އެސްޓީއޯ މާލޭ ލީގުގެ ފުރަތަމަ ބުރުގެ ފަހު މެޗުގައި ރޭ ޓީސީ ސްޕޯޓްސް ކްލަބް އަތުން 3-0 އިން މޮޅުވެ، ލީގުގެ ފުރަތަމަ ބުރުގައި ކުޅުނު ހުރިހާ މެޗަކުން މޮޅުވުމުގެ ރެކޯޑަކާއެކު މާޒިޔާ މާލޭ ލީގުގެ ފުރަތަމަ ބުރު ނިންމާލައިފި އެވެ.
ފުރަތަމަ ބުރުގައި ކުޅުނު ހުރިހާ މެޗަކުން މޮޅުވެ، މާޒިޔާ ތާވަލްގެ އެއްވަނައިގައި އޮތީ 21 ޕޮއިންޓާއެކު އެވެ. މާޒިޔާ ވަނީ ދެވަނައިގައި އޮތް ނިއު ރޭޑިއަންޓްގެ މައްޗަށް ހަ ޕޮއިންޓްގެ ލީޑެއް ހޯދައިފަ އެވެ. މާޒިޔާ ފުރަަތަމަ ބުރުގައި ކުޅުނު ހަތް މެޗުގައި އެ ޓީމު ކޮޅަށް ވަދެފައިވަނީ އެންމެ ލަނޑެކެވެ. މާޒިޔާ އިން ވަނީ 14 ލަނޑު ޖަހައިފަ އެވެ.
ލީގުގެ ފުރަތަމަ ބުރުގެ ފަހު މެޗުގައި ރޭ މާޒިޔާ އިން ފުރަތަމަ ހާފުގައި ލީޑު ނެގީ މުހައްމަދު އުމެއިރު ޖެހި ލަނޑުންނެވެ. ދެވަނަ ހާފުގައި މާޒިޔާގެ ކެޕްޓަން އަސަދުﷲ އަބްދުﷲ ވަނީ ދެ ލަނޑު ޖަހައިފަ އެވެ.
ރޭގެ މެޗަށް ފަހު ވާހަކަ ދައްކަމުން މާޒިޔާގެ ކޯޗު މަރުޖާން ސެކުލޮވްސްކީ ބުނީ ކައިރި ކައިރީގައި މެޗުތައް ކުޅެންޖެހޭއިރު، ކުޅުންތެރިން ކުރާ ހިތްވަރާއި މަސައްކަތަށް ޝުކުރު އަދާކުރާ ކަމަށެވެ.
"އަހަރެމެންނާ އިދިކޮޅަށް މި ނުކުންނަ ޓީމުތައް މި ނުކުންނަނީ ރެސްޓް ލިބިގެން. ކައިރިކައިރީގައި މެޗުތައް ކުޅެންޖެހޭއިރު ވެސް ކުޅުންތެރިން އެ ކުރާ ހިތްވަރާއި މަސައްކަތަށް ޝުކުރު އަދާކުރަން،" މަރުޖާން ބުންޏެވެ.
ލީގުގެ ފުރަތަމަ ބުރު ނިމުނުއިރު، ދެވަނައިގައި 15 ޕޮއިންޓާއެކު އޮތީ ނިއު ރޭޑިއަންޓެވެ. ތިން ވަނައިގައި 13 ޕޮއިންޓާއެކު ގްރީން ސްޓްރީޓް އޮތްއިރު، ހަތަރު ވަނައިގައި 10 ޕޮއިންޓާއެކު އޮތީ ކްލަބް އީގަލްސް އެވެ. ދިހަ ޕޮއިންޓާއެކު ޓީސީ ފަސް ވަނައިގައި އޮތްއިރު، ވިކްޓަރީ އޮތީ އަށް ޕޮއިންޓާއެކު ހަ ވަނައިގަ އެވެ. ތިން ޕޮއިންޓާއެކު ޔުނައިޓެޑް ވިކްޓަރީ ހަތް ވަނައިގައި އޮތްއިރު، ތާވަލްގެ ފުލުގައި އެއް ޕޮއިންޓާއެކު އޮތީ ކްލަބް ވެލެންސިއާ އެވެ.
މާލޭ ލީގް ފުރަތަމަ ބުރުގައި ލަނޑު ޖެހުމަށްފަހު މާޒިޔާގެ ކެޕްޓަން އަސަދުﷲ އުފާ ކުރަނީ، --- ފައިލް ފޮޓޯ: މަޒިޔާ