އިންޑިއާއިން ރާއްޖެ އެތެރެކުރާ ކާނާގެ ބައެއް ބާވަތްތަކުގެ ކޯޓާ އާކޮށްފި

ކާނާގެ ބައެއް ބާވަތްތައް ރާއްޖެއަށް އެތެރެކުރުމަށް އިންޑިއާއިން ކޯޓާ އާކޮށްދީފިއެވެ.

ވިޔަފާރީގެ ހަބަރުތައް ގެނެސްދޭ މަނީ ކޮންޓްރޯލް ޑޮޓްކޮމް އިން ބުނީ މިހިނގާ 2017 ވަނަ އަހަރާއި އަންނަ 2018 އަހަރު ފިޔާ، އަލުވި، ހަނޑޫ، ހަކުރު އަދި ފުށް ރާއްޖެއަށް އެކްސްޕޯޓް ކުރެވޭނެ މިންވަރު އެގައުމުގެ ޑައިރެކްޓަރޭޓް އޮފް ފޮރިން ޓްރޭޑުން ކަނޑައެޅީ މިދިޔަ އޭޕްރިލްމަހު ކަމަށް އެ އިދާރާއިން ނެރުނު އެންގުމެއްގައި ބުނެފަައިވާ ކަމަށެވެ.

އެބާވަތްތައް ރާއްޖެއަށް އެކްސްޕޯޓް ކުރަން އެންމެ ފަހުން ކޯޓާ ކަނޑައަޅާފައި ވަނީ 2014 ވަަނަ އަހަރުއެވެ. އޭރު ކަނޑައެޅީ 2015 ވަނަ އަހަރާއި 2016 ވަނަ އަހަރު އެކްސްޕޯޓް ކުރާނެ މިންވަރެވެ. މިފަހަރު ކަނޑައަޅާފައި ވަނީ 2017-2018 ގައި އެކްސްޕޯޓް ކުރާނެ މިންވަރެވެ.

އެއީ 11,714.45 ޓަނުގެ އަލުވި، 19,466.36 ޓަނުގެ ފިޔާ، 67,640.24 ޓަނުގެ ހަނޑޫ، 59,442.17 ޓަނުގެ ފުށް އަދި 11706.3 ޓަނުގެ ހަކުރެވެ.

އިންޑިއާގެ ކޮމާސް މިނިސްޓްރީގެ ދަށުން ހިންގާ ޑައިރެކްޓަރޭޓް އޮފް ފޮރިން ޓްރޭޑުން ބުނެފައި ވަނީ ކޯޓާ ކަނޑައަޅާފައި ވަނީ ރާއްޖެއާ އިންޑިއާއާ ދެމެދު އޮންނަ ވިޔަފާރީގެ އެއްބަސްވުމުގެ ދަށުން ކަމަށާއި އެހެންވީމާ އެކްޕޯޓް ރެސްޓްރިކްޝަންސް ތަކެެއް ނުހުންނާނެ ކަމަށެވެ. އާބާދީ ބޮޑު އިންޑިއާގައި އުފައްދާ ކާބޯތަކެތިން އެގައުމަށް ބައެއް ފަހަރު ނުފުދޭ ގޮތް މެދުވެރިވެއެވެ. ވިއްސާރައާއި އެނޫން ވެސް މައްސަލައަކާ ހެދި ދަނޑުވެރިކަން ހީނަރުވެއްޖެ ނަމަ އެހެން ގައުމުތަކަށް އެކްސްޕޯޓް ކުރަން ކޯޓތާ ދޫކުރާ މިންވަރު މަދުކުރެއެވެ. އަދި ބައެެއް ފަހަރު ބައެއް ބާވަތްތައް ބޭރުކުރުން މުޅިން މަނާވެސް ކޮށްފައި ވެއެވެ.

ރާއްޖެއަށް އެކްސްޕޯޓް ކުރަން 2014 ވަނަ އަހަރު ދޫކުރި ކޯޓާގައި އަދަދުތައް މަދުކޮށްފައި ވަނީ އެއުސޫލުން ކަމަށް ބެލެވެއެވެ.