ޕްލާސްޓިކް ކުކުޅު ބިސް ރާއްޖެ އެތެރެކޮށް ވިއްކަމުން ދާކަން ފާހަގަ ކުރެވިފައި ނުވާ ކަމަށް، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އާ ހަވާލާދީ އިކޮނޮމިކް މިނިސްޓްރީން ބުނެފި އެވެ.
އިކޮނޮމިކް މިނިސްޓްރީން މިހެން ބުނީ މިފަހުން ބައެއް ފިހާރަތަކުން ވިއްކި ބިހަކީ ޕްލާސްޓިކް ކުކުޅު ބިސް ކަމަށް ބުނެ ސޯޝަލް މީޑިއާގައި ފޮޓޯތަކާއި ވީޑިއޯތައް ދައުރުވެފައިވަނިކޮށެވެ.
އެކަމާ ގުޅިގެން އިކޮނޮޮމިކް މިނިސްޓްރީން މިއަދު ނެރުން ބަޔާނެއްގައި ބުނެފައި ވަނީ ރާއްޖެއަށް އެތެރެކޮށް ވިއްކަމުންދާ ކުކުޅު ބިހުގެ ތެރޭގައި އާޓިފިޝަލް ކުކުޅު ބިސް ނުހިމެނޭ ކަމަށް އެމްއެފްޑިއޭއިން އެ މިނިސްޓްރީއަށް އަންގާފައިވާ ކަމަށެވެ. ނަމަވެސް ބައެއް ފަރާތްތަކުން ރައްޔިތުންގެ މެދުގައި އޮޅޭ ގޮތަށް ސޯޝަލް މީޑިއާގައި އެފަދަ ވާހަކަތައް ފަތުރަމުންދާ ކަމަށާއި އެފަދަ ވާހަކަތައް ނުފެތުރުމަށް އިލްތިމާސް ކުރާ ކަމަށް މިނިސްޓްރީ އިން ބުންޏެވެ.
ކުކުޅު ބިހަކާ މެދު ޝައްކުވާނަމަ އެކަން ސަރުކާރުގެ ކަމާ ބެހޭ ފަރާތްތަކާ ހިއްސާ ކުރެއްވުމަށް ވެސް އިކޮނޮމިކް މިނިސްޓްރީން ވަނީ އިލްތިމާސް ކުރައްވާފަ އެވެ.
ސޯޝަލް މީޑިއާގެ އިތުރުން ރާއްޖޭގެ ބައެއް މީޑިއާތަކުގައި ވެސް ވަނީ ޕްލާސްޓިކް ކުކުޅު ބިސް ރާއްޖޭގައި ފެތުރެމުން އަންނަ ކަމަށް ރިޕޯޓުކޮށްފަ އެވެ. ބައެއް ފަރާތްތަކުން ތުހުމަތު ކުރާ ގޮތުން އެ ބިހަކީ ޗައިނާއިން އެތެރެ ކުރާ ކުކުޅު ބިހެވެ.