އާންމު ސިއްހަތާއި ބެހޭ މައުލޫމާތު ދެނެގަނެ އެނީމިއާ އަށް ޓެސްޓުކުރުމަށް ކުރިއަށް ގެންދާ ޑިމޮގްރަފިކް ހެލްތު ސާވޭ ރޯދަމަހަށް މެދުކަނޑާލުމަށްފަހު މިއަދު ފަށައިފި އެވެ.
އެ ސާވޭ އަކީ އުމުރުން 15 އަހަރާއި 49 އަހަރާއި ދެމެދުގެ މީހުން އަދި އުމުރުން ފަސް އަހަރުން ދަށުގެ ކުޑަކުދިންގެ ސިއްހަތު ދެނެގަތުމަށް ކުރިއަށް ގެންދާ ސާވޭ އެކެވެ. ސާވޭ މެދުކަނޑާލިއިރު ކ. އަތޮޅުން ފެށިގެން ތ. އަތޮޅުގެ ހުރިހާ ރަށެއްގައި އެ ސާވޭ ވަނީ ކުރިއަށް ގެންގޮސްފަ އެވެ. އަދި މިއަދު ފެށި ސާވޭގެ ދެވަނަ ބުރުގައި ދެކުނުގެ ބާކީ ހުރިހާ އަތޮޅެއްގައި ކުރިއަށް ގެންދާނެ އެވެ.
އެ ސާވޭ ކުރިއަށް ގެންދަން ހަމަޖެހިފައިވަނީ ރާއްޖޭގައި މީހުން ދިރިއުޅޭ ހުރިހާ ރަށެއްގަިއ ގުރުއަތުން ހޮވާލެވޭ ގޭބިސީތަކެއްގަ އެވެ. ހެލްތު މިނިސްޓްރީން ބުނީ އެ ސާވޭއިން ލިބޭ މައުލޫމާތުތަކަށް ބެލުމަށްފަހު ރާއްޖޭގެ މައިގަނޑު ސިއްހީ ހާލަތު ދެނެގަނެވި ކުރިއަށް އޮތްތަނުގައި ސިއްހީ މިންގަނޑުތައް ކަނޑައަޅަންވީ ގޮތް ދެނެގަނެވޭނެ ކަމަށެވެ.
މީގެއިތުރުން އެ މައުލޫމާތުތައް އ.ދ ގެ ޖަމިއްޔާތަކާއި ސިއްހަތާއި ގުޅުންހުރި ސަރުކާރުގެ އެހެން އިދާރާތަކުގައިވެސް ބޭނުންކުރާނެ ކަމަށެވެ. އަދި އެމައުލޫމާތުތަކަށް ބަލައި ބައިނަލްއަގްވާމީ ފެންވަރުގައި ރާއްޖެ އޮތް ހާލަތު ވަޒަންކުރެވޭނެ ކަމަށާއި ސާސްކަޕްގެ ތަރައްގީގެ ލަނޑުދަނޑިތައް ހާސިލްވެފައިވާ މިންވަރު އަންގައިދިނުމާއި އދ. އިން މިހާރު ކަނޑައަޅާފައިވާ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލްކުުރުމުގެ މަސައްކަތްތައް ފެށޭއިރު ރާއްޖޭގެ ބޭސްލައިން ހާލަތުގެ ސިއްހަތާއި ބެހޭ މައުލޫމާތުވެސް އެ ދިރާސާއިން ފޯރުކޮށްދެވޭނެ ކަމަށެވެ.
ހެލްތު މިނިސްޓްރީންވަނީ އެ ސާވޭ އަށް އެއްބާރުލުން ދިނުމަށް ރައްޔިތުންގެ ކިބައިން އެދިފަ އެވެ.