އީރާނުގެ ވެރިރަށް ތެހެރާންގައިވާ އެ ގައުމުގެ ޕާލަމެންޓާއި އިންގިލާބުގެ ބާނީ އާޔަތުﷲ ޚުމައިނީގެ މަގުބަރާއަށް ބަޔަކު ހަމަލާދީ ހަތް މީހުން މަރާލައިފިއެވެ.
ތެހެރާންގެ މެެދުތެރޭގައިވާ އެ ދެ ތަނަށް އެއް ވަގުތެއްގައި ދިން ދެ ހަމަލާއަށް ފަހު އެފަދަ ތިން ވަނަ ހަމަލާއެއް ދޭން އުޅުނު ބަޔަކު ހައްޔަރު ކޮށްފައިވާ ކަމަށް އީރާނުގެ އިންޓެލިޖެންސް މިނިސްޓްރީއާ ހަވާލާދީ ރޮއިޓާސް ބުންޏެވެ. ތެހެރާންގައި ދިން ދެހަމަލާގެ ޒިންމާ އިސްލާމިކް ސްޓޭޓް ( އައިއެސް) އިން ވަނީ އުފުލާފަ އެވެ. އެ ހަމަލާއަކީ އައިއެެސް އިން ހަމަލާއަކަށް ވެއްޖެ ނަމަ އެއީ އީރާނުގައި އެޖަމާއަތުން ދިން އެފަދަ ފުރަތަމަ ހަމަލާއަށް ވާނެއެވެ.
އީރާނުގެ ޕާލަމެންޓަށް ހަމަލާ ދިނީ ފިސްތޯލަ ހިފައިގެން ހުރި މީހަކާއި އޭކޭ 47 ރައިފަލް ހިފައިގެން ތިބި ދެމީހުންނެވެ. ޚުމައިނީގެ މަަގުބަރާއަށް ހަމަލާދިން މީހުންގެ ތެރެއިން އެކަކު އޭނާގެ ގައިގައި ހަރުކޮށްފައިވާ ބޮމެއްވެސް ވަނީ ގޮއްވާލާފައެވެ.