އަންހެނަކު ރޭޕްކޮށް މަރައިލުމުގެ ވަރަށް ރަހުމް ކުޑަ އަމަލެއް އަނެއްކާވެސް އިންޑިއާގައި ހިންގައިފިއެވެ. އިންޑިއާގެ ވެރިރަށް ނިއުދިއްލީގެ މަގެއްގެ މަތީގައި ދުއްވަމުން ދިޔަ ބަހެއްގެ ތެރޭގައި ފިރިހެނުންގެ ގްރޫޕަކުން އަންހެނަކު ރޭޕްކުރި ހާދިސާއަށް ވުރެ މިފަހަރުގެ ހާދިސާ މާ ބިރުވެރިއެވެ.
އިންޑިއާގެ ހަރްޔާނާ ސްޓޭޓްގެ ރޮހްތަކް ނަމަކަށް ކިޔާ ރަށުގައި ހިންގި އަމަލުގައި އުމުރުން 23 އަހަރުގެ އަންހެނަކު ރޭޕް ކުރުމަށް ފަހު އޭނާ މަރާލާފައި ވަނީ މޫނުމަތީގައި ހިލަޔަކުން ޖަހައި ޗިސްކޮށްލައިގެންނެވެ. ފުލުހުންނަށް އޭނާގެ ހަށިގަނޑު ފެނުނު އިރު އެ ހަށިގަނޑުން ބާކީ އޮތީ އެއްބައި ކަމަށް އެންޑީ ޓީވީން ބުންޏެވެ. އަންހެންމީހާ ރޭޕްކޮށް މަރައިލި މީހުން ވަނީ އޭނާގެ ހަށިގަނޑުގެ މަތިން ކާރު ދުއްވައި ހަށިގަނޑުވެސް ޗިސްކޮށްލާފައެވެ. އެއަށް ފަހު ހުސްބިމަކަށް އެއްލާފައި ވަނިކޮށް ކުއްތާތައް ވަނީ ހަށިގަނޑުގެ ބޮޑު ބައެއް ކައިފައެވެ.
އިންޑިއާގެ ނޫސްތަކުން ރިޕޯޓްކޮށްފައިވާ ގޮތުގައި އާއިލާއިން އޭނާގެ ހަށިގަނޑު ދެނެގަތީ ކުޑަ ދުވަސްކޮޅެއް ކުރިން އޭނާއަށް ގަނެދީފައިވާ ހާރެއް އޮތުމުންނާއި އިނގިލިތަކުން ކަމަށެވެ.
އެ ޖަރީމާ ހިންގިކަމުގެ ތުހުމަތަށް ދެމީހަކު ހައްޔަރުކޮށްފައިވާއިރު އޭގެ ތެރެއިން އެކަކު ރޭޕްކުރި އަންހެންމީހާއަށް ބިރު ދައްކާތީ އާއިލާއިން އޮތީ ފުލުހުންނަށް ރިޕޯޓްވެސް ކޮށްފައެވެ.
މި ނުރައްކާތެރި ހާދިސާ އިންޑިއާގައި ހިނގާފައި މިވަނީ ދިއްލީ ރޭޕް ހާދިސާގައި ކުށްވެރިވާ މީހުންނަށް އިއްވާފައިވާ މަރުގެ ހުކުމަށް އިންޑިއާގެ ސުޕްރީމްކޯޓުން ތާއީދުކުރިތާ ކުޑަ ދުވަސްކޮޅެއް ފަހުންނެވެ.
ރޭޕްކުރުން ހުއްޓުވައިދޭން ގޮވާލައި އިންޑިއާގެ ދަރިވަރުންތަކެއް މުޒާހަރާ ކުރަނީ. ފޮޓޯ: އަލްޖަޒީރާ