ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހުލޫފްގެ 10 މަސް ދުވަހުގެ ޖަލު ހުކުމް މިއަދު ތަންފީޒްކޮށް ނިންމުމުން އޭނާ މިނިވަންވެއްޖެ އެވެ.
މަހުލީފް ޖަލުން މިނިވަންވެ ގެއަށް ވަޑައިގެންނެވީ، މިއަދު ހެނދުނު 8:30 އެހާކަންހާއިރު އެވެ. ފޭސްބުކްގައި މަހުލޫފް ވިދާޅުވެފައި ވަނީ ، ޖަލުން މިނިވަން ވީތީ އުފާކުރައްވާ ކަމަށާއި ޖަލުގައި ހުންނެވި ދުވަސްވަރު ހިތްވަރުދެއްވި އެންމެހާ ފަރާތްތަކަށް ޝުކުރު ދަންނަވާ ކަމަށެވެ. އަދި މިރޭ އެންމެންނާ ބައްދަލުވާނެ ކަމަށް އުންމީދު ކުރައްވާ ކަމަށް ވެސް މަހުލޫފް ވަނީ ވިދާޅުވެފަ އެވެ.
ފުލުހުންގެ މަސައްކަތަށް ހުރަސްއެޅިކަން ސާބިތުވެގެން މިދިޔަ އަހަރުގެ ޖުލައި މަހުގެ ތެރޭގައި މަހުލޫފްގެ މައްޗަށް އެންމެ ފުރަތަމަ އިއްވީ، ހަތަރު މަހާއި 24 ދުވަހުގެ ޖަލު ހުކުމެކެވެ. އަދި ހަމަ އެފަދަ މައްސަލަ އެއްގައި ދެވަނަ ދައުވާއެއް ސާބިތުވުމުން ހަމަ ޖުލައި މަހުގެ ތެރޭގައި މަހްލޫފްގެ މައްޗަށް ހަމަސް ދުވަހުގެ ޖަލު ހުކުމެއް ވަނީ އިއްވައިފަ އެވެ.
މަހުލޫފް މިއަދު މީޑިއާތަކަށް ވިދާޅުވީ އޭނާ އިދިކޮޅު ހަރަކާތްތަކުން ކުރިއަށް ވުރެ ބޮޑަށް ދެން ފެންނާނެ ކަމަށެވެ. އަދި އޭނާގެ ހިތްވަރަށް ބަދަލެއް ނާންނާނެ ކަމަށް ވެސް މަހުލޫފް ވަނީ ވިދާޅުވެފަ އެވެ.