އިމްރާނާއެކު ނިއުގެ ތިން ކުޅުންތެރިޔަކަށް އަދަބު ދީފި

މިމަހު ހަތް ވަނަ ދުވަހުގެ ރޭ އީގަލްސް އާއި ނިއުރޭޑިއަންޓް ބައްދަލު ކުރި މެޗަށްފަހު، ދެ ޓީމުގެ ކުޅުންތެރިންނާއި އޮފިޝަލުންގެ ދެ މެދުގައި ހިނގި ކުރިމަތިލުމުގެ ސަބަބުން، ނިއުގެ ކެޕްޓަން، ގޯލްކީޕަރު އިމްރާން މުހައްމަދާއި، އެ ޓީމުގެ އިތުރު ތިން ކުޅުންތެރިންގެ އިތުރުން އީގަލްސްގެ އެސިސްޓޭންޓް ކޯޗް އަހްމަދު ނިމާދު (ނިމާ) އަށް، އެފްއޭއެމްގެ ޑިސިޕްލިނަރީ ކޮމިޓީން އަދަބު ދީފި އެވެ.

އެ މެޗަށްފަހު، ދެ ޓީމުގެ ކުޅުންތެރިން ސަލާން ކުރަމުން ދިޔަ ވަގުތު މައްސަލަ ހޫނު ވާން ދިމާވީ ނިއުގެ ސްޕެއިންގެ ފޯވަޑް އެޑްރިއަން ގަލާޑޯ އާއި އީގަލްސްގެ އިބްރާހިމް މުބީން އާއި ދެމެދު ހިނގި ކުރމަތިލުމާ ގުޅިގެން ނެވެ.

އެފްއޭއެމްގެ ޑިސިޕްލިނަރީ ކޮމިޓީން މައްސަލަ ބެލުމަށްފަހު، މިޑިއާއާ ހިއްސާކޯށްފައިވާ ރިޕޯޓްގައި ބުނެފައިވަނީ ދެ ޓީމުގެ ކުޅުންތެރިން ސަލާމް ކުރަމުން ދިޔަ ވަގުތު ގަލާޑޯ، މުއްކި ކޮއްޕާލައި ހައްޓަށް ހަމަލާ ދިފައިވާ ކަމަށާއި ރައްދުގައި މުއްކިވެސް ގަލާޑޯގެ ފައިގައި ފައިން ޖަހާފައިވާ ކަމަށެވެ.

އަދަބު ދިން ކުޅުންތެރިން

- އެޑްރިއަން ގަލާޑޯ (ނިއުރޭޑިއަންޓް)

- އިބްރާހިމް މުބީން، މުއްކި (އީގަލްސް)

- ޖަމެލް ރޮމާނޯ (ނިއުރޭޑިއަންޓް)

- ސޮލާހް، ސޮލާ (ނިއުރޭޑިއަންޓް)

- އިމްރާން މުހައްމަދު (ނިއުރޭޑިއަންޓް)

އެހެންވެ، މިދެ ކުޅުންތެރިން ހިންގީ ކުޅިވަރުގެ ރޫހާއި ހިލާފް އަމަލެއް ކަމަށާއި އެކަމުގެ ސަބަބުން، ދެ ޓީމުގެ ކުޅުންތެރިންނާއި އޮފިޝަލުން އަދި ސަޕޯޓަރުން ދަނޑަށް އަރައި، ހަމަނުޖެހުންތަކަށް އިތުރަށް މަގުފަހިވެފައި ވާތީ އެފްއޭއެމްގެ ޑިސިޕްލިނަރީ ކޯޑްގެ 37 އަދި 38 ވަނަ މާއްދާއަށް ބަލައި ދެކުޅުންތެރިން ދެ މެޗަށް ސަސަޕެންޑްކޮށް، 4000 ރުފިޔާއިން ޖުރިމަނާ ކުރުމަށެވެ.

ނިއުގެ ހޮލެންޑްގެ މިޑްފީލްޑާ ޖަމެލް ރޮމާނޯ ސަސްޕެންޑް ކުރީ، މުއްކި ގައިގައި ޖަހަން ހޫރާލި ފައިން އީގަލްސްގެ އެސިސްޓެންޓް ކޯޗް އަހްމަދު ޝާކިރު (ޝާކިއްޓޭ) ގައިގައި ޖެހިފައިވާތީ ރޮމާނޯ އެ ހިންގި އަމަލަކީވެސް، ކުޅިވަރުގެ ރޫހާއި ހިލާފަށް ހައްޓަށް ހަމަލާ ދިނުމުގެ އަމަލަކަށްވާތީ ޑިސިޕްލިނަރީ ކޯޑްގެ 37 ވަނަ މާއްދާއަށް ބަަލައެވެ. އޭނާ ވެސް ދެ މެޗަށް ސަސްޕެންޑް ކުރިއިރު، 4000 ރުފިޔާއިން ޖޫރިމަނާ ކޮށްފައި ވެއެވެ.

އިމްރާން ދެ މެޗަށް ސަސްޕެންޑް ކުރިއިރު، އޭނާ ޖުރިމަނާ ކޮށްފައި ވަނީ 2000 ރުފިޔާއިން ނެވެ. އޭނާ ސަސްޕެންޑް ކޮށްފައި ވަނީ، ގަލާޑޯ އާއި މުއްކި ދެމެދުގައި ހިންގި ކުރިމަތިލުންތަކުގައި އިމްރާންގެ ދައުރެއް ވާކަމަށާއި އަދި މައްސަލަ އިތުރަށް ހޫނު ކުރުމަށް، އޭނާ މަސައްކަތް ކޮށްފައިވާތީ ކަމަށް ބުނެ އެވެ.

ދެން ސަސްޕެންޑް ކުރީ ނިއުގެ ކުޅުންތެރިޔެއް ކަމަށްވާ ސޮލާހް (ސޮލާ) އެވެ. އެ މެޗަށް ނިއުއިން އެކުލަވާލި 20 ކުޅުންތެރިންގެ ލިސްޓުން އޭނާ ފުރުސަތު ދީފަ އެއް ނުވެ އެވެ. ކުޅުންތެރިންގެ ތެރެއިން އެންމެ ގިނަ މެޗަށް ސަސްޕެންޑް ކުރީ އޭނާ އެވެ. އޭނާ އަށް ވަނީ ހަ މެޗުގެ ސަސްޕެންޝަނެއް ކުރިމަތިކޮށްފަ އެވެ.

ސޮލާ ވަނީ ސަޕޯޓަރުންގެ ބައިގައި ހުރެފައި، ދަނޑަށް އަރައި، މުއްކި އަށް ހަމަލާ ދީފަ އެވެ. އޭނާގެ އަދަބު ބޮޑުކޮށްފައި ވަނީ، އެދުވަހު ޓީމު ލިސްޓްގައި ނުހިމެނޭ ކުޅުންތެރިޔަކު ސަޕޯޓަރުންގެ ބައިގައި ހުރެފައި ދަނޑަށް އެރުމުން، އޭނާގެ ސަބަބުން އެހެން ސަޕޯޓަރުންނަށް ވެސް ދަނޑަށް އަރަށް ހިތްވަރު ލިބުނު ކަމަށް ބަލައެވެ. ސޮލާ އަށް ޖުރިމަނާގެ ފިޔަވަޅެއް އައިސްފަ އެއް ނުވެ އެވެ.

ނިމާ ސަސްޕެންޑް ކުރީ، ދަނޑަށް އަރައި، އިމްރާން އާއި ސޮލާގެ ހައްޓަށް ހަމަލާ ދީފައިވުމާއި އޭނާގެ ސަބަބުން މައްސަލަ އިތުރަށް ހޫނުވާން ދިމާވި ކަމަށް ބަލައެވެ. އޭނާ ފަސް މެޗަށް ސަސްޕެންޑް ކުރިއިރު، 8000 ރުފިޔާއިން ޖޫރިމަނާ ކުރުމަށް ވަނީ ނިންމާފަ އެވެ.

މައްސަލަ ބަލައި ނިންމުމުގައި، އެފްއޭއެމްގެ ޑިސިޕްލިނަރީ ކޮމިޓީން ބަލާފައި ވަނީ، މެޗުގެ މެޗުގެ ރޕޯޓާއި، މެޗުގެ ރިޕޯޓާއެކު ރެފްރީ ހުށަހަޅާފައިވާ ރިޕޯޓާއި، އަދި ރެފްރީ ދޭން ޖެހޭ ރިޕޯޓާއި، މައްސަލަ ހިނގިދިޔަ ގޮތުގެ ވީޑިއޯ ފްޓޭޖާއި، ނިއު އާއި އިގަލްސްއިން ހުށަހަޅާފައިވާ ފޯމާއި، ސިޓީ އަށެވެ.