ހީޓުގެ އެއް ވަނައިގައި ސާއިދު ސެމީއަށް

އިސްލާމިކް ސޮލިޑާރިޓީ ގޭމްސްގެ ފިރިހެންނުންގެ 100 މީޓަރު ދުވުމުގައި ރާއްޖޭގެ އެއް ވަނަ ދުވުންތެރިޔާ ހަސަން ސާއިދު ހީޓްގެ އެއް ވަނަ ހޯދައި، އެ އިވެންޓްގެ ސެމީ ފައިނަލަށް ދަތުރު ކޮށްފި އެވެ.

އަޒަރުބައިޖާންގެ ބަކޫގައި، މިހާރު ކުރިއަށްދާ ގޭމްސްގައި، ހީޓް އެކެއްގައި ދުވެ، ސާއިދު ރޭސް ނިންމީ 10.40 ސިކުންތުން ނެވެ.

އެހީޓްގައި، އޭނާއާ އެކު ދުވި، ތުރުކީގެ ޒުވާން ދުވުންތެރިޔާ ރާމިލް ގްލީވް ރޭސް ނިންމީ 10.40 ސިކުންތުން ނެވެ. ނަމަވެސް، ރާމިލް ރޭންކް ކޮށްފައި ވަނީ ދެ ވަނައިގަ އެވެ.

ސާއިދު އެއް ވަނައިގައި ރޭންކް ކޮށްފައިވާ ސަބަބު: "ދެ އެތުލީޓުންވެސް ރޭސް ނިންމަފަ މިއިންނަނީ 10.40 ސިކުންތުގައި، ޕޮއިންޓް 40 އަކީ ސިކުންތެއްގެ 100 ބައިކުޅަ އެއް ބައި، ދެން ފޮޓޯ ފިނިޝިންއިން އޭތި ދަމާލާނީ ސިކުންތެއްގެ 1000 ބައިކުޅަ އެއްބަޔަށް، އެހެންވެއްޖެއްޔާ އިނދެދާނެ ސާއިދު 10.39.9 އަށް އަނެއް އެތުލީޓް ހަމަސީދާ 10.40 އަށް، އެގޮތަށް ބަލާފައި ސާއިދު އަށް އެއްވަނަ ދީފައި އެ އިންނަނީ، އެދޭތި 100 ޓައިމްސްއަށް ބޭސް ކުރީމަ ދެ މީހުންގެ ޓައިމްވެސް އަންނާނީ 10.40 އަށް." ސްޕްރިންޓިންގެ ތަޖުރިބާކާރެއްކަމަށްވާ، އެތުލެޓިކްސް އެސޯސިއޭޝަންގެ ޖެނަރަލް ސެކެޓްރީ މުންތަގިމް ވިދާޅުވި އެވެ.

އެ އިވެންޓްގެ ސެމީފައިނަލު ބުރު އޮންނާނީ ރާއްޖޭގަޑިން މިއަދު އިރުއޮއްސި 6:45 ގަ އެވެ.

ހީޓްގެ ތިން ވަނައަށް ގޮސްފައި ވަނީ، ދެކުނު އެމެރިކާ ބައްރުގެ އުތުރު އިރުމަތީގެ ސަރަހައްދުގެ ކުޑަ ގައުމެއްކަމަވާ ސާނާމްގެ ވަނަނަން ޖެފްރީ އެވެ. އޭނާ ރޭސް ނިންމީ 10.49 ސިކުންތުން ނެވެ.

ސަތޭކަ މިޓަރު ހީޓް ހަތަރެއްގައި ދުވި ރާއްޖޭގެ އަނެއް ދުވުންތެރިޔާ ސަރީހް އަހްމަދަށް ލިބުނީ ހީޓްގެ ހަތް ވަނަ އެވެ. އޭނާ ރޭސް ނިންމީ 11.28 ސިކުންތުން ނެވެ. އެ ހީޓްގެ އެއް ވަނަ އަށް ދިޔައީ، ބަހްރެއިންގެ އެންޑްރޫ ފިޝާ އެވެ. އޭނާ ރޭސް ނިންމީ 10.20 ސިކުންތެވެ.