އިނގިރޭސިވިލާތަށް އަމިއްލަފުޅަށް އަރުވާލެވިގެން ހުންނެވި، ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދުގެ ބޮޑެތި ފާޑުކިޔުންތަކެއް ބަންޑާރަ ނައިބު މުހައްމަދު އަނިލްއަށް އަމާޒުވެއްޖެ އެވެ.
ޖަމީލުގެ ފާޑުކިޔުންތައް އަނިލްއަށް އަމާޒުވީ ރައްޔިތުންގެ މަޖިލީހުގެ މެންބަރުން ޕާޓީން ވަކިވިޔަސް ނުވަތަ ވިޕްލައިނާ ހިލާފު ވިޔަސް ގޮނޑި ގެއްލޭނެ ކަމަށް ކަނޑައަޅައިދިނުމަށް ދައުލަތުގެ ފަރާތުން ބަންޑާރަ ނައިބު މުހައްމަދު އަނިލް ސުޕްރީމް ކޯޓަށް ހުށަހަޅަން އުޅޭ ކަމުގެ އަޑުފެތުރިފައިވާ ދަނޑިވަޅެއްގަ އެވެ.
އެކަމާ ގުޅޭ ގޮތުން ޖަމީލު މިއަދު ކުރެއްވި ޓްވީޓެއްގައި ވިދާޅުވެފައި ވަނީ އެޓާނީ ޖެނަރަލްއަކީ ގާނޫނުގެ ނިޒާމްތައް ހަލާކުކޮށް ރާއްޖޭގެ ޑިމޮކްރަސީ ފުނޑާލަން ފޫގަޅާފައިވާ މީހަކަށް ވެފައިވާ ކަމަށާއި އެއީ ދަށު ދަރަޖައިގެ އަމަލެއް ކަމަށެވެ. އަދި ކޯޓުތަކަކީ ސިޔާސީ ފޭރާން ދޮންނަ ލޯންޑްރީ އެއް ނޫން ކަމަށާއި މަޖިލީހުން ބަލިވުމާއި ރައްޔިތުންގެ ވޯޓު ނުލިބުމަކީ ކޯޓުން ހައްލު ނެރެންވީ ކަމެއް ނޫން ކަމަށް ވެސް ޖަމީލު ވިދާޅުވި އެވެ.
މިދިޔަ މޭ މަހުގެ ތެރޭގައި އަނިލް ވަނީ އެކަށީގެންވާ ސަބަބެއް ނެތި އިތުބާތު ނެތް ކަމުގެ ވޯޓު ނުނެގޭނެ ގޮތް ހެދުމަށް ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފި އެވެ. އެ މައްސަލާގައި ކޯޓުން ކުރި ހުކުމުގައި ބުނެފައި ވަނީ ރައްޔިތުންގެ މަޖިލީހުން ފާސްކުރާ އިތުބާރު ނެތް ކަމުގެ މައްސަލަތަކުގައި ފަހު ގޮތް ނިންމާނީ ސުޕްރީމް ކޯޓުން ކަމަށެވެ.