މާލޭގައި ރޭ ހިނގި މާރަމާރީގެ ތެރޭގައި ދެ ކުޑަ ކުއްޖެއް ގަޔަށް ވަޅި ހަރާފައިވާ ކަމަށް ފުލުހުން ބުނެފި އެވެ.
ފުލުހުންގެ މީޑިއާ އޮފިޝަލަކު މިއަދު ވިދާޅުވީ ރޭގެ ވަގުތެއްގައި ދެ ކުއްޖަކަށް ތޫނު އެއްޗަކުން ހަމަލާދީ ޒަހަމްކޮށްލާފައިވާ ކަމަށެވެ. އޭގެ ތެރޭގައި އުމުރުން 16 އަހަރުގެ ކުއްޖެއްގެ ބުރަކަށްޓަށް ވަޅި ހަރާފައިވާ ކަމަށާއި އުމުރުން 17 އަހަރުގެ ކުއްޖެއްގެ އަރިކައްޓަށް ވަޅިހަރާފައިވާ ކަމަށެވެ. އަދި އެ މައްސަލަ ތަހުގީގު ކުރަމުން އަންނަ ކަމަށް ފުލުހުން ބުންޏެވެ.
މި މައްސަލާގައި މިހާތަނަށް މީހަކު ހައްޔަރުކޮށްފައިވާ ކަމެއް ސާފެއް ނުވެ އެވެ. ނަމަވެސް ފުލުހުން ރޭ ވަނީ ބޮޑު އޮޕަރޭޝަނެއް މާލެ ތެރޭގައި ކުރިޔަށް ގޮސް ދެ ގްރޫޕެއް ހިމެނޭ ސަރަހައްދެއްގައި ހަރަކާތްތެރިވެފަ އެވެ.
އެ މާރަމާރީތައް ފެށުނީ އިއްޔެ ހަވީރުގެ ވަގުތެއްގައި ކުޑަ ކުދިންތަކެއް ލަކުޑިބުރިތައް ހިފައިގެން ހިންގި މާރަމާރީއެއްގައި މީހެއްގެ ބޯފަޅާލި ހިސާބުންނެވެ. ފުލުހުން ބުނީ އެ މައްސަލަ ވެސް ތަހުގީގު ކުރަމުން އަންނަ ކަމަށެވެ.
ރޭ ޒަހަމްވީ ދެ ކުދިންނަށް ސެނަހިޔާއިން ފަރުވާ ދީފައިވާ ކަމަށާއި އެ ދެ ކުދިންގެ ހާލު ރަނގަޅު ކަމަށް ފުލުހުން ބުންޏެވެ.