ފްރާންސްގައި މިދިޔަ ހަފްތާގައި ބޭއްވި ރިޔާސީ އިންތިހާބުގެ ދެވަނަ ބުރުގައި ކަނާތު ފިޔައިހެ ހަރުކަށި މާރިން ލިޕެންގެ މައްޗަށް ކުރި ހޯއްދެވި އިމެނުއަލް މެކްރޯން އެ ގައުމުގެ ރައީސްކަމުގެ މަގާމުގެ ހުވާ މިއަދު ކުރައްވައިފި އެވެ.
ފްރާންސްގެ ރިޔާސީ ގަނޑުވަރު އިލީޒީ ޕެލަސްގައި މެކްރޯން ހުވައި ކުރެއްވުމަށް ބޭއްވި ރަސްމިއްޔާތުގައި ބައިވެރިވުމަށް ދައުވަތު އަރުވާފައި ވަނީ 300 މީހުންނަށެވެ. އެ މީހުންގެ ތެރޭގައި ޓްރޭޑް ޔޫނިއަންތަކުގެ މަންދޫބުންނާއި މެކްރޯންގެ އެކުވެރިންގެ ތެރެއިން 100 މީހަކު ހިމެނެ އެވެ. އިލީޒީ ޕެލަސްއަށް މެކްރޯން ވަޑައިގެންނެވުމުން އޭނާއަށް މަރުހަބާ ވިދާޅުވީ ރައީސްކަމުގެ ދައުރު މިއަދު ނިމުނު ފްރާންސްވާ އޮލާންދު އެވެ.
ސިޔާސީ މާބޮޑު ތަޖުރިބާއެއް ނެތް މެކްރޯން ރިޔާސީ ފްރާންސްގެ ރިޔާސީ އިންތިހާބު ކާމިޔާބު ކުރެއްވީ އޭނާ މީގެ އަހަރެއްހާ ދުވަސް ކުރިން އުފެއްދެވި އަންމާޝް ޕާޓީގެ ޓިކެޓްގައި ވާދަ ކުރައްވައިގެންނެވެ. އޭނާއަކީ މިހާ ތަނަށް ފްރާންސްގެ ރައީސް ކަމަށް ވަޑައިގެންނެވި އެންމެ ޒުވާން ލީޑަރެވެ. އަދި އެއީ ނަޕޯލިއަން އަށް ފަހު ފްރާންސްގެ ވެރިކަން ކުރައްވާ އެންމެ ޒުވާން ލީޑަރެވެ. އޭނާއަށް އަދިވީ 39 އަހަރެވެ.
ރައީސް ކަމަށް ވަޑައިގެންނެވުމުގެ ކުރިން މެކްރޯން އަދާކުރެއްވި އެންމެ އިސް މަގާމަކީ ފްރާންސްގެ އިކޮނޮމީ މިނިސްޓަރުކަމުގެ މަގާމެވެ.
ރައީސްކަމުގެ މަގާމުގެ ހުވާ ކުރެއްްވުމަށް ފަހު ގައުމާ މުހާތަބުކުރައްވައި ވާހަކަފުޅު ދައްކަވަމުން މެކްރޯން ވިދާޅުވީ ފްރާންސްގައި އުފެދިފައިވާ ބައިބައިވުން ނިމުމަކަށް ގެންނަވަން މަސައްކަތް ކުރައްވާނެ ކަަމަށެވެ.
ފްރާންސްގެ ރައީސްކަމުގެ ހުވައި މިއަދު ކުރެއްވި އިމެނުއަލް މެކްރޯން އާއި އޭނާގެ އަނބިކަނބަލުން ރިޔާއީ ގަނޑުވަރުގެ ސިޑިބަރިމަތީގައި. ފޮޓޯ: ރޮއިޓާސް