ބޮޑެތި ޖަލު ހުކުމްތަކެއް އައިސްފައިވާ ކުރީގެ ނައިބު ރައީސް އަހުމަދު އަދީބު، ޑޮކްޓަރަށް ދެއްކުމަށް މާލެ ގެނެސްފި އެވެ.
މިއަދު ހެނދުނު 9:00 ހާއިރު އަދީބު މާލެ ގެނެސްފައި ވަނީ ޓީ ޖެޓީ ސަރަހައްދުންނެވެ. އެއަށް ފަހު ފުލުހުންގެ ވެހިކަލްތަކުން ވަނީ ސީދާ އައިޖީއެމްއެޗް އަށް އަދީބު ގެންގޮސްފަ އެވެ. ނަމަވެސް މިކަމާ ގުޅޭ ގޮތުން އެއްވެސް މައުލޫމާތެއް ހާމަ ކުރެވެން ނެތް ކަމަށެވެ.
އަދީބު ޑޮކްޓަރަށް ދައްކަން ގެނެސްފައިވާ އިރު އަދީބުގެ ސިއްހީ ހާލަތާ ގުޅޭ ގޮތުން އާއިލާއިން ވަނީ ކަންބޮޑުވުން ފާޅުކޮށްފަ އެވެ. އެގޮތުން އަދީބުގެ އެތެރެ ހަށީގައި ސިސްޓެއް އުފެދިފައިވުމާއި ކިޑްނީގައި ހިލަ އުފެދިފައިވާ ކަމަށް އާއިލާއިން ވަނީ ބުނެފަ އެވެ. އޭގެ އިތުރުން ލޮލުގެ ވަރަށް ނުރައްކާތެރި ބައްޔެއް ކަމަށްވާ "ގްލޮކޮމާ" ޖެހިފައިވާކަން މާލެއިން ކުރިން ހެދި ޓެސްޓްތަކުން ކަށަވަރުވެފައިވާ ކަމަށް ވެސް އާއިލާއިން ވަނީ ބުނެފަ އެވެ.
އަދީބަށް ބޮޑެތި ސިއްހީ މައްސަލަތަކެއް ކުރިމަތިވެފައިވާ ކަަމަށް ބުނެ ބޭރަށް ގޮސް ފަރުވާ ހޯދުމަށް ހުއްދަ ދިނުމަށް އާއިލާއިން އެދިފައިވީ ނަމަވެސް ސަރުކާރުން ބުނެފައިވަނީ އަދީބު ބޭރަށް ފޮނުވައިފިނަމަ ފިލައިދާނެ ކަމަށެެވެ.