ލޭމްގެ ރައީސް ކަމަށް ވާދަވެރިކަން ބޮޑުވެއްޖެ

ރާއްޖޭގެ ސަފާރީ އޮޕަރޭޓަރުންގެ ޖަމިއްޔާ، ލިވަ ބޯޑް އެސޯސީއޭޝަން އޮފް މޯލްޑިވްސް (ލޭމް) ގެ އިންތިހާބަށް ގޮވާލުމާއެކު، ރައީސްގެ މަގާމަށް ފޯރި ގަދަ ވެއްޖެ އެވެ.

ލޭމްގެ ބޯޑުގެ ނުވަ މެންބަރުންނާއި ޓްރެޒަރާ އަދި ރައީސް އާއި ނައިބް ރައީސްގެ މަގާމަށް ކުރިމަތިލުމުގެ މުއްދަތު ހުޅުވާލާފައިވަނީ މި މަހުގެ 10 ގެ ނިޔަލަށެވެ. އިންތިހާބު އޮންނާނީ މި މަހުގެ 24 ވަނަ ދުވަހު އެވެ.

މި މުއްދަތުގައި ނަން ހުށަހަޅަން ހުޅުވާލުމާއެކު، ރައީސްގެ މަގާމަށް މިހާރު ވެސް އެ މަގާމު ފުރުއްވަމުން ގެންދަވާ ހަސަން ހަލީމްގެ އިތުރުން، އިބްރާހިމް ޝާހިދު (ޝާޑު) ވެސް ކުރިމަތިލައްވާފައިވެ އެވެ. މި ދެ ބޭފުޅުންގެ ތެރެއިން ޝާޑުއަކީ ލޭމްގެ ފައުންޑަރެކެވެ. އަދި ހަސަން އަކީ ވޭތުވެދިޔަ ދެއަހަރު އެ ޖަމިއްޔާގެ ރައީސް އެވެ. އަދި ނައިބް ރައީސްގެ މަގާމަށް ކުރިމަތިލައްވާފައިވަނީ އެ ޖަމިއްޔާގެ ފައުންޑަރުންގެ ތެރޭގައި ހިމެނި ވަޑައިގަންނަވާ އިސްމާއިލް ހަމީދެވެ، އެވެ. އަދި ޓްރެޒަރާގެ މަގާމަށް މިހާތަނަށް ކުރިމަތިލާފައިވަނީ ޓްރެޒަރާގެ މަގާމުގައި މިހާރުވެސް ހުންނެވި އަހުމަދު އަފުރާހު އެވެ.

ލޭމްއަކީ ރާއްޖޭގެ ޓޫރިޒަމްގައި އެންމެ މުހިންމު ދައުރެއް އަދާކުރާ ސަފާރީތަކާއި ލިވަ ބޯޑުތައް ތަމްސީލްކުރާ ޖަމިއްޔާ އެވެ. މި ޖަމިއްޔާ އުފައްދާފައި ވަނީ 2007 ވަނަ އަހަރުއެވެ. މި ޖަމިއްޔާގެ މެންބަރުގެ އަދަދު 150 އަށް އަރައެވެ.