ބެލްޖިއަމްގެ ފޯވަޑް ރޮމެލޫ ލުކާކޫ މެންޗެސްޓާ ޔުނައިޓެޑަށް ބަދަލުވިއިރު، އެ ޓްރާންސްފާގައި ޔުނައިޓެޑްގެ މިޑްފީލްޑަރު ޕޯލް ޕޮގްބާގެ ދައުރު ބޮޑެވެ.
އެވަޓަން އަށް ކުޅެމުންދިޔަ ލުކާކޫ ،24، ޔުނައިޓެޑަށް ބަދަލުވީ 75 މިލިއަން ޕައުންޑްގެ ޓްރާންސްފާ ފީއެއްގަ އެވެ. ލުކާކޫ ވަނީ ޔުނައިޓެޑާއެކު ފަސް އަހަރު ދުވަހުގެ އެއްބަސްވުމެއް ހަދައިފަ އެވެ.
ލުކާކޫ އާއި ޕޮގްބާ އަކީ ވަރަށް ގާތް ދެ ރަހުމަތްތެރިންނެވެ. ލުކާކޫގެ ޓްރާންސްފާގެ ކަންތައްތައް ހަމަޖެހުނީ ލުކާކޫ އާއި ޕޮގްބާ އެމެރިކާގައި ޗުއްޓީ ހޭދަކުރަމުން ދަނިކޮށެވެ.
ލުކާކޫ ބުނީ ޔުނައިޓެޑަށް އޭނާ ބަދަލުވި އެއް ސަބަބަކީ ޕޮގްބާ ކަމަށާއި ޕޮގްބާގެ ސަބަބުން ޔުނައިޓެޑަށް ހިތް ޖެހުނު ކަމަށެވެ.
"ލުކާކޫ އަކީ ވަރަށް ގާތް ރަހުމަތްތެރިޔެއް. ކޮންމެ ދުވަހެއް ކަހަލަ ގޮތަކަށް އަހަރަމެން ބައްދަލުވާނެ،" ލުކާކޫ ބުންޏެވެ. "މިދިޔަ އަހަރު ޕޮގްބާ ޔުނައިޓެޑަށް ބަދަލުވީމަ އަހަރެެން ހިތަށްއެރި ޔުނައިޓެޑުން ފުރުސަތު ލިބިއްޖެއްޔާ ބޭނުންހިފާނަމޭ."
ލުކާކޫ ބުނީ އެވަޓަން ދޫކޮށްލި މައިގަނޑު ސަބަބަކީ "އިތުރު ކާމިޔާބީތައް ހޯދަން ބޭނުންވާތީ" ކަމަށެވެ.
"ކެރިއަރު ނިންމާލާއިރު އަހަރެން ބުނަން ބޭނުން އަހަރެން ކުޅުނީ ކޮންމެ މުބާރާތެއްގައި ވެސް ތައްޓަށް ވާދަކުރާ ޓީމަކަށޭ. ޔުނައިޓެޑަކީ އަބަދު ވެސް އެއްވަނަ މަގާމަށް މަސައްކަތްކުރާ ޓީމެއް،" ލުކާކޫ ބުންޏެވެ.
ބެލްޖިއަމްގެ އެންޑަލެކްޓް އިން ޗެލްސީ އަށް ލުކާކޫ ބަދަލުވީ 2011 ވަނަ އަހަރެވެ. އެކަމަކު އެ ކްލަބް ދޫކޮށް އެވަޓަން އަށް އޭނާ ބަދަލުވީ ފުރުސަތު ނުލިބޭތީ އެވެ. ޗެލްސީން 2014 ވަނަ އަހަރު އެވަޓަން އަށް ލުކާކޫ ވިއްކާލިއިރު، ޗެލްސީގެ ކޯޗަކަށް ހުރީ ޔުނައިޓެޑްގެ ކޯޗަކަށް މިހާރު ހުރި ޖޯސޭ މޮރީނިއޯ އެވެ.
އެވަޓަންގައި ހޭދަކުރި ތިން ސީޒަންގައި ލުކާކޫ ވަނީ 133 މެޗުން 71 ލަނޑު ޖަހައިފަ އެވެ.