ކޮލެރާ ފެތުރޭތީ ޔަމަނުގައި ކުއްލި ހާލަތު އިއުލާންކޮށްފި

ބޭރަށް ހިންގުމުގެ ނުރައްކާތެރި ބާވަތެއް ކަމަށްވާ ކޮލެރާ ފެތުރޭތީ ޔަމަނުގައި ކުއްލި ހާލަތު އިއުލާންކޮށްފި އެވެ.

ހޫސީންގެ ބާރުގެ ދަށުގައިވާ ޔަމަނުގެ ވެރިރަށް ސަންއާގައި ކޮލެރާ ޖެހިގެން 115 މީހުން މަރުވެފައިވާ ކަމަށް އެ ގައުމުގެ އަލް ސަބާ ނިއުސް އެޖެންސީއާ ހަވާލާދީ ރޮއިޓާސް ބުންޏެވެ.

ހަނގުރާމައިގެ ސަބަބުން ސިއްހީ ނިޒާމު ވަރަށް ބޮޑަށް ހަލާކުވެފައިވާ ޔަމަނުގެ ކޮލެރާ ފެތުރޭތީ ސަންއާ ކޮންޓްރޯލް ކުރަމުން އަންނަ ހޫސީންގެ ސަރުކާރުން ވަނީ ކުއްލި ހާލަތު އިއުލާންކޮށް ބައިނަލް އަގުވާމީ އެހީ އަށް ވެސް އެދިފަ އެވެ.

އދ. އިން ބުނީ ޔަމަނުގައި ހުރި ސިއްހީ ހިދުމަތްދޭ ތަންތަނުގެ ތެރެއިން ހިދުމަތް ދެވޭ ފަދާ ހާލަތެއްގައި މިހާރު ހުރީ މަދު ތަނެއް ކަމަށާއި އެގައުމުގެ ތިންބައިކުޅަ ދެބަޔަށް ވުރެ ގިނަ މީހުންނަށް މިހާރު ރައްކާތެރި ބޯފެނެއް ނުލިބޭ ކަމަށެވެ.

ސަބާ ނިއުސް އެޖެންސީން ބުނެފައި ވަނީ ސަންއާއި އެހެން ހިސާބުތަކުގައި މިދިޔަ އޭޕްރިލް މަހުގެ 27 ވަނަ ދުވަހުން ފެށިގެން މިމަހުގެ 13 ވަނަ ދުވަހާ ހަމައަށް 8595 މީހަކަށް ވަނީ ކޮލެރާ ޖެހިފައިވާ ކަމަށް ރެކޯޑްކޮށްފައިވާ ކަމަށެވެ. ނަމަވެސް ލެބޯޓްރީ ޓެސްޓްތައް ހަދައި ކަށަވަރުކޮށްފައި ވަނީ ކޮލެރާގެ 213 ކޭހެވެ.

ޔަމަނުގެ ބޮޑު ބައެއް އަދިވެސް ކޮންޓްރޯލް ކުރަމުން އަންނަ ހޫސީންނާއި އެ ގައުމުގައިވާ ބައިނަލް އަގުވާމީ ގޮތުން ގަބޫލު ކުރާ ސަރުކާރަށް މަދަދުކުރާ އަރަބި ލަޝްކަރުތަކާ ދެމެދު ވަރުގަދަ ހަނގުރާމައެއް ހިނގަމުންދާތާ މިހާރު ވަނީ ދެ އަހަރު ވެފައެވެ. އަރަބި ލަޝްކަރުތަކުގައި އިސްކޮށް ސައުދީ އަރަބިއްޔާއިން ހަރަކާތްތެރިވާ އިރު ހޫސީންނަށް މަދަދު ކުރަނީ އީރާނުންނެވެ. ހޫސީންނަކީ ޝިޔައީންގެ ޒައިދީ މަޒްހަަބަށް ތަބާވާ ބައެކެވެ.

ޔަމަނު ހަނގުރާމައިގައި މަރުވި މީހުންގެ އަދަދު މިހާރު ވަނީ 10000 ވުރެ މަތިވެފަ އެވެ.