިޔާއާ ދެކޮޅަށް ކުޅޭ އެހެން ހުރިހާ ޓީމުތަކަށް އެޑްވާންޓޭޖް އެބައޮތް ކަމަށެވެ.
"މިސާލަކަށް އަހަރެމެން ކުޅެން ޖެހެނީ ވިކްޓަރީއާ، އަހަރެމެންނާ ކުޅެންވާއިރަށް ވިކްޓަރީއަށް އެބަ ލިބޭ ދެ ހަފުތާ، އެކަމަކު އެ ދެ ހަފުތާތެރޭ އަހަރެމެން ކުޅޭ މެޗުތަކާއެކު ވިކްޓަރީއާ ދެކޮޅަށް ކުޅޭ މެޗު ވާނީ އަހަރެމެންގެ ހަތަރު ވަނަ މެޗަށް، އަހަރެން މިވާހަކަ އެތައް ފަހަރެއްގެ މަތިން ދައްކައިފިން އެކަމަކު މިވާހަކަ އަޑުއަހާނެ މީހަކު ނުވޭ،" ސެކްލޮސްކީ ބުންޏެވެ.
އޭނާ ބުނީ އުނދަގޫ ޝެޑިއުލެއްގައި ވެސް މާޒިޔާގެ ކުޅުންތެރިން ދެއްކި ހިތްވަރަށް ތައުރީފް ކުރާ ކަމަށާއި އެ ކުޅުންތެރިންނަށް އިހުތިރާމް ހައްގުވާ ކަމަށެވެ.