އައްޑޫ ސިޓީގެ ގުޅިފައިވާ ރަށްތަކަށް ފެނަކަ ކޯޕަރޭޝަނުން ކަރަންޓު ފޯރުކޮށްދޭ ޖަނަރޭޓަރުތަކުގެ ތެރެއިން ޖަނަރޭޓަރަކަށް ދިމާވި މައްސަލައަކާ ގުޅިގެން އެ ރަށްތަކުން ކަރަންޓު ކެނޑޭނެ ކަމަށް ފެނަކައިން ބުނެފި އެވެ. މައްސަލަ ދިމާވެފައިވަނީ އެއް މެގަ ވޯޓްގެ ޖަނަރޭޓަރަކަށެވެ.
ފެނަކައިން މިއަދު ނެރުނު ނޫސްބަޔާނެއްގައި ބުނެފައިވަނީ، ޖަނަރޭޓަރަށް މައްސަލަ ޖެހިފައިވަނީ މިއަދު މެންދުރު ކަމަށާއި ޖަނަރޭޓަރަށް ދިމާވި މައްސަލަ ހައްލު ކުރެވެންދެން އެކި ސަރަހައްދުތަކުން އެކި ވަގުތުތަކުގައި ކަރަންޓު ކެނޑޭނެ ކަމަށެވެ.
މައްސަލަ ހައްލުކުރުމަށް މިހާރު ވެސް ދަނީ މަސައްކަތް ކުރަމުން ކަމަށް ފެނަކައިން ބުންޏެވެ. އަދި މިރޭގެ 9:00 ނުވަތަ 10:00 އާ ހަމައަށް މައްސަލަ ހައްލުކޮށް ކަރަންޓު ފޯރުކޮށްދެވޭނެ ކަމަށް ލަފާކުރެވޭ ކަމަށެވެ.
ކަރަންޓުގެ ހިދުމަތް އާންމު ހާލަތަކަށް ގެނެވެންދެން މަތީ ލޯޑް ނަގާ އިލެކްޓްރޯނިކް އާލާތްތައް ވީހާވެސް މަދުން ބޭނުން ކުރުމަށާއި ކަރަންޓު ބޭނުން ކުރަމުންދާ މިންވަރު މަދުކުރުމަށް ފެނަކައިން ވަނީ އައްޑޫ ސިޓީގެ ކަސްޓަމަރުންނަށް އިލްތިމާސްކޮށްފަ އެވެ.