އެމެރިކާގެ ރައީސްގެ ހައިސިއްޔަތުން ޑޮނަލްޑް ގައުމުން ބޭރަށް ކުރައްވާ ފުރަތަމަ ދަތުރުފުޅުގައި ސައުދީ އަރަބިއްޔާއަށް މިއަދު ވަޑައިގެންފިއެވެ.
ޓްރަމްޕާއި އޭނާގެ އަނބިކަނބަލުންނަށް ސައުދީ އަރަބިއްޔާގެ ވެރިރަށް ރިޔާޒުގެ ބައިނަލް އަގުވާމީ ވައިގެ ބަނދަރުން މަރުހަބާ ވިދާޅުވީ އެގައުމުޔގެ ރަސްގެފާނު ސަލްމާން ބިން ޢަބުދުލް ޢަޒީޒު އަލް ސަޢުދު ކަމަށް ސައުދީ އަރަބިއްޔާގެ ނޫސްތަކުން ބުންޏެވެ.
ޓްރަމްޕް ކުރައްވާ އަށް ދުވަހުގެ ދަތުރުފުޅުގައި ސައުދީގެ އިތުން ދެން އޭނާ ވަޑައި ގަންނަވާނީ ބެލްޖިއަމް، އިޒްރޭލް، ވެޓިކަން ، ސިސިލީ އަދި ފަލަސްތީނަށެވެ.
ޓްރަމްޕްގެ ދަތުރުފުޅަށް ޓަކައި ސައުދީ އަރަބިއްޔާގެ ވެރިރަށް ރިޔާޒުގެ ސަލާމަތީ ކަންތައްތައް ވަނީ ވަރަށްް ބޮޑަށް ވަރުގަދަކޮށްފައެވެ.
ސަލާމަތީ ކަންތައްތައް ވަރުގަދަ ކުރުމަށް ސައުދީ އަރަބިއްޔާގެ ވެރިރަށް ރިޔާޒުގެ މަގުތަކަށް ގިނަ އަދަދެއްގެ ފުލުހުން ނެރެފައި ވާއިރު ހެލިކޮޕްޓަރުތަކުގައި ވެސް ފުލުހުން އަންނަނީ ހަރަކާތްތެެރިވަމުންނެވެ. އެމެރިކާގެ ވަފުދުގެ ބޭފުޅުން ތިއްބަވާނެ ކަމަށް ބެލެވޭ ރިޒް ކާލްޓަން ހޮޓަލުގެ ކަންތައްތައް ރިޔާޒުގައި ހުންނަ އެމެރިކާ އެމްބަސީގެ އޮފިޝަލުން ބައްލަވަމުން ގެންދަވާ ކަމަށް ވެސް ނޫހުން ބުންޏެވެ.
ޓްރަމްޕަށް މަރުހަބާ ދެންނެވުމަށް ރިޔާޒު ވަނީ ވަރަށް ބޮޑަށް ޒީނަތްތެރިވެސް ކޮށްފައެވެ.
އެމެރިކާގެ ރައީސް ޓްރަމްޕް ސައުދީ އަރަބިއްޔާއަށް ކުރައްވާ ދަތުރުފުޅުގައި މައިގަނޑު ތިން ބައްދަލުވުމެއްގައި ބައިވެރިވެ ވަޑައިގަންނަވާނެ އެވެ. އެއީ ސައުދީގެ އިސްބޭފުޅުންނާއެކު ބާއްވާ ބައްދަލުވުމަކާއި ގަލްފް ކޯޕަރޭޝަން ކައުންސިލްގެ ހަ ގައުމުގެ އޮފިޝަލުންނާއެކު ބާއްވާ ބައްދަލުމަކާއި އަރަބި އަދި އިސްލާމީ ވެރިންނާއެކު ބާއްބާ މެންދުރުގެ ފަރިއްކޮޅެކެވެ. އެ ފަރިއްކޮޅަށް 56 ބޭފުޅަކަށް ވަނީ ދައުވަތު އަރުވާފަ އެވެ.
ޓްރަމްޕާއި އަނބި ކަނބަލުން ސައުދީ އަރަބިއްޔާގެ ވެރިރަށް ރިޔާޒަށް ފައިވާ ވަޑއިގަންނަވަނީ. ފޮޓޯ: ބީބީސީ