އުފެއްދި ތާރީހާއި މުއްދަތު ހަމަވާ ތާރީހާއި އެނޫންވެސް ބައެއް މައުލޫމާތު އޮޅުވާލައިގެން ވިއްކަން އުޅުނު 26 ޓަނުގެ ކާނާއާއި 10000 ލީޓަރުގެ ބުއިން މިދިޔަ ރޯދަމަހު އަތުލައިގަނެވުނު ކަމަށް ސައުދީ އަރަބިއްޔާ ސަރުކާރުން ބުނެފިއެވެ.
ސައުދީ އަރަބިއްޔާގެ ފުޑް އެންޑް ޑްރަގް އޮތޯރިޓީ ( އެސްއެފްޑީއޭ) އާ ހަވަލާދީ ސައުދީ ގެޒެޓް ނޫހުން މިއަދު ބުނީ ބަރާޒުތައް ގަވައިދުން ކޮންމެ ދުވަހަކު ބަލައި ފާސް ކުރުމުގެ ކެމްޕޭނެއް އެ އިދާރާއިން ރޯދަމަހު ހިންގި ކަމަށެވެ. ގުދަންތަކަށް އިސްކަންދީގެން ހިންގި ކެމްޕޭނުގައި އަތުލައިގަނެވުނު ތަކެތީގެ ތާރީހުތައް ބަދަލުކޮށް އަލުން ބަންދު ކުރުމުގައި ބައެއް ތަކެތީގެ ބާވަތް ވެސް އޮޅުވާލާފައިވާ ކަމަށެވެ. ކެމްޕޭންގައި އިސްކަން ދީފައި ވަނީ ވެރިރަށް ރިޔާޒާއި ބަނދަރުމަތީ ރަށް ޖިއްދާ އަށާއި ދައްމާމް އަށް ކަމަށް ވެސް އެސްއެފްޑީއޭ އާ ހަވަލާދީ ސައުދީ ގެޒެޓްނޫހުން ބުންޏެވެ.
އަސްލު އޮޅުވާލާފައި ވަނިކޮށް އަތުލައިގަނެވުނު ކާނާގެ ބާވަތްތަކުގެ ތެރޭގައި ހަނޑުލާއި މެކަރޯނީއާއި ޗިލީ ސޯހާއި ޒައިތޫނި ތެޔޮ ހިމެނެއެވެ.
އެސްއެފްޑީއޭއިން ބުނެފައި ވަނީ ކާނާ އަލުން ބަންދުކޮށް، އަސްލު އޮޅުވައިލި ވިޔަފާރިތަކާ ދެކޮޅަށް ދައުވާ ކުރަން ފޮނުވުމުގެ ކުރިން އެތަންތަނާ ދެކޮޅަށް އަޅަން ޖެހޭ އިދާރީ ފިޔަވުތައް އަޅަމުންދާ ކަަމަށެވެ.
ސައުދި އަރަބިއްޔާގެ ގުދަނެއްގައިވާ ކާބޯތަކެތީގެ ބަސްތާތަކެއް. ފޮޓޯ: ސައުދީ ގެޒެޓް