ކަޝްމީރުގައިވާ އިންޑިއާ އާއި ޕާކިސްތާނުގެ ސަރަހައްދު ވަކިކުރާ ރޮނގުގެ ކައިރީގައި ދެ ގައުމުގެ ސިފައިން ބަދަލުކުރި ހަމަލާތަކެއްގައި ދެމީހުން މަރުވެ 17 މީހުން ޒަހަމްވެއްޖެ އެވެ.
އިންޑިއާ ސިފައިން ބުނީ ލައިން އޮފް ކޮންޓްރޯލް ހުރަސްކޮށް އިންޑިއާގެ އަވަށްތަކަށް އިސްވެ ހަމަލާ ދިނީ ޕާކިސްތާނު ސިފައިން ކަމަށެވެ. އަދި ބުނީ އެ ހަމަލާތަކުގައި ފިރިހެނަކާއި ކުޑަ އަންހެންކުއްޖަކު މަރުވެ އިތުރު ނުވަ މީހުން ޒަހަމްވި ކަމަށެވެ. މަރުވި މީހުންގެ ތެރޭގައި އިންޑިއާ ސިފައިންގެ ހަތަރު މީހުން ހިމެނެ އެވެ.
މަރުވީ ދެބަފައިން ކަމަށް މީޑިއާތަކުން ރިޕޯޓްކޮށްފައި ވިޔަސް ކަޝްމީރުގެ އިންޑިއާ ފަޅީގައިވާ ރަޖޫރީ ޑިސްޓްރިކްޓް ފުލުހުންގެ ޑެޕިއުޓީ ކަމިޝަނާ ޑރ. ޝާހިދު އިގުބާލް ޗައުދަރީ ވިދާޅުވި ކަމަށް އިންޑިއާގެ ދަ ހިންދޫ ނޫހުން ބުނީ މަރުވި ކުޑަކުއްޖާއަކީ މަރުވި މީހާގެ ތިމާގެ މީހެއްގެ ދަރިއެެއް ކަމަށެވެ.
އިންޑިއާއިން ބުނީ އިސްވެ ހަމަލާދިނީ ޕާކިސްތާނުން ކަމަށާއި ދެމީހުން މަރުވެ ނުވަ މީހުން ޒަހަމްވުމުން ދެ ސަރަހައްދުގެ ބައެއް އަވަށްތަގެ މީހުން ރައްކާތެރި ހިސާބުތަކަށް ގެންގޮސްފައިވާ ކަމަށެވެ. އެގޮތުން ވަގުތީ ހިޔާތަކަށް ހާހެއްހާ މީހުން ގެންގޮސްފައިވާ ކަމަށް އެގައުމުން ބުންޏެވެ.
ޕާކިސްތާނުން ބުނީ އިސްވެ ހަމަލާ ދިނީ އިންޑިއާ ސިފައިން ކަމަށާއި އެ ހަމަލާތަކުގެ ސަބަބުން އަށް މީހުން ޒަހަމްވި ކަމަށެވެ.
އިނގިރޭސިން އިންޑިއާ ބައިކޮށް ޕާކިސްތާނު އުފެއްދުމަށް ފަހު ދެގައުމަށް މިނިވަންކަން ދިން އިރު ގޮތެއް ނުނިމި އޮތް ކަޝްމީރުގެ މިލްކުވެރިކަމަށް ދެގައުމުން ވެސް ދައުވާ ކުރެއެވެ. މުޅި ކަޝްމީރުގެ މިލްކުވެރިކަމަށް ދެގައުމުން ވެސް ދައުވާ ކުރާ އިރު ދެގައުމުން ވެސް ވެރިކަން ކުރަމުން އަންނަނީ ކަޝްމީރުގެ އެއް ބައިގައެވެ. ޕާކިސްތާނާއި އިންޑިއާއިން މިހައިތަނަށް ތިން ހަނގުރާމައެއް ވަނީ ކޮށްފައެވެ. އެ ދެގައުމުން ހަނގުރާމަ މުޅިން ހުއްޓައިލުމުގެ އެއްބަސްވުމެއް ގާއިމްކޮށްފައެއް ނުވެއެވެ. އޮތީ ވަގުތީ ގޮތުން ހަމަލާ ބަދަލުކުރުން ހުއްޓައިލުމުގެ އެއްބަސްވުމެކެވެ.
ކަޝްމީރުގެ އިންޑިއާ ފަޅީގައި އިންޑިއާ ސިފައިންގެ ބަޔަކު ތައްޔާރީ ހާލަތުގައި. ފޮޓޯ: ހިންދުސްތާންޓައިމްސް