ކުރީގެ ރައީސް މައުމޫން އަބްދުލް ގައްޔޫމް މިރޭ ސިންގަޕޫރަށް ފުރާވަޑައިގެންފި އެވެ. އެނގިފައިވާ ގޮތުގައި ރައީސް މައުމޫން ވަޑައިގަންނަވަނީ އާއިލީ ސަބަބެއްގަ އެވެ.
މީގެ ކުރިން ވެސް ރައީސް މައުމޫން ވަނީ ގިނަ ދުވަސްތަކެއް ވަންދެއް އިންޑިޔާގައި ހޭދަ ކުރައްވާފަ އެވެ. އޭރު އިންޑިޔާއަށް ވަޑައިގަތީއެމަނިްކފާނުގެ އަނބިކަނބަލުން ނަސްރީނާ އިބްރާހީމްގެ ކޮއްކޯފުޅު ފަރީޝާ އިބްރާހިމް ކެންސަރަށް ފަރުވާ ހޯއްދަވަން ރާއްޖެއިން ބޭރުގައި ހުރުމުންނެވެ.
ރައީސް މައުމޫން ބޭރަށް ވަޑައިގަންނަވަނީ އެންޓި ކޮރަޕްޝަން ކޮމިޝަން (އޭސީސީ)އިން އެމަނިކުފާނުގެ ބަޔާނެއް ނެގުމަށް މަސައްކަތް ކުރަމުންދާ ދަނޑިވަޅެއްގަ އެވެ. ނަމަވެސް، އޭސީސީއިން އެމަނިކުފާނު ބަޔާން ދެއްވަންވީ ގޮތެއް، ދެއްވަންވީ ދުވަހެއް އަންގަވާފައެއް ނުވެ އެވެ. ރައީސް މައުމޫން ވަނީ އޭސީސީއަށް ސިޓީއަކުން އެމަނިކުފާނުގެ ދަތުރުފުޅުގެ މައުލޫމާތު ހިއްސާކުރައްވާފަ އެވެ. އަދި އެ ދަތުރުފުޅަށްފަހު ބަޔާން ދެއްވާނެ ކަމަށް ވެސް ސިޓީގައި ވިދާޅުވެފައިވެ އެވެ. އެ ސިޓީގައި ރައީސް މައުމޫން ވިދާޅުވެފައިވާ ގޮތުން ރާއްޖެއިން ބޭރުގައި އެމަނިކުފާނު ހޭދަކުރައްވަނީ 10 ވަރަކަށް ދުވަހެވެ.