ދަރިންގެ ހަރަދު ނުދޭ މީހުންގެ މައުލޫމާތު ބައެއް މެޖިސްޓްރޭޓް ކޯޓުތަކުން އާންމުކުރަން ފަށައިފި އެވެ.
ދަރިންނަށް ހަރަދު ދިނުމަށް ކޯޓުން ހުކުމް ކުރުމުން ހަރަދު ނުދީ އުޅޭ މީހުންނަކީ ސާބިތު ހަރަދަށް ފައިސާ ނުދައްކާ މީހެއް ކަމަށްވީ އެފަދަ މީހުންގެ މައުލޫމާތު މިހާތަނަށް ކޯޓުތަކުން އާންމުކޮށްފައެއް ނުވެ އެވެ.
އެކަމަކު އާއިލާއާ ބެހޭ ގަވައިދު އެކުލަވާލާފައިވަނީ އެފަދަ މީހުންގެ މައުލޫމާތު އާންމުކުރެވޭ ގޮތަށެވެ.
ނަމަވެސް ދަރިންގެ ހަރަދު ނުދޭ މީހުންގެ މައުލޫމާތު ފެމިލީ ކޯޓުން އަދި މިހާތަނަށް އާންމުކޮށްފައެއް ނުވެ އެެވެ.
ދަރިންގެ ހަރަދު ނުދޭ މީހުންގެ މައުލޫމާތު މިމަހުން ފެށިގެން އާންމުކުރަމުންދާ ދެ ކޯޓުގެ ގޮތުގައި ހދ. ކުޅުދުއްފުށީ މެޖިސްޓްރޭޓް ކޯޓާއި ހިންނަވަރު މެޖިސްޓްރޭޓް ކޯޓުފާހަގަކުރެވެ އެވެ.
ގަވައިދުގައިވާ ގޮތުން އެންމެ ކުއްޖެއް ނަމަ ކޯޓުން ދަރިންގެ ހަރަދުގެ ގޮތުގައި ނަގައިދެނީ މަހަކު 2،000 ރުފިޔާ އެވެ. އެއް ކުއްޖަކަށް ވުރެ ގިނަ ކުދިން ތިބި ނަމަ ކޮންމެ ކުއްޖަކަށް މަހަކު 1،000 ރުފިޔާ އެވެ.