އަރަބި ދުނިޔޭގައި ނަގާ ކިޔާ ގައުމުތައް ކަމަށްވާ ސައުދީ އަރަބިއްޔާއާއި ޔްނައިޓެޑް އަރަބް އެމިރޭޓްސް ( ޔޫއޭއީ) އާއި މިސްރާއި ބަހުރައިނުން ގަތަރާ ގުޅުން ކަނޑާލައިފިއެވެ.
އެގައުމުތަކުންް ގަތަރާ ގުޅުން ކަނޑައިލީ އަރަބި ދުނިޔޭގެ އެންމެ ޒަމާންވީ އެއް ހަރަކާތް ކަމަށްވާ އިޚުވާނުލް މުސްލިމީން އަށް ގަތަރުން ތާއީދު ކުރާ ކަމުގެ ތުހުމަތާއި އީރާނުން މެދު އިރުމަތީގައި ގެންގުޅޭ އެޖެންޑާއަށް ވެސް ތާއީދު ކުރާ ކަމުގެ ތުހުމަތު ކޮށްފައެވެ.
ގަތަރާއި އެގައުމުތަކާ ދެމެދު ކުރާ ވައިގެ ދަތުރުތައް ވެސް މެދު ކަނޑާލިކަން އިއުލާން ކުރުމަށް ފަހު އެގައުމުތަކުން ވަނީ އެގައުމުތަކުގައި ތިބި ގަތަރުގެ ރައްޔިތުން އެގައުމުތައް ދޫކޮށްދާން ދެ ހަފްތާގެ މުހުލަތެއް ދީފައެވެ. ޔޫއޭއީގެ ގައުމީ އެއާލައިން ' އިއްތިހާދު އެއާވޭސް ' އިން ވަނީ ގަތަރަށް ކުރާ ވައިގެ ދަތުރުތައް މާދަމާއިން ފެށިގެން ހުއްޓާލާނެކަން އިއުލާންކޮށްފައެވެ.
ސައުދީ އަރަބިއްޔާއިން ތުހުމަތުކުރާ ގޮތުގައި ގަތަރުން ދަނީ އެގައުމުގެ ނުފޫޒު ގަދަ ޓީވީޗެނަލް މެދުވެރިކޮށް، ހަނގުރާމަވެރި ޖަމާއަތްތަކުގެ ވިސްނުން ފަތުރަމުންނެވެ. އެގައުމުން އިޝާރާތްކޮށްފައި އެވަނީ އަލްޖަޒީރާ އަށެވެ.
ގަތަރުގެ ވެރިރަށް ދޯހާ. ފޮޓޯ: ރޮއިޓާސް