ޖުމްހޫރީ ޕާޓީގެ ލީޑަރު އަދި ރައްޔިތުން މަޖިލީހުގެ މާމިނގިލީ ދާައިރާގެ މެންބަރު ގާސިމް އިބްރާހިމްގެ މައްޗަައް ކުރާ ދައުވާތަކާ ގުޅޭގޮތުން މިރޭ ބޭއްވުމަށް ހަމަޖެހިފައިވާ ޝަރީއަތް ލަސްވަމުން އެބަދެ އެވެ.
ގާސިމްގެ އިބްރާހީމްގެ މައްޗަށް ދައުލަތުން އުފުލާފައިވާ ތިން ދައުވާ ކުރިޔަށް ގެންދިއުމާ މެދު ގޮތެއް ނިންމެވުމަށް ބާއްވާ ޝަރީއަތް ތާވަލުކޮށްފައި ވަނީ މިރޭ 7:00 އަށެވެ. ނަމަވެސް ޕީޖީގެ ވަކީލުން ހާޒިރު ނުވެގެން އަދިވެސް އެ މައްސަލަ ފެށޭގޮތް ވަނީ ނުވެފަ އެވެ. އަދި ކޯޓުގައި ތިބި ނޫސްވެރިންނާއި އާންމުން ވެސް މިހާރު ވަނީ ބޭރުކޮށްފަ އެވެ.
ގާސިމްގެ މައްޗަށް ދައުލަތުން ކުރާ ދައުވާތަކަކީ، ރިޝްވަތު ދިނުމުގެ ހުށަހެޅިކަމުގެ ދައުވާ އާއި ރަސްމީ ހައިސިއްޔަތުން ކުރަން ޖެހޭ ކަންކަމަށް ނުފޫޒު ފޯރުވަން އުޅުން އަދި ވޯޓް ދޭން ހުރި މީހަކަށް ނުރަނގަޅު ނުފޫޒެއް ފޯރުވަން އުޅުނު ކަމުގެ ދައުވާ އެވެ.
މިއަދު ހަވީރު ބޭއްވި ޝަރީއަތުގެ މަޖިލީހުގައި އެ ދައުވާތައް ކުރިޔަށް ނުގެންދެވޭނެ ކަމަށް ބުނެ ދިފާއީ ވަކީލުން ނަގާފައި ވަނީ އިޖްރާއީ ނުކުތާ ނަންގަވައިފަ އެވެ. އެގޮތުން ގާސިމްއާ ދެކޮޅަށް އެކަށީގެންވާ ހެކި ނެތުމުން، މިމަހު އަމަލު ކުރަން ފެށި ޖިނާއީ އިޖްރައާތުގެ ގާނޫނުގެ 115 ވަނަ މާއްދާގެ ދަށުން، އެ ދައުވާތައް ބާތިލް ކުރުމުގެ ބާރު ފަނޑިޔާރުންނަށް އެބައޮތް ކަމަށް ދިފާއީ ވަކީލުން ޝަރީއަތުގެ މަޖިލީހުގައި ވިދާޅުވި އެވެ.