ރީތި ފިލްމުތަކަކާއެކު މިދިޔަ އަހަރު ނިމި މި އަހަރު ފެށިގެން އައީވެސް ރީތި ފިލްމުތަކަކާ އެކުގަ އެވެ. ރީތި ފިލްމުތަކަކަށްފަހު ރޯދަ މަހަށް މެދުކަނޑާލުމަށްފަހު ދެން އޮތީ އަހަރުގެ ބޮޑު ފިލްމެވެ. ނޯޓީ 40 އެވެ. އެ ފިލްމު ރިލީޒްކުރަން ހަމަޖެހިފައިވަނީ އަންނަ މަހުގެ ދެ ވަނަ ދުވަހު އެވެ.
މިއަދުން ފެށިގެން އޮލިމްޕަހުން ނޯޓީ 40 ފެ ޓިކެޓް ވިއްކާއިރު ޕްރިމިއާ ޝޯގެ ޓިކެޓް ގަންނަ ފަރާތްތަކަށް ވަރަސް ހާއްސަ އިނާމެއް އެބައޮތެވެ. ގުރުއަތެއް ނަގައިގެންނެއް ނޫނެވެ. ޓިކެޓް ގަންނަ ހުރިހާ ފަރާތްތަކަށެވެ. އެ ހަދިޔާ އަކީ މިދިޔަ އަހަރު އަހަރުމެން ހެއްވާލި "ބައިވެރިޔާ" އަލުން ބެލުމުގެ ފުރުސަތެެވެ. އެކަމަކު ޕްރިމިއާ ޝޯގެ ޓިކެޓް އެހެން ޝޯތަކަށްވުރެ އަގުބޮޑެވެ. ޕްރިމިއާ ޝޯގެ ޓިކެޓެއް 200 ރުފިޔާއަށް ވިއްކާއިރު އެހެން ޝޯތަކުން ޓިކެޓެއްގެ އަގި އުޅެނީ 100 ރުފިޔާ އަށެވެ. އަވަހަށް ޓިކެޓް ގަންނަން އުޅޭށެވެ.
ޓިކެޓް ވިއްކަން ހަމަޖެހިފައިވާ ގަޑިތަކަކީ އަދި މިއަދު މެންދުރުފަހު ދެއެއް ޖަހާ އިރު އެވެ. އަދި ރޭގަނޑު އަށަކުން 10 އަކަށްވެސް އޮލިމްޕަހުގައި ޓިކެޓް ވިއްކާނެ އެވެ. އަދި މާދަމާއިން ފެށިގެން ކޮންމެ ދުވަހެއްގެ ހެނދުނު 10 އިން 12 އަށް މެންދުރު ފަހު ދެ އަކުން ހަޔަކަށް ޓިކެޓް ވިއްކާނެ އެވެ. މީގެ އިތުރުން ރޭގަނދު އަށަކުން 10 އަކަށްވެސް އޮލިމްޕަހުން ޓިކެޓް ވިއްކަމުން ދާނެ އެވެ.
އަންނަ މަހު ދެ އަކުން ފެށިގެން 17 އަށް އޮލިމްޕަހުގައި ނޯޓީ 40 ގެ 15 ޝޯ ދައްކާނެ އެވެ.
ޕްރިމިއާ ޝޯގެ ޓިކެޓް ގަނެގެން ބައިވެރިޔާ ބަލައިލުމުގެ ފުރުސަތު ލިބޭ ފަރާތްތަކަށް ހާއްސަކޮށްގެން ފިލްމު އަޅުވަން ހަމަޖެހިފައިވަނީ އަންނަ ހުކުރު ދުވަހުގެ ރޭ އޮލިމްޕަހުގައި އޮންނަ ހާއްސަ ރަސްމިއްޔާތެއްގަ އެވެ.
އެ ރަސްމިއްޔާތުގައި ނޯޓީ 40 ގެ އޮފިޝަލް ތިން ޓްރެއިލާއެއްވެސް ބެލުންތެރިންނަށް ހަދިޔާ ކުރާނެ އެވެ.
ނޯޓީ 40 ގައި އެކްޝަން، ލޯބި، ރޮމޭންސް، މިއުޒިކަލް، ސްޕައި، ކޮމެޑީ، ޑްރާމާ، ޖަޒުބާތު، އެކުވެރިކަން މިހެން ގޮސް ހުރިހާ ރަހައެއް ހިމެނޭނެ އެވެ. މި ފިލްމުގެ ތަރިންގެ ތެރޭގައި އަހްމަދު ސައީދު، މުހައްމަދު މަނިކު، އަލީ ސީޒަން، ޔޫސުފް ޝަފީއު، ފާތިމަތު އާޒިފާ (އަޒޫ)، ނިއުމާ މުހައްމަދު، އަލީ އާޒިމް (ދޮން އައްޔަ)، އިބްރާހިމް ޖިހާދު (ޖިމީ) ހިމެނެ އެވެ. އަދި މަރިޔަމް އައްޒަ، މުހައްމަދު ރިފްޝާން (ރިއްޕެ) އަދި އުމަރު އަޝްފާގް، އަރްޝަމް، އަލީ ޝާހިދު (ސްޓެޕް އައްޔަ)، އަހްމަދު ޝަރީފް، ގުލިސްތާނު ވެސް ފެނިގެންދާނެ އެވެ. އަދި މާރިއާ ތެރީސާވެސް ފެނިގެންދާނެ އެވެ.
އެންވިޝަން އަދި ޔޫއްޕެ ޕްރޮޑަކްޝަނުން އުފައްދާ އެ ފިލްމަކީ އަހަރުގެ ބޮޑު ފިލްމަށް ވެގެންދާނެ ކަމަށް ޕްރޮޑަކްޝަން ޓީމުން ޔަގީން ކުރެ އެވެ. އެ ފިލްމުގައި ހަ ލަވައެއްވެސް ހިމެނޭނެ އެވެ.