މި އަންނަ ޖުލައި މަހު ރާއްޖޭގައި ބާއްވާ ޓްރެވަލް ޓްރޭޑް މޯލްޑިވްސް (ޓީޓީއެމް) ގައި ރާއްޖޭގެ އެންމެ ބޮޑު ލަގްޒަރީ ތިން ރިސޯޓު ބައިވެރި ވެއްޖެ އެވެ.
ޓީޓީއެމް އިންތިޒާމުކުރާ ޓްރެވަލް ފެއާ އިންތިޒާމުކުރާ މޯލްޑިވްސް ގެޓަވޭސް އިން ބުނީ ޓީޓީއެމް ފެއާގައި ބައިވެރި ލަގްޒަރީ ތިން ރިސޯޓަކީ ޝެވަލް ބްލޮންކް ރަންދެލި ރިސޯޓާއި އެސްޓީ ރީޖަސް ސެއިންޓް ރެޖިސް ވޮށްމުލި ރިސޯޓާއި ވެލާ ޕްރައިވެޓް އައިލެންޑެވެ.
ދުނިޔޭގެ އެކި ކަންކޮޅުތަކުން ޓްރެވަލް އެޖެންޓުން ބައިވެރިވާ، ޓީޓީއެމް ފެއާގައި ބައިވެރިވެރިވި ސެއިންޓް ރެޖިސް ވޮށްމުލި ރިސޯޓު ހުޅުވާފައިވަނީ މިދިޔަ އަހަރުގެ ސެޕްޓެމްބަރު މަހު އެވެ. މިއީ ދުނިޔޭގެ އެންމެ ބޮޑު ހޮޓެލް ޗެއިން ކަމަށްވާ، އެމެރިކާގެ ސްޓާވުޑްގެ އެންމެ އަގުބޮޑު ބްރޭންޑުގެ ރިސޯޓެކެވެ. އެންމެ މަތީ ފަންތީގެ ޓޫރިސްޓުންނަށް އަމާޒުކޮށްގެން ހިންގާ ވޮށްމުލީގައި 77 ވިލާ ހުރެ އެވެ. އަދި ޓީޓީއެމްގައި ބައިވެރިވި ވެލާ ޕްރައިވެޓް އައިލެންޑަކީ ދުނިޔޭގެ ފެންވަރުން ވެސް އެންމެ މަތީ ފަންތީގެ އެއް ރިސޯޓެވެ. މި ރިސޯޓުގައި އަށް ވައްތަރުގެ ވިލާ ހުރެ އެވެ. އަދި މިތަނުގައި ބޮޑު ގޮލްފް ދަނޑެއްވެސް ހުރެ އެވެ. އަދި ޝެވަލް ބްލޮންކް ރަންދެލި ރިސޯޓަކީ ދުނިޔޭގެ މަޝްހޫރު އަންނައުނު ބްރޭންޑަކުން ރާއްޖޭގައި ހިންގާ ރިސޯޓެކެވެ.
ޓީޓީއެމް ފެއާ ބާއްވަނީ މި އަހަރުގެ ޖުލައި މަހުގެ 12-13 ދެ ދުވަހު އެވެ. މި ފެއާ ބޭއްވުމުގެ މައިގަނޑު އެއް މަގުސަދަކީ ކުރިއަށް އޮތް ހަތަރު ވަރަށް އަހަރުގެ ތެރޭގައި ދެ މިލިއަން ޓޫރިސްޓުން ގެނެސް، ޓޫރިޒަމުން ލިބޭ އާމްދަނީ 3.5 ބިލިއަން ޑޮލަރަށް ގެންދިއުމުގެ އަމާޒަށް ވާސިލްވުމެވެ. މި ފެއާގައި ރާއްޖެ އާއި ރާއްޖޭން ބޭރުގެ 150 ޓްރެވަލް އެޖެންޓުންނާއި 100 ރިސޯޓު/ ޓޫރިސްޓު ހޮޓާތަކުގެ އިސްވެރިންނާއި 50 ނޫސްވެރިން އަދި ޕީއާރު ފާމްތަކުން މި ފެއާގައި ބައިވެރި ވާނެ އެވެ. މީގެ އިތުރުން މި ފެއާއަކީ އެމްއެމްޕީއާރުސީ އާއި މަޓާޓޯ އަދި މަޓީ ފަދަ ޖަމިއްޔާތައް އެންޑޯޒްކޮށްފައިވާ ފެއާ އެކެވެ.