ސައުދީ އަރަބިއްޔާއަށް ވަޑައިގެން އިސްލާމީ 56 ގައުމެއްގެ ވެރިންނާ މުހާތަބުކުރައްވައި ތަގުރީރެއް ކުރެއްވުމަށް ފަހު އެމެރިކާގެ ރައީސް ޑޮނަލްޑް ޖޭ ޓްރަމްޕް މިއަދު އިޒްރޭލަށް ވަޑައިގެންފިއެވެ.
އިޒްރޭލަށާއި ފަލަސްތީނުމީހުންގެ ސަރަހައްދުތަކަށް ޓްރަމްޕް ކުރައްވާ ދެދުވަހުގެ ދަތުރުފުޅުގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާއި ޕެލަސްޓީނިއަން އޮތޯރިޓީގެ ރައީސް މަަޙުމޫދު ޢައްބާސް އާ ބައްދަލުކުރައްވާނެއެވެ.
ފަލަސްތީނާއި އިޒްރޭލާ ދެމެދު ސުލްހައިގެ އެއްބަސްވުމެއް ގާއިމްކުރައްވަން މަސައްކަތް ކުރައްވާނެ ކަމަށްް ޓްރަމްޕް ވަނީ ކުރިން ވިދާޅުވެފައެވެ. ނަމަވެސް އެފަދަ އެއްބަސްވުމެއްގައި ހިމެނޭނެ ކަންތައްތަކާ ބެހޭގޮތުން އޭނާ ވާހަކަފުޅެއް ނުދައްކަވައެވެ. މެދު އިރުމަަތީގެ ސުލްހައަށް އެމެރިކާގެ ކުރީގެ ސަރުކާރުތަކުން ގެންގުޅުނު " ޓޫ ސްޓޭޓް ސޮލިއުޝަން" ދޫކޮށްލައްވާނެ ކަން އޭނާ ވަނީ ކުރިން ހާމަކުރައްވާފައެވެ.
ޓްރަމްޕް އިޒްރޭލަށް ވަޑައިގެންފައި މިވަނީ އޭނާގެ ސަރުކާރާ އިޒްރޭލު ސަރުކާރާ ދެމެދު ނުތަނަވަސްކަން އުފެދިފައިވާ ވަގުތެއްގައެވެ. އެ ނުތަވަސްކަން އުފެދުނީ ގުދުސްގައިވާ ވެސްޓާން ވޯލް އެއީ އިޒްރޭލު ހުންނަ ސަރަހައްދަކީ އިޒްރޭލުގެ ބައެއް ނޫން ކަމަށް އިޒްރޭލުގައި ހުންނަވާ އެމެރިކާ ސަފީރު ވިދާޅުވުމާ ގުޅިގެންނެވެ.
އިޒްރޭލުގައި ހުންނަ އެމެރިކާގެ އެމްބަސީ ގުދުސަށް ބަދަލުކުރައްވާނެ ކަމަށް ޓްރަމްޕް ވަނީ ރިޔާސީ އިންތިހާބުގެ ކެމްޕޭނުގައި ވައުދުވެވަޑައިގެންފައެވެ. އެ ވައުދު ފުއްދަވާނެ ކަމަށް އޭނާ ވަނީ ވެރިކަމަށް ވަޑައިގެން ފަހުން ވެސް ވިދާޅުވެފައެވެ.
އެމެރިކާގެ ރައީސްގެ ހައިސިއްޔަތުން ގައުމުން ބޭރަށް ކުރައްވަމުން ގެންދަވާ ދަތުރުފުޅުގައި ޓްރަމްޕް ފުރަތަމަ ވަޑައިގެންނެވި ސައުދީ އަރަބިއްޔާއަށެވެ. ހޮނިހިރު ދުވަހު ސައުދީ އަރަބިއްޔާއަށް ވަޑައިގެން އޭނާ ވަނީ މައިގަނޑު ތިން ބައްދަލުވުމެއްގައި ބައިވެރިވެވަޑައިގެންފަައެވެ. އެއީ ސައުދީ އަރަބިއްޔާ ހިމެނޭ ގޮތުން އިސްލާމީ 55 ގައުމެއްގެ ވެރިންނާއި އެކު ބޭއްވެވި ސަމިޓަކާއި ސައުދީގެ އިސްބޭފުޅުންނާއެކު ބޭއްވެވި ބައްދަލުވުމަކާއި ގަލްފް ކޯޕަރޭޝަން ކައުންސިލްގެ ހަ ގައުމުގެ އޮފިޝަލުންނާއެކު ބޭއްވެވި ބައްދަލުވުމެކެވެ.
އިޒްރޭލުގެ ބޮޑުވަޒީރު ނަތަންޔާހޫ އެމެރިކާއަށް ކުރެއްވި ދަތުރުފުޅެއްގައި އެމެރިކާގެ ރައީސް ޑޮނަލްޑް ޓްރަމްޕް އޭނާއާ ސަލާމް ކުރައްވަނީ. ޓްރަމްޕް މިހާރު ވަޑައިގެން ހުންނެވި އިޒްރޭލުގައި.