ދިގަލި ރިސޯޓު ހުޅުވައިިފި

ސަތޭކަ ޕަސެންޓް ދިވެހި ކުންފުންޏެއް ކަމަށްވާ ކޮރަލް އެޖް ކުންފުނިން ތަރައްގީ ކުރި ރ. ދިގަލި ރިސޯޓު ހުޅުވައި، ފުރަތަމަ ޓޫރިސްޓަށް މަރުހަބާ ކިޔައިފި އެވެ.

ކޮރަލް އެޖް ކުންފުނިން ބުނީ މަތީ ފަންތީގެ ހިދުމަތް ތަކާއެކު ދިގަލީގައި ހުޅުވި ރިސޯޓަށް މި މަހުގެ އެއްވަނަ ދުވަހު އައި ފުރަތަމަ ޓޫރިސްޓަށް އެ ރިސޯޓުން މަރުހަބާ ކިޔައިފައިވާ ކަމަށެވެ. މި ރިސޯޓު އޮޕަރޭޓްކޮށް ހިންގާނީ ވެސް އެ ކުންފުނިންނެވެ.

ވެލާނާ އިންޓަނޭޝަނަލް އެއާޕޯޓު (ވީއައި) އިން 45 މިނެޓުގެ ރާސްތާއެއްގައި ދެވޭ ދިގަލި ރިސޯޓަކީ 18.5 ހެކްޓަރުގެ ބޮޑު ރިސޯޓެވެ. މި ރިސޯޓުގައި އަށް ކެޓަގަރީގެ ކޮޓަރިތައް ހުންނާނެ އެވެ.

ދިގަލި ރިސޯޓުގައި 21 ބީޗް ބަންގަލޯ އާއި 33 ޑިލެކްސް ބީޗް ބަންގަލޯގެ އިތުރުން 62 ބީޗް ވިލާ ހުންނާނެ އެވެ.

ހިތްގައިމު އެކި ސިފަތައް ހިމަނައިގެން ޓޫރިސްޓުންގެ ހިތް ދަމައި ގަންނަ ގޮތަށް ފަރުމާއަކަށް ހަދައި ހުޅުވި މި ރިސޯޓުގައި 24 ވޯޓާ ވިލާ ވެސް ހިމެނެ އެވެ. މީގެ އިތުރުން ޕްރައިވެޓް ސުވިމިން ޕޫލާއި ރެސްޓޯރެންޓްތައް ވެސް ހަދާފައިވެ އެވެ.

ދިގަލި ރިސޯޓު ފަރުމާކޮށްފައިވަނީ ކުޑަކުދިންނާއި އާއިލާތަކަށް ވެސް އެންމެ ހިތްގައިމުކޮށް ޗުއްޓީ ހޭދަކޮށްލެވޭ ގޮތަށެވެ. މި ރިސޯޓުގައި ތިން އަހަރާއި 12 އަހަރުގެ ކުދިންނަށް ހާއްސަ ޗިލްޑްރަންސް ކްލަބެއް ވެސް ހުރެ އެވެ.

ރ. އަތޮޅުގައި އާ ރިސޯޓެއް ހުޅުވިއިރު މި އަހަރު އިތުރު ގިނަ ރިސޯޓުތަކެއް ހުޅުވަން ދަނީ ތައްޔާރުވަމުންނެވެ. ސަރުކާރުގެ އަމާޒަކީ މި ދައުރުގައި 50 ރިސޯޓު ހުޅުވުމެވެ.