ގޫގުލްގައި މަސައްކަތް ކޮށްފައިވާ ކޮންސަލްޓެންޓަކާއެކު، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ޓޫރިޒަމް ދާއިރާ އަށް މީހުން ތަމްރީން ކުރުމުގެ ޕްރޮގްރާމެއް ފަށައިފި އެވެ.
ރާއްޖޭގެ ޓްރެވަލް އެޖެންޓުގެ ޖަމިއްޔާ، މަޓާޓޯ އިން ބުނީ ސްރީލަންކާގެ ޓްރެއިނިން ފާމްއަކާ ގުޅިގެން އިއްޔެއިން ފެށިގެން ކުރިއަށް ގެންދާ މި ތަމްރީން ޕްރޮގްރާމްގައި ކްލާސްތައް ނަގައި ދެނީ ގޫގުލްގެ ކޮންސެލްޓެންޓެއްގެ ގޮތުގައި ކުރިން މަސައްކަތް ކުރެއްވި ސްރީލަންކާގެ، ރޯޝަން ޖަޔަވީރު އާއި މަނީޝް ޖަޔަސޫރިޔާ އެވެ. މި ޕްރޮގްރާމުގައި 40 މީހުން ބައިވެރިވެފައިވެ އެވެ.
މި ތަމްރީން ޕްރޮގްރާމް ކުރިއަށް ގެންދާ ރޯޝަންއަކީ ސްރީލަންކާގެ ބޮޑު ޑިޖިޓަލް މާކެޓިން ކުންފުންޏެއް ކަމަށްވާ އަންތާރާ ސޮލިއުޝަންގެ ސީއީއޯ އެވެ.
މަޓާޓޯގެ މި ތަމްރީން ޕްރޮގްރާމުގައި ސޯޝަލް މީޑިޔާ މެދުވެރިކޮށް ޕްރޮމޯޝަންތައް ކުރިއަށް ގެންދާ އުކުޅުތަކާއި މިނޫން ވެސް މި ދާއިރާގައި މަސައްކަތް ކުރުމުގައި ގެންގުޅޭނެ ކިޔަވައިދީފައިވެ އެވެ.
މަޓާޓޯ އިން 2014 ވަނަ އަހަރުވެސް ޓޫރިޒަމް ދާއިރާއަށް ހާއްސަކޮށް ތިން ޕްރޮގްރާމެއް ހިންގި އެވެ. އަދި މި އަހަރު ވެސް އެމެރިކާގެ މަޝްހޫރު ލިޔުންތެރިއެއްގެ އެހީތެރިކަމާއެކު ޓޫރިޒަމް ދާއިރާ އަށް ތަމްރީން ޕްރޮގްރާމެއް މަޓާޓޯ އިން ހިންގި އެވެ.