ރޭ އެކްސިޑެންޓްވި ދޯނީގެ ކައްޕަ ހައްޔަރުކޮށް އޭނާގެ ބަންދަށް 10 ދުވަސް ކްރިމިނަލް ކޯޓުން މިއަދު ޖަހައިފި އެވެ. އަދި ދޯނީގެ ފަޅުވެރިންގެ އޭގައި ތިބި ހަތަރު ބިދޭސީން ޑީޕޯޓް ކުރަން މިއަދު ނިންމައިފި އެވެ.
ރޭ ނުރައްކާތެރި އެކްސިޑެންޓެއް ހިނގައި 15 މީހަކަށް އެކިވަރުގެ އަނިޔާވީ، ކަނޑުގަދަވުމުގެ ސަބަބުން ރީތިރަށް ރިސޯޓް ކައިރީގައި އަޅާފައި އޮތް ދޯނީގައި ލޯންޗެއް ޖެހިގެން އެވެ. ސަމާ އައިލެންޑް ރިސޯޓްގެ މުވައްޒަފުންނާ އެކު ދަތުރުކުރި އެ ލޯންޗް ދޯނީގައި ޖެހުނީ އެ ދޯނީގައި އެއްވެސް އަލިކަމެއް އަދި ނެވިގޭޝަން ލައިތްތައް ދިއްލާފައި ނެތުމުން އެވެ.
ފުލުހުން ބުނީ އެ އެކްސިޑެންޓް ހިނގުމާ އެކު ދޯނީގައި ތިބި މީހުން ފިލި ކަމަށެވެ. އަދި ކައްޕި ހައްޔަރު ކުރަން ޖެހުނީ ވެސް އެކަމުގެ ސަބަބުން ކަމަށް ވެސް ބުންޏެވެ. އިނގިފައިވާ ގޮތުގައި ދޯނީގައި ތިބި ބިދޭސީ ފަޅުވެރިންނަކީ ގަވާއިދާ ހިލާފަށް އުޅެމުން ދިޔަ ބައެކެވެ. އަދި ދޯނީގައި ސަލާމަތީ ކަންކަން ވެސް ހުރީ މުޅިން ފުރިހަމަ ނުވެ އެވެ.
އޭޑީކޭ އިން މިއަދު ބުނި ގޮތުގައި ދެ މީހެއްގެ ހާލު ވަރަށް ސީރިއަސްވެ، ފަރުވާދެމުން ދަނީ ވެންޓިލޭޓަރުގެ އެހީގަ އެވެ.