އަންނަ މަހު ރާއްޖޭގައި ބާއްވާ ޓްރެވަލް ޓްރޭޑް މޯލްޑިވްސް (ޓީޓީއެމް) ގައި އޮންނަ " ބީއެމްއެލް ހޮޓެލިއާ ސަމިޓު" ގައި ޓޫރިޒަމް ދާއިރާގެ 100 އަށް ވުރެ ގިނަ ޕްރޮފެޝަނަލުން ބައިވެރިވެއްޖެ އެވެ.
ރާއްޖޭގެ ފުރަތަމަ ޓްރެވަލް ފެއާ އަދި ފުރަތަމަ "ހޮޓެލިއާ ސަމިޓު" އިންތިޒާމު ކުރާ މޯލްޑިވްސް ގެޓަވޭސްއިން ބުނީ ޖުލައި މަހުގެ 12 ވަނަ ދުވަހު ދަރުބާރުގޭގައި އޮންނަ ސަމިޓުގައި ހޮޓާ އަދި ރިސޯޓުތަކުގެ ވެރިންނާއި ޖެނެރަލް މެނޭޖަރުން އަދި ރެސިޑެންސް މެނޭޖަރުން ބައިވެރިވާނެ ކަމަށެވެ.
"ހޮޓެލިއާ ސަމިޓު" ގައި ރިސޯޓުތަކުގެ ތިން ޕެނަލެއް ރިސޯޓުތަކުގެ ވެރިންނާއެކު ބާއްވާއިރު، މި އިވެންޓުގައި 80 ޖީއެމް ބައިވެރިވާނެ އެވެ. މި ހަރަކާތް ވެގެންދާނީ ރާއްޖޭގައި މި ގޮތަށް ބާއްވާ ފުރަތަމަ ޓޫރިޒަމް އިވެންޓަށެވެ.
މި އިވެންޓުގައި ޓޫރިޒަމް މިނިސްޓްރީގެ އެންމެ އިސްވެރިންގެ އިތުރުން ޕެސިފިކް އޭޝިޔާ ޓްރެވަލް އެސޯސިއޭޝަން (ޕަޓާ)އަދި ޓްރެވަލް އިންޑަސްޓްރީގައި ބޮޑެތި މީޑިޔާތައް ކަމަށްވާ އެކްޕީޑިއާ އާއި ޓްރިޕްއެޑްވައިޒާގެ އިތުރުން އެއާއޭޝިޔާ އަދި އެމެރިކަން އެކްސްޕްރެސް ބައިވެރިވާނެ އެވެ.
ޓީޓީއެމް ހޮޓެލިއާ ސަމިޓު އޮންނާނީ 12 ވަނަ ދުވަހު ހެނދުނު 9:00 އިން 1:00 އަށް ދަރުބާރުގޭގަ އެވެ.
ރާއްޖޭގައި ބާއްވާ ފުރަތަމަ ހޮޓެލިއާ ސަމިޓުގައި ޓޫރިޒަމް ދާއިރާއާ ގުޅުންހުރި 150 ބައިވެރިން ބައިވެރިވެ އެވެ. މި ސަމިޓުގައި މި ދާއިރާގެ އެކި ފަރާތްތައް އެއް ތަނަކުން ބައްދަލުވެ މީޓިންތައް އެރޭންޖު ކުރާނެ އެވެ.
ޓީޓއެމް ފެއާ ބޭއްވުމުގެ މައިގަނޑު އެއް މަގުސަދަކީ ކުރިއަށް އޮތް ހަތަރު ވަރަށް އަހަރުގެ ތެރޭގައި ދެ މިލިއަން ޓޫރިސްޓުން ގެނެސް، ޓޫރިޒަމުން ލިބޭ އާމްދަނީ 3.5 ބިލިއަން ޑޮލަރަށް ގެންދިއުމުގެ އަމާޒަށް ވާސިލްވުމެވެ. މި ފެއާގައި ރާއްޖެ އާއި ރާއްޖޭން ބޭރުގެ 150 ޓްރެވަލް އެޖެންޓުންނާއި 100 ރިސޯޓު/ ޓޫރިސްޓު ހޮޓާތަކުގެ އިސްވެރިންނާއި 50 ނޫސްވެރިން އަދި ޕީއާރު ފާމްތަކުން މި ފެއާގައި ބައިވެރި ވާނެ އެވެ. މީގެ އިތުރުން މި ފެއާއަކީ އެމްއެމްޕީއާރުސީ އާއި މަޓާޓޯ އަދި މަޓީ ފަދަ ޖަމިއްޔާތައް އެންޑޯޒްކޮށްފައިވާ ފެއާ އެކެވެ. މިފެއާގެ މީޑިޔާ ޕާޓްނަރަކީ "އަވަސް" އޮންލައިން އެވެ.