ޝެލް ބީންސް ކުރިމަތިން ފަޅު ތެރޭގައި އޮތް ރިސޯޓެއްގެ ލޯންޗެއްގައި އަލިފާން ރޯވެ އެ ލޯންޗް އެކީ އަނދައި އޭގައި ތިބި ހަތަރު މީހުން ފިހިއްޖެ އެވެ.
އެމްއެންޑީއެފްގެ އިންފޮމޭޝަން އޮފިސަ ކެޕްޓަން އިބްރާހިމް އާޒިމް ވިދާޅުވީ އެ ހާދިސާ ހިނގި ކަމަށް ރިޕޯޓުކޮށްފައި ވަނީ މިއަދު 2:15 ގައި ކަމަށާއި އެ މައުލޫމާތު ލިބުމާ ގުޅިގެން ސިފައިން އެ ސަރަހައްދުގައި ހަރަކާތްތެރިވެ އަލިފާންގަނޑު ނިއްވާލާފައިވާ ކަމަށެވެ. އަދި އެ ހާދިސާގައި ލޯންޗްގައި ތިބި ހަތަރު މީހަކު ފިހިފައިވާ ކަމަށް އޭނާ ވިދާޅުވި އެވެ. އައިޖީއެމްއެޗުން އެހަތަރު މީހުންނަށް ވެސް ފަރުވާދޭ އިރު އެއްވެސް މީހެއްގެ ހާލު ސީރިއަސްއެއް ނޫނެވެ.
އާޒިމް ވިދާޅުވީ ގޮތުގައި ލޯންޗުގައި އަލިފާން ރޯވިއިރު އޭގެ ތެރޭގައި ހަތަރު މީހަކު ތިއްބެވެ. އަދި އެ ހާދިސާ ހިނގުމުން އެ ހަތަރު މީހުން މޫދަށް ފުންމާލާފައިވާ ކަމަށެވެ.
ލޯންޗުން އަލިފާންގަނޑު ނިއްވާލާފައިވާ އިރު ލޯންޗު އޮތީ ބޭނުން ނުކުރެވޭ ވަރަށް އަނދާ ހުލިވެފަ އެވެ. ނަމަވެސް އަދި ފުލުހުންނާއި ސިފައިން އަންނަނީ އެ ހާދިސާ ހިނގައިދިޔަ ގޮތް ބަލައި ތަހުގީގު ކުރަމުންނެވެ.
ރޯވި ލޯންޗަކީ ސަންލޭންޑު ރިސޯޓުގެ ލޯންޗެކެވެ. އަދި އެ ލޯންޗުގެއެއް އެއް ފަޅީގައި "މަކުނުދޫ" ޖަހާފައި ހުއްޓެވެ. އެނގިފައިވާ ގޮތުގައި ލޯންޗުގައި ރޯވީ ފަތުރުވެރިންތަކެއް ގޮވައިގެން މާލެ އައިސް އެމީހުން ބޭލުމަށް ފަހު ލޯންޗް ފަޅުގައި އަޅަން އުޅެނިކޮށެވެ.