އަދިވެސް ހުންނެވީ އަންނަ އަހަރު ބާއްވާ ރިޔާސީ އިންތިހާބުގައި ވާދަކުރެއްވުމަށް ތައްޔާރަށް ކަމަށާއި އެކަމުގައި ކުރީގެ ރައީސް މައުމޫން އަބްދުލް ގައްޔޫމްގެ ތާއިދު ލިބޭނެކަމާމެދު އެއްޗެއް ދަންނަވަން އަދި އަވަސް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު މިހެން ވިދާޅުވެފައިވަނީ، އުމަރު ފިޔަވައި އެހެން ހުރިހާ އިދިކޮޅު ސިޔާސީ ލީޑަރުން އެއް ތަނަކަށް ޖަމާވެ، އެކުގައި މަސައްކަތް ކުރައްވަމުންދާ ދަނޑިވަޅެއްގަ އެވެ. އަދި، ޖުމްހޫރީ ޕާޓީ އާއި އެމްޑީޕީ އާއި އަދާލަތު ޕާޓީ އަދި ރައީސް މައުމޫން ގުޅިވަޑައިގެން އުފައްދާފައިވާ އިއްތިހާދުން އެއް ކެނޑިޑޭޓެއް އަންނަ ރިޔާސީ އިންތިހާބަށް ނެރުމުގެ ވާހަކަތައް ދެކެވެން ފަށާފައިވާ ވެސް ދަނޑިވަޅެއްގަ އެވެ.
އަވަސްއާ ވާހަކަ ދައްކަވަމުން އުމަރު ވިދާޅުވި ގޮތުގައި އެމްޑީޕީ ހިމެނޭ ކޯލިޝަނަކުން ނެރޭ ކެނޑިޑޭޓަކަށް އޭނާ ނުވާނެ އެވެ. އުމަރު އަންނަ ރިޔާސީ އިންތިހާބަށް މިހާރު ވެސް ކެމްޕެއިން ކުރައްވަމުންދާއިރު ކެމްޕެއިން ކުރައްވަނީ އެއްވެސް ޕާޓީއަކާ ނުލާ އަމިއްލައަށް ކަމަށް އޭނާ ވިދާޅުވި އެވެ.
އުމަރު ވިދާޅުވީ، އިދިކޮޅު ހުރިހާ ލީޑަރުން ގުޅިގެން މަސައްކަތް ކުރެއްވި ނަމަވެސް، އެމްޑީޕީ އެ ފަރާތްތަކާއެކު އޮތްހާ އިރެއްގައި އެ އިއްތިހާދަކާ އޭނާ ނުގުޅޭނެ އެވެ. ސިޔާސީ މަޝްރަހު އޮތް ގޮތުން އަންނަ އިންތިހާބުގައި ރައީސް މައުމޫންގެ ތާއިދު ލިބޭނީ އެމަނިކުފާނު ލީޑްކުރައްވާ އިދިކޮޅު އިއްތިހާދުގެ ކެނޑިޑޭޓަށްވުން ގާތް ކަމަށް އުމަރު ވިދާޅުވި އެވެ.
އެންމެފަހުން ބޭއްވި ޕީޕީއެމްގެ ރިޔާސީ ޕްރައިމަރީގައި ވެސް ބައިވެރިވެވަޑައިގެންނެވި އުމަރު ވިދާޅުވީ، އިންތިހާބުގައި ރައީސް މައުމޫންގެ ތާއިދު އޭނާއަށް ލިބިދާނެ ކަމަށް ދަންނަވަން އަދި މާ އަވަސް ކަމަށެވެ. އުމަރު ވިދާޅުވެފައިވާ ގޮތުން ސިޔާސީ ގޮތުން ބޮޑެތި ބޭބޭފުޅުން އުމަރާ ގުޅިވަޑައިގަންނަވާނެ އެވެ.
އެމްޑީޕީއާއެކު ރައީސް މައުމޫން މަސައްކަތްކުރައްވައިފިނަމަ އެ ޕާޓީއަށް "އޮކްސިޖަން" ލިބި، އަންނަ ރިޔާސީ އިންތިހާބު ކާމިޔާބުކޮށް، ވެރިކަމަށް އެމްޑީޕީ އައުމުގެ ފުރުސަތު ފުޅާވެގެންދާނެ ކަމަށް އުމަރު ވިދާޅުވި އެވެ. އުމަރު ވިދާޅުވި ގޮތުގައި އޭރަށް "މި ވަޅުގަނޑުން އަރައި އަނެއް ވަޅުގަނޑަށް" ވެއްޓޭނެ އެވެ.
މިހާރު އިދިކޮޅުގައި ތިއްބެވި ގިނަ ލީޑަރުންނަށް އަންނަ ރިޔާސީ އިންތިހާބުގައި ވާދަކުރެވޭނެ މަގު ބަންދުވެފައިވާއިރު، އިދިކޮޅު ފަރާތްތަކުން އަދި ވަނީ އެ އިންތިހާބަށް ނެރޭނެ ކެނޑިޑޭޓެއް ކަނޑަނާޅަ އެވެ. އެކަމުގެ މަޝްވަރާތައް ވެސް ނުކުރެ އެވެ. އެމްޑީޕީގެ ރައީސް މުހައްމަދު ނަޝީދަށް ކުރިމަތި ނުލެވިއްޖެނަމަ މުޅިން އާ ރިޔާސީ ކެނޑިޑޭޓެއް ފެނިގެންދިޔުން ވަރަށް ގާތެވެ. ރައީސް އަބްދުﷲ ޔާމީން މިހާރު ވަނީ ދެވަނަ ދައުރަކަށް ކެމްޕެއިން ފައްޓަވާފަ އެވެ.