ގަތަރާ ގުޅުން ކަނޑާލާފައިވާ ގައުމުތަކުން ކުރަން ހުށަހަޅާފައިވާ އެއްވެސް ކަމެއް ގަބޫލުނުކުރާ ކަމަށާއި އެއިން އެއްވެސް ކަމެއް ނުކުރާނެ ކަމަށް އެގައުމުން އިއްޔެގައި ބުނެފިއެވެ.
ސައުދީ އަރަބިއްޔާއާއި ބަހުރައިނާއި ޔުނައިޓެޑް އަރަބް އެމިރޭޓްސް އިން ހުށަހަޅާފައިވާ 13 ޝަރުތުގެ ތެރެއިން އެއްވެސް ޝަރުތަކަށް އަމަލުނުކުރާނެކަމަށް ގަތަރުން ބުނީ އެ ޝަރުތުތަކަކަށް އަމަލުކުރަން ދިން މުހުލަތު ހަމަވާން 48 ގަޑި އިރަށް ވުރެ ކުޑަ ވެފައި ވަނިކޮށެވެ.
އިޓަލީގެ ވެރިރަށް ރޯމްގައި ބޭއްވެވި ނޫސްކޮންފަރެންސެއްގައި ގަތަރުގެ ފޮރިން މިނިސްޓަރު މުޙައްމަދު ބިން ޢަބުދުއްރަޙުމާން އައް ސާނީ ވިދާޅުވީ ޝަރުތައް ހުށަހެޅި އިރުވެސް އެގައުމުތަކުގެ ބޭނުމަކީ ގަތަރުން އެކަމަށް އިންކާރު ކުރުން ކަމަށެވެ. އެންމެ 10 ދުވަހުގެ މުހުލަތެއް ދިނީވެސް އެހެންވެ ކަމަށް އޭނާ ވިދާޅުވިއެވެ.
" އެންމެނަށް ވެސް އިނގޭ މިއީ ގަތަރުގެ ދައުލަތުގެ ސިޔާދަތާ ބެހެން އަމާޒުކޮށްފައިވާ ހުށަހެޅުންތަކެއް ކަން. ވާހަކަ ދެއްކުމުގެ މިނިވަންކަން ނަގައިލުމަށާއި (ގަތަރު) އޮޑިޓް ކުރުމުގެ މެކޭނިޒަމެއް ގާއިމްކުރަން ކަން ވެސް،" މުޙައްމަދު ވިދާޅުވި ކަމަށް އަލް ޖަޒީރާގެ ހަބަރުގައި ވެއެވެ.
މުޙައްމަދު ވިދާޅުވެފައި ވަނީ ހުށަހެޅުންތަކަށް ބޯ ނުލަނބައިގެން އަސްކަރީ ފިޔަވަޅު އަޅާފާނެތީ ގަތަރުން ބިރު ނުގަންނަ ކަމަށެވެ.
ޓެރަރިޒަމަށް ވާގިދޭ ކަމަށް ބުނެ އަރަބި ގައުމުތަކުން ގަތަރާ ގުޅުން ކަނޑައިލީ މިދިޔަ ޖޫން މަހުގެ ހަތަރުވަނަ ދުވަހުއެވެ. އެއަށް ފަހު އެގައުމުތަކުން ވަނީ 13 ކަމެއް ކުރަން ގަތަރަށް ހުށަހަޅާފައެވެ. އީރާނާ ސިޔާސީ ގުޅުން ކަނޑައިލުމާއި ގަތަރުގައިވާ ތުރުކީގެ އަސްކަރީ މަރުކަޒުތައް ބަންދުކުރުމާއި އަލް ޖަޒީރާ ބަންދުކުރުން އޭގެ ތެރޭގައި ހިމެެނެ އެވެ.