މި އަހަރު ބާއްވާ ސާކްގެ ސަރަހައްދީ ފުޓްބޯޅަ މުބާރާތް، ސާފް ޗެމްޕިއަންޝިޕް ފަސް ކުރުމަށް އިންޑިއާއިން އެދިއްޖެ އެވެ.
ޑިސެމްބަރު 25 ގައި ބަންގްލަދޭޝްގައި ފަށަން ޝެޑިއުލްކޮށްފައިވާ ސާފް ޗެމްޕިއަންޝިޕް ފަސް ކުރުމަށް މުބާރާތުގެ އެންމެ ފަހުގެ ޗެމްޕިއަން އިންޑިއާ އިން އެދުނީ އިންޑިއަން ސުޕަ ލީގު (އައިއެސްއެލް) ޑިސެމްބަރުގެ ނިޔަލަށް ނުނިމޭނެތީ އެވެ. އިންޑިއާ އިން ހުށަހެޅީ ސާފް ޗެމްޕިއަންޝިޕް 2018 ވަނަ އަހަރު މޭ މަހަށް ފަސްކޮށް ދިނުމަށެވެ.
"އިންޑިއާ އިން ބުނަނީ އޮކްޓޯބަރު މަހުގައި ފީފާ 17 އަހަރުން ދަށުގެ ވޯލްޑް ކަޕް އެ ގައުމުގައި ކުޅޭތީ، އައިއެސްއެލް މި އަހަރު ފެށެނީ ލަހުން ކަމަށް. އަދި މި އަހަރު އައިއެސްއެލްގައި ޓީމުތަކުގެ އަދަދު އިތުރާނެ ކަމަށް،" ސާފްގެ ޖެނެރަލް ސެކްރެޓަރީ އަންވާރުލް ހައްގު ބުންޏެވެ. "އިންޑިއާގެ ފެޑެރޭޝަނުން މި ބުނަނީ މި އަަހަރު ފަހަރެއްގައި އޭޕްރީލް މަހާ ހަމައަށް އައިއެސްއެލް ދިގުދެމިގެންދާނެ ކަމަށް. އެހެންވީމަ އިންޑިއާ އިން ބޭނުންވަނީ މޭ މަހަށް މުބާރާތް ފަސްކުރަން."
އަންވާރުލް ބުނީ އިންޑިއާގެ ހުށަހެޅުމާމެދު ގޮތެއް ނިންމާނީ ސާފް ޗެމްޕިއަންޝިޕްގެ ސްޕޮންސަރުންނާ މަޝްވަރާކުރުމަށް ފަހު އެވެ.
އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) ގެ ނައިބު ރައީސް ސުބްރަތާ ޑުއްޓާ ބުނީ އިންޑިއާގެ ހުށަހެޅުން ގަބޫލްކޮށް، ސާފް ޗެމްޕިއަންޝިޕް ފަސްކުރާނެ ކަމަށް އުންމީދު ކުރާ ކަމަށެވެ.
ފީފާގެ 17 އަހަރުން ދަށުގެ ވޯލްޑް ކަޕް މި އަހަރު އިންޑިއާގައި ބާއްވަނީ އޮކްޓޯބަރު މަހުގެ 6 އިން 28 އަށެވެ. އަދި މި އަހަރު އައިއެސްއެލް އަށް އާ ޓީމުތަކަށް ގުޅުމަށް ހުޅުވާލާފައިވާތީ، އެ މުބާރާތުގެ ޓީމުތައް އިތުރުވެ، މުބާރާތް ދިގު ދެމިގެންދާނެ ކަމަށް ބެލެވެ އެވެ.
އިންޑިއާގެ ކެޕްޓަން ޗެތުރީ (ވ) އާއި އެ ޓީމުގެ ކޯޗު. -- ފޮޓޯ: ހިންދުސްތާން ޓައިމްސް