ދެހާސް ސާދަ ވަނަ އަހަރު، ރާއްޖޭގައި ބޭއްވި އޭއެފްސީ ޗެލެންޖް ކަޕުން، ރާއްޖެއަށް ތިން ވަނަ ހޯދައިދިނީ، އޭއެފްސީ ކަޕްގައި، މިއަދު މާޒިޔާއާ ދެކޮޅަށް ނިކުންނަ، ބަންގުލަދޭޝްގެ ޑާކާ އަބްހާނީ ލިމިޓެޑްގެ ކޯޗް ކޮރޭޝިއާގެ ޑްރެގޯ މަމިޗެވެ. ސާކު ސަރަހައްދުން ބޭރުން، ރާއްޖެއަށް ފުޓްބޯޅައިގައި ހޯދައިން އެންމެ ބޮޑު ކާމިޔާބު ހޯދީ އޭނާގެ އިރުޝާދުގެ ދަށުން ނެވެ.
ޗެލެންޖްކަޕްގައި، ގައުމީ ޓީމު ލީޑް ކުރި ކުޅުންތެރިން، މިއަދު ތިބީ އޭނާއާ ދެކޮޅަށް ނިކުންނަ މާޒިޔާގަ އެވެ. މުހައްމަދު އުމޭރު އާއި އަސދުﷲ އަބްދުﷲ ގެ އިތުރުން، ހުދު މަމަޗްވެސް ހެއްވާލި މަޝްހޫރު ޕެނަލްޓީ ކާމިޔާބު ކުރި، އަސްހަދު އަލީ (އަޑޭ) ވެސް މާޒިޔާގައި އެބަހުއްޓެވެ. އޭނާ ވަނީ އޭރުގެ ހަދާންތައް ދިވެހި މީޑިއާއަށް ހިއްސާ ކޮށްފައެވެ. ރާއްޖެ އަންނަން ކައިރިވިއިރު، އޭނާ ވަނީ އޭނާގެ ފޭސްބުކް ޓައިމްލައިނަށް، ރައީސް އަބްދުﷲ ޔާމިން ގައުމީ ޓީމުގެ ޝަރަފުގައި ބޭއްވި ރަސްމިއްޔާތުގެ ތެރެއިން ފޮޓޯއެއް ހިއްސާ ކޮށްފަ އެވެ. އޭނާ ބުނީ، އެއީވެސް އެދުވަސްތައް އޭނާ ހަނދާންވާ ކަމުގެ މިސާލެއް ކަމަށެވެ.
"އެއީ އަހަންނަށް ވަރަށް މުހިންމު ހަނދާންތަކެއް، އަހަރެން ވަރަށް ފަހްރުވެރިވޭ މިތާންގައި [ރާއްޖޭގައި] އަހަރެން ހޭދަ ކުރި މުއްދަތުގައި ކުރެވުނު މަސައްކަތާ މެދު، އަހަރެން އައި އިރު ރާއްޖެ އޮތީ ރޭންކިންގެ 163 ވަނައިގައި، އަހަރެން ޓީމު ދޫކޮށްލިއިރު ރާއްޖެ އޮންނާނީ ރޭންކިންގެ 130 ވަނައިގައި، ރޭންކިގެ ޕްރިންސިޕަލްތަކަށްބަލާއިރު، އޭރު ރާއްޖެ ވާނެ ރޭންކިންގައި އެންމެ ބޮޑު ކުރިއެރުމެއް ހޯދި ގައުމަކަށް، އަހަރެންގެ މަސައްކަތާ މެދު ވަރަށް ބޮޑަ އުފާވޭ،" މަމަޗް ބުންޏެވެ.
ގުރޫޕް ސްޓޭޖުގެ ފުރަތަމަ މެޗުގައި، މާޒިޔާއިން ވަނީ، ބަނގުލަދޭޝްގައި އަބްހާނީ 2-0 ބަލި ކޮށްފަ އެވެ. ނަމަވެސް އޭގެ ފަހުން ނަތީޖާތައް ރަނގަޅުކޮށް، އެންމެ ފަހުން އަމިއްލަ ދަނޑުގައި، އަބްހާނީއިން ވަނީ، އޭއެފްސީ ކަޕްގެ އެންމެ ފަހުގެ ރަނަރަފު، އިންޑިއާގެ ބެންގަލޫރު އެފްސީ ބަލި ކޮށްފަ އެވެ. އެމެޗުން މޮޅުވިޔަސް، އަބްހާނީއަށް ދެ ވަނަ ބުރަށް ދިއުމުގެ އެއްވެސް ފުރުސަތެއް ނެތެވެ.
ނަމަވެސް، މަމިޗް ބުނީ އަބްހާނީއިން ބޭނުން ވަނީ އެންމެ ފަހު ވަގުތުގައިވެސް ރަނގަޅު ނަތީޖާތަކެއް ހޯދުމަށް ކަމަށާއި، ބެންގަލޫރު މެޗުން ލިބުނު ހިތްވަރާއެކު، މިއަދު މާޒިޔާއާ ދެކޮޅަށް ނިކުންނަ މެޗުގައިވެސް ރަނގަޅު ނަތީޖާއެއް ހޯދުމަށް މަސައްކަތް ކުރާނެ ކަމަށެވެ.
އަދި އޭނާ ބުނީ، ދެ ވަނަ ބުރަށް ދިއުމުގެ ރޭހުގައި، މާޒިޔާ މިހާރު އެއޮވެވެނީ، އަބްހާނީއިން ބެންގަލޫރު ބަލި ކުރުމުން ކަމަށެވެ
އަބްހާނީއަށް ދިމާވެފައި ވަނީ، ބަންގުލަދޭޝްގެ ލީގް މެޗުތައް އަދިވެސް ފަށާފައި ނުވުމުގެ މައްސަލަ ކަމަށް މަމިޗް ފާހަގަ ކުރި އެވެ. އޭނާ ބުނީ އޭއްފްސީކަޕްގެ ފެށުންވެސް ގޯސްކޮށް ދިޔައީ، ލީގް މެޗުތައް ނުކުޅެ އޭއެފްސީ ކަޕާ ކުރިމަތިލާން ޖެހުމުން ކަމަށެވެ.
މާޒިޔާއިން އަބްހާނީއާ ދެކޮޅަށް، ބަނގުލަދޭޝްގައި ކުޅުނު މެޗުގައި ލަނޑުޖެހީ، މުހައްމަދު އުމޭރު އާއި ކެޕްޓަން އަސަދުﷲ އަބްދުﷲ އެވެ. މަމިޗް ބުނީ، އުމޭރު އާއި އަސަދުﷲ އަކީ މިހާރު ދެކުނު އޭޝިއާ ސަރަހައްދުގައި ތިބި އެންމެ މޮޅު ދެ ކުޅުންތެރިން ކަމަށެވެ.
މަމިޗް، ރާއްޖެއަށް ހޯދައިދިން ކާމިޔާބު ފޮނިވިޔަސް، އަބްހާނީ ގޮވައިގެން ރާއްޖޭގެ ދޮރުއަށިން އެތެރެވުމުގައި ގޮންޖެހުންތަކެއް ކުރިމަތިވުމުން އޭނާ ވަނީ ވަރަށް ބޮޑަށް ކަންބޮޑުވުން ފާޅުކޮށްފަ އެވެ.
"ވިސާގެ ކަންތައްތަކުގައި އަހަރެމެން ރާއްޖޭގެ އެއާޕޯޓްގައި ހަތަރު ގަޑިއިރު ތިބެން ޖެހުނު މިކަންކަން މިއަށްވުރެ ފަސޭހަ ކުރަން ޖެހޭނެ، މިއީ އޭއެފްސީ އާއި ފީފާއިންވެސް ބާރު އަޅަންޖެހޭ ކަންކަން." އޭނާ ބުންޏެވެ.