ރައްޔިތުން މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް މައްސަލަ ނާކާމިޔާބުކޮށްލުމަށް ސަރުކާރުން ފަށާފައިވާ އާ ގޭމް ޕްލޭން ވެސް ދަނީ ނާކާމިޔާބުވަމުން ކަމަށް އިދިކޮޅު އިއްތިހާދުން ބުނެފި އެވެ.
އިދިކޮޅު ޕާޓީތަކުން ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ފަރާތުން އެ ޕާޓީގެ ޗެއާ ޕާސަން ހަސަން ލަތީފް ވިދާޅުވީ ސަރުކާރުން އާ ގޭމް ޕްލޭންއަކަށް ކުޅެން ފެށިފަހުން އެންމެ ފާޅުކަން ބޮޑު ގޮތެއްގައި ކުރަމުން އަންނަނީ އިދިކޮޅު ފަރާތްތަކާ ގުޅުނު މަޖިލީސް މެންބަރުން އަނބުރާ ހޯދުމަށް ކުރާ މަސައްކަތް ކަމަށެވެ. އޭގެ އިތުރުން އިދިކޮޅު އިއްތިހާދުގައި ބައިބައިވުން އުފެއްދުމުގެ ބޭނުމުގައި ފޭކު ވައިބާ ގްރޫޕްތައް ހަދާ ހަބަރު ފަތުރަމުންދާ ކަމަށެވެ.
ނަމަވެސް އެއާ ހިލާފަށް އިދިކޮޅާ ގުޅުނު މެންބަރުން ކޮންމެ ދުވަހަކު އަންނަނީ ޕީޕީއެމްއިން ވަކިވަމުން ކަމަށާއި އެ ޕާޓީގައި ހުރި މައްސަލަތައް ހާމަ ކުރަމުން ކަމަށެވެ. އެހެންކަމުން އެ ގޭމް ޕްލޭންވެސް ނާކާމިޔާބު ވަމުން އަންނަ ކަމަށް ހަސަން ވިދާޅުވި އެވެ.
"ސަރުކާރު މެންބަރުން ރައީސް ޔާމީންއަށް އޮތް ތާއީދު ދޫކޮށްލަވާ އުސޫލީ މައްސަލަތައް ހުރިކަން ފާހަގަ ކުރައްވާ. އަދި ވަރަށް ފާޅުގައި ބުނަމުން އަންނަނީ ސަރުކާރާ ގުޅިވަޑައި ނުގަންނަވާނެ ކަމަށް. އެހެންވެ މަސީހުގެ ވޯޓަށް ކުރަމުން އަންނަ މަސައްކަތް ނާކާމިޔާބު ވަމުން އަންނަތަން ވަރަށް ސާފުކޮށް އެބަ ފެނޭ،" ހަސަން ވިދާޅުވި އެވެ.
އެ ބައްދަލުވުމުގައި ބައިވެރިވެ ވަޑައިގަތް ރައީސް މައުމޫންގެ ދަރިކަނބަލުން ޔުމްނާ މައުމޫން ވިދާޅުވީ އިދިކޮޅު ފަރާތްތަކުން ކުރާ އިސްލާހީ މަސައްކަތް ހުރަސް އެޅުމަށް ދައުލަތުގެ އެކި މުއައްސަސާތަކުން މަޖިލީސް މެންބަރުންނަށް ބިރު ދެއްކުން ހުއްޓާލަން ޖެހޭ ކަމަށާއި ގާނޫން އަސާސީއަށް ހުރުމަތްތެރިކޮށް ހިތަން ޖެހޭ ކަމަށެވެ. އަދި އެންޓި ކޮރޮޕްޝަން ކޮމިޝަން (އޭސީސީ)އަށް ރައީސް މައުމޫން ހާޒިރު ކުރަނީ ވެސް އެ މަސައްކަތް މަޑު ޖައްސާލުމުގެ ގޮތުން ކަމަށް ޔުމްނާ ވިދާޅުވި އެވެ.
"ޕާޓީތަކުގެ މަޖިލީސް މެންބަރުންނާ ކައުންސިލް މެންބަރުންނާ އެކިއެކި ބޭފުޅުން މުއައްސަސާތަކަށް ގެންގޮސް ތަހުގީގު ކުރުމޭ ކިޔާފަ އެކި އުނދަގޫތައް އެބަ ކުރިމަތި ކުރައްވާ. އެހެންވެ އެކަން ހުއްޓާލަން އަޅުގަނޑު ގޮވާލަން،" ޔުމްނާ ވިދާޅުވި އެވެ.
މަސީހުގެ އިތުބާރު ނެތް މައްސަލަ މަޖިލީހުން އަދި އެޖެންޑާއެއް ނުކުރެ އެވެ. ނަމަވެސް އިދިކޮޅު ފަރާތްތަކުން ބުނަމުން އަންނަނީ މި މަހުގެ 24 ވަނަ ދުވަހަށް އެ ޖަލްސާ ބާއްވަން ޖެހޭނަ ކަަމަށެވެ. އަދި އޭގެ ކުރިން އަތޮޅުތަކު ތެރެއަށް ގޮސް ރައްޔިތުންގެ ތާއީދު އެ ވޯޓަށް ހޯދުމުގެ މަސައްކަތް ވެސް ކުރާނެ ކަމަށް އެ ފަރާތްތަކުން ބުނެ އެވެ.