މިމަހު ހަތް ވަނަ ދުވަހުގެ ރޭ އީގަލްސް އާއި ނިއުރޭޑިއަންޓް ބައްދަލު ކުރި މެޗަށް ފަހު، ދެ ޓީމުގެ ކުޅުންތެރިންނާއި އޮފިޝަލުންގެ ދެ މެދުގައި ހިނގި ކުރިމަތިލުންތަކާ ގުޅިގެން، އެފްއޭއެމްގެ ޑިސިޕްލިނަރީ ކޮމިޓީން ފިޔަވަޅު އަޅާފައިވާ، އީގަލްސްގެ އިބްރާހިމް މުބީން ރަޝިދު (މުއްކި) އާއި އެސިސްޓެންޓް ކޯޗް އަހްމަދު ނިމާދު (ނިމާ) އަށް އެޅި ފިޔަވަޅަށް، އިހްތިރާމް ކުރާކަމަށް، އީގަލްސްގެ ކޯޗް އިހްސާން އަބްދުލް ގަނީ (ސާންތީ) ބުނެފި އެވެ.
އެފްއޭއެމްގެ ޑިސިޕްލިނަރީ ކޮމިޓީން މައްސަލަ ބެލުމަށްފަހު، ރޭ ނެރެފައިވާ ރިޕޯޓްގައި ބުނެފައިވަނީ، މެޗަށް ފަހު، ދެ ޓީމުގެ ކުޅުންތެރިން ސަލާމް ކުރަމުން ދިޔަ ވަގުތު ނިއުގެ އެޑްރިއަން ގަލާޑޯ، މުއްކި ކޮއްޕާލައި ހަމަލާ ދިންކަމަށާއި ރައްދުގައި މުއްކިވެސް ގަލާޑޯގެ ފައިގައި ފައިން ޖަހުން މައްސަލަ ހޫނުވާން ދިމާވި ކަމަށެވެ.
އެއަށްފަހު، ފެންމަތިވި ކުރިމަތިލުން ތަކުގައި ހަމަނުޖެހުން ހިންގައި، އެހެން ކުޅުންތެރިންނަށް ގެއްލުން ދިނުމުން، މުއްކި ދެ މެޗަށް ސަސްޕެންޑްކޮށް ހަތަރު ހާސް ރުފިޔާއިން އިން ޖޫރިމަނާ ކުރުމަށް ޑިސިޕްލިނަރީ ކޮމިޓީން ވަނީ ނިންމާފަ އެވެ.
ނިމާއަށް ދިން އަދަބު އެއަށްވުރެ ބޮޑެވެ. އޭނާ ފަސް މެޗަށް ސަސްޕެންޑް ކުރިއިރު، 8000 ރުފިޔާއިން ވަނީ ޖޫރިމަނާ ކޮށްފަ އެވެ. ނިމާއަށް ދިން އަދަބު ބޮޑުވީ، އޭނާ ދަނޑަށް އަރައި، ނިއުގެ ގޯލްކީޕަރު އިމްރާން މުހައްމަދާއި ނިއުގެ ސޮލާއަށް ހަމަލާ ދީފައިވުމާއި އޭނާގެ ސަބަބުން މައްސަލަ އިތުރަށް ހޫނުވާން ދިމާވި ކަމަށް ބަލައެވެ.
ސާންތީ، ބުނީ އީގަލްސްގެ ކުޅުންތެރިޔެއް ވިޔަސް، އަދި ކޯޗިން ސްޓާފަކު ވިޔަސް ކުށެއް ކޮށްފިނަމަ އަދަބު ދޭން ޖެހޭނެ ކަމަށާއި، މުއްކި އާއި ނިމާއަށް ދިން އަދަބަށްވެސް ކޯޗެއްގެ ހައިސިއްޔަތުން އިހްތިރާމް ކުރާ ކަމަށެވެ.
"މުއްކި އަކީ އީގަލްސްއަށް ވަރަށް މުހިންމު ކުޅުންތެރިޔެއް، ނިމާ އަކީ އެސިސްޓެންޓް ކޯޗެއްގެ ގޮތުގައި މެޗު ގަޔާއި ޕްރެކްޓިހުގައި ވެސް ޓީމަށް ވަރަށް މުހިންމު މީހެއް، އޭނާ ނެތުމުން އަޅުގަނޑުގެ މަސައްކަތައް ވެސް އުނދަގޫ ކުރިމަތި ވާނެ، އެކަމަކު އަޅުގަނޑު މެނޭޖްމެންޓްގައި ނޭދޭނަން އެޕީލަށް ހުށަހަޅާކަށް،" ސާންތީ ބުންޏެވެ.
ސާންތީ ބުނީ، ކުރިއަށް އޮތް ތަނުގައި ވިޔަސް، ކޮންމެ ޓީމެއް ހަމަނުޖެހުން ހިންގިޔަސް، އެޓީމަކާ މެދު ފިޔަވަޅު އަޅަން ޖެހޭ ކަމަށާއި، އީގަލްސްއާ ދެކޮޅަށް އެޅި ފިޔަވަޅު އޭނާ ބަލައިގަންނަ ކަމަށެވެ.
އެ މެޗަށްފަހުވެސް، މީޑިއާ ވާހަކަ ދައްކަމުން ސާންތީ ބުނެފައި ވަނީ މެޗަށް ހުރަސް އަޅައި އަހްލާގީ ގޮތުން ދަށްފެންވަރުގެ އަމަލުތައް ހިންގާ ކުޅުންތެރިންނަށް ވެސް އީގަލްސްގައި އޭނާ އަދަބު ދޭ ކަމަށެވެ.
"އެ ކުޅުންތެރިޔަކީ ކިތަންމެ މުހިންމު ކުޅުންތެރިޔަކަށްވިޔަސް ފުޓްބޯޅައިގައި ބަލައި ނުގަނެވޭ ކަންކަން ކުރާ ކަމަށްވަންޏާ އަޅުގަނޑު ހުންނާނެ އަދަބު ދީފަ، މެޗުތަކުން އެކަހެރި ކޮށްފަވެސް ހުންނާނެ." ސާންތީ ބުނެފައި ވެއެވެ.
އެ މަޗަށް ފަހުން ހިންގި ހަމަނުޖެހުންތަކުގައި ނިއުގެ ވެސް ހަތަރު ކުޅުންތެރިޔަކަށް ޑިސިޕްލިނަރީ ކޮމިޓީން ވަނި ފިޔަވަޅު އަޅާފަ އެވެ. އެއީ ނިއުގެ ކެޕްޓަން އަދި ގޯލްކީޕަރު އިމްރާން މުހައްމަދާއި، ސްޕެއިންގެ ފޯވަޑް އެޑްރިއަން ގަލާޑޯ ހޮލެންޑްގެ މިޑްފީލްޑާ ޖަމެލް ރޮމާނޯ އާއި ސޮލާ ވެސް ވަނީ ސަސްޕެންޑް ކޮށްފަ އެވެ.
ރޮމާނޯ އާއި ޖަމެލް ދެ މެޗަށް ސަސްޕެންޑްކޮށް، އެ ދެ ކުޅުންތެރިންގެ ތެރެއިން ކޮންމެ ކުޅުންތެރިޔަކު 4000 ރުފިޔާއިން ޖޫރިމަނާ ކުރުމަށާއި އަދި އިމްރާން ދެ މެޗަށް ސަސްޕެންޑް 2000 ރުފިޔާއިން ޖޫރިމަނާ ކުރަން ވަނީ ނިންމާފަ އެވެ. ސޮލާ ވަނީ ހަަމެޗަށް ސަސްޕެންޑްކޮށްފަ އެވެ. އޭނާގެ މައްޗަށް ޖޫރިމަނާގެ ފިޔަވަޅެއް ނާޅަ އެވެ.
އެ މައްސލަ އިސްތިއުނާފް ކުރާނަމަ، އިސްތިއުނާފް މައްސަލަ، ކުރިއަށް އޮތް ހަތް ދުވަހުގެ ތެރޭގައި އެފްއޭއެމްގެ އިސްތިއުނާފް ކޮމިޓީ އަށް ހުށަަޅަން ޖެހެ އެވެ.