- ސިސްޓަމް ފަރުމާކުރި އެސްޓީއޯ މުވައްޒަފުން
- ސިސްޓަމްގެ ޔަގީންކަން ބައިނަލްއަގުވާމީ ފާމަކުން ބެލި
- އޭޖީއެމްގެ އިންތިޒާމު ތަކަށް ތައުރީފު ލިބުނު
އެސްޓީއޯ މުވައްޒަފުން އަމިއްލައަށް ފަރުމާ ކުރި އިލެކްޓްރޯނިކް ވޯޓިން ސިސްޓަމަކުން، އަހަރީ އާއްމު ޖަލްސާގައި ހުރިހާ ވޯޓެއްލައި، ތާރީހު ބަދަލުކޮށްލައިފި އެވެ.
ސަރުކާރާއި ރައްޔިތުން ހިއްސާވާ ކުންފުނި، އެސްޓީއޯ އިން ރޭ ބޭއްވި އަހަރީ އާއްމު ޖަލްސާގައި ފާސްކުރަން ޖެހޭ ހުރިހާ ކަމެއް ފާސްކޮށްފައިވަނީ އިލެކްޓްރޯނިކް ވޯޓިން ސިސްޓަމެއް ބޭނުންކޮށްގެންނެވެ. މީގެ ކުރިން އެހެން ކުންފުނިތަކުން ވެސް އަހަރީ އާއްމު ޖަލްސާގައި އިލެކްޓޯނިކް ވޯޓިން ސިސްޓަމް ބޭނުން ކުރަން މަސައްކަތް ކޮށްފައިވެ އެވެ. ނަމަވެސް އެންމެ ފަހު ވަގުތުގައި ކޮންމެ ވެސް ޓެކްނިކަލެއް ކަމެއް ދިމާވެ އެކަން ކާމިޔާބުވާ ގޮތް ވަނީ ނުވެފަ އެވެ.
ނަމަވެސް އެސްޓީއޯއިން ރޭ މިވަނީ އިލެކްޓޯނިކް ވޯޓިން ސިސްޓަމް އެންމެ ފުރިހަމަ ގޮތުގައި ބޭނުންކޮށްފަ އެވެ.
އެސްޓީއޯގެ އަހަރީ އާއްމު ޖަލްސާގައި ވޯޓުލުން ކުރިއަށް ގެންދިއުމަށްޓަކައި އެ ކުންފުނީގެ މުވައްޒަފުން އަމިއްލަ އަށް ވަނީ މި ސިސްޓަމް ފަރުމާކޮށްފަ އެވެ. މި ސިސްޓަމުން ވޯޓު ކުރިއަށް ދިޔައިރު، ކުރި މަތީގައި އިންނަ ސްކްރީނުން ވަގުތުން ވޯޓު ހިނގާ ނުހިނގާ ގޮތް ފެންނަން ހުއްޓެވެ. މި ސިސްޓަމުން ވޯޓު ލާފައިވަނީ ސައްހަކަން ޔަގީން ކުރުމަށް ބައިނަލްއަގުވާމީ ފާމެއްގެ ބެލުމުގެ ދަށުންނެވެ.
އަހަރީ އާއްމު ޖަލްސާގައި އިލެކްޓްރޯނިކް ވޯޓިން ސިސްޓަމެއް ބޭނުން ކުރިއިރު، ޖަލްސާގެ ކަންކަން ރޭވުމުގެ ފުރިހަމަ ކަމަށް ބައެއް ހިއްސާދާރުން ވަނީ ތައުރީފުވެސް ކޮށްފަ އެވެ.